Read MUKANDA WANZAMBI Mareka 10 Bible Online

Mareka 10 - MUKANDA WANZAMBI bible

Mareka 10

¹Wanyamukili kwenoku, hakuya mwituŋa daYudeya nimwishinadi daYodana. Mazaza awantu hiyakumupompela cheŋi, hakuyileja cheŋi neyi ochu chelilaŋayi.

²AFwarisi hiyakwinza kudi yena nakumwihula mazu akumweseka nawu, Chaloŋa iyala kuseŋa Iŋodindi, tahindi?

³Yena hakuyakula nindi, Mosi wayilejeli nindidi?

⁴Wena nawu, Mosi wetejeli kusoneka mukanda wakuseŋa nachu, hikumuseŋa mumbanda.

⁵Yesu hakuyila nindi, Chayilejeliyi chumichi chafumini hakuchinchika kwanyichima yenu.

⁶Kwinza kufuma kutachi kwaleŋeluwu yuma, wayileŋeli niiyala nimumbanda.

⁷Dichi muntu ashiyi tata yindi namama yindi, akakeli Iŋodindi;

⁸niwena ayedi akekali mujimba wumu; hiyadi cheŋi ayeduku, adi mujimba wumu.

⁹Dichi anabombuwu kudi Nzambi, bayi ayambula kudi muntuku.

¹⁰Atumbanji hiyakumwihula cheŋi nsaŋu iyi mwitala.

¹¹Hakuyila nindi, Muntu wukuseŋa Iŋodindi hakusumbula wacheŋi, namwili Iŋodindi chatama, neli dehi wuvumbi.

¹²Mumbanda wukuleka nfumwindi hakusumbuka nawacheŋi, neli dehi wuvumbi.

¹³Amuleteleli anyana anyanya kulonda ayikunki, atumbanji hiyakuyihoshola.

¹⁴Ilaŋa Yesu chanachimoniyi hakutiya kutama nankashi, hakuyila nindi, Itejenu anyana anyanya kwinza kudami, bayi muyilekeshaku, muloŋa wanta waNzambi wawena adi chochichi.

¹⁵Nukuyileja chalala nami, muntu wukubula kutambula wanta waNzambi neyi mwana wanyanya, hakwijila mu nihantuku.

¹⁶Hakuyakata mumakasindi, hakuyikiswila nkisu, hakuyinaŋika.

¹⁷Cheliliyi nindi aholokeli munjila, muntu hakwinza kudi yena lufuchi; hakumufukamina nakumwihula nindi, Eyi Nkuluŋaŋa wamuwahi, nukwila ŋahi kulonda nakaswani wumi wahaya nyaka?

¹⁸Yesu hakumwila nindi, Wukuntenenadi neyi muwahi? Hosi muwahuku, chiŋa Nzambi hohu.

¹⁹Nshimbi wajiluka dehi nawu, Kujaha muntu chinjila. Kwila wuvumbi chinjila. Kwiya chinjila. Kushimuna wunsahu wakutwamba chinjila. Kudiila mukwenu yawukombi chinjila. Lemeshaku tata yeyi namama yeyi.

²⁰Yena hakumwila nindi, Eyi Nkuluŋaŋa, yuma yejimiyi nayihembi dehi kufumisha kuwansi.

²¹Yesu hakumushinshika, hakumukeŋa, hakumwila nindi, Kunashali chuma chimu hohu; yaloŋa wakalandishi yuma yeyi yejima winki atuzweŋi, eyi wakaheta maheta mwiwulu; winzi wunlondaŋa.

²²Ilaŋa yena hakudihomba kumesu nezu odu, hakudiyila kwindi nakuneŋa; muloŋa wadiŋi muntu waheta maheta amavulu nankashi.

²³Yesu hakuyitala kwi-ndo; hakuyila atumbanji twindi nindi, Akwamaheta, o chamonaŋawu kukala kwijila muwanta waNzambi!

²⁴Atumbanji hiyakuhayama nankashi mazu indi. Ilaŋa Yesu hakuyila cheŋi nindi, Anyikenu, akuhwelelaŋa maheta, o chamonaŋawu kukala kwijila muwanta waNzambi!

²⁵Nŋameli kuhanuka mudisu dandoŋu chaswayi, kwinza mukwamaheta kwijila muwanta waNzambi chakala.

²⁶Wena hiyakusweja kuhayama nankashi nawu, Indi dinu wukutwesha kwamwinewa hinyi?

²⁷Yesu hakuyitala nindi, Chuma chikukaŋanya muntu, Nzambi wukuchitwesha, muloŋa yuma yejima yinatwesheki kudi Nzambi.

²⁸Petulu hakutachika kumwila nindi, Tala, etu tunashiyi yuma yejima, tunakulondi.

²⁹Yesu nindi, Nukuyileja chalala nami hikudi muntu nashiyi hela itala, hela ana kwindi, hela ahelindi, hela mama yindi, hela tata yindi, hela anyana, hela maha, kukoola ami ninsaŋu yayiwahi,

³⁰wukubula kutambwilamu nkulakaji katataka makonu, nimatala, niana kwindi, niahelindi, niamama, nianyana, nimaha, kubombelaku nikuyikabisha; hanyaka yakenzaku wumi wahaya nyaka.

³¹Ilaŋa mavulu akusambila akekala akukuminina; niakukuminina akekala akusambila.

³²Adiŋi munjila yakukanduka kuYerusalema; Yesu hakutwamina kumbidi. Hiyakuhayama, ninowu alondelelaŋa munyima hiyakutiya woma. Hakupompesha cheŋi owu ikumi nayedi, nakutachika kuyileja yuma yakamonayi.

³³Nindi, Tiyenu, hitukukanduka kuYerusalema, Mwana kamuntu akamuhana kudi awakulumpi jawatupristu nikudi ansoneki; akamuhisha nawu afwi, akamuhana kudi ajentili;

³⁴akamuseha, akamufwŋila mazeŋi, akamuvupola, akamujaha; chimwakahita mafuku asatu wakasaŋuka mudi afu.

³⁵Anyana kaZebedewu aYakoba naYowanu hiyakuswila kwakwihi nayena, hiyakumwila nawu, Eyi Nkulupaŋa, tunakeŋi wutwililuku chuma chitukukulomba.

³⁶Yena hakuyila nindi, Alunakeŋi niyilili chumanyi?

³⁷Wena hiyakumwila nawu, Twiteji twakashakami mukulema kweyi, iwu kuchikasa cheyi chachidiilu, iwu kuchikasa cheyi chachimunswa.

³⁸Yesu hakuyila nindi, Chuma chimunalombi himunachilukuku. Enu mutweshi kunwa mulupasa lunukunwami? Mukutwesha kupapatishewa nachipapatishu chakupapatishawu nachu ami?

³⁹Wena hiyakumwila nawu, Tukutwesha. Yesu hakuyila nindi, Lupasa lunukunwami, mwakanwamu; nichipapatishu chakumpapatishawu nachu ami, ninenu nawa akayipapatisha nachu;

⁴⁰kwinza kushakama kuchikasa chami chachidiilu, hela kuchikasa chachimunswa, hichuma chami mwaka nichihanuku; chambala chanawa aloŋeshelewa dehi.

⁴¹Owu ikumi chanachitiyuwu, hiyakutachika kutiya kutama nankashi nawaYakoba naYowanu.

⁴²Yesu hakuyitambika, hakuyila nindi, Mweluka dehi anyanta jawajentili chayiyulaŋawu, niantu awu alema chekalaŋawu nawanta hadi wena;

⁴³ilaŋa mukachi kenu bayi mwakekala chochochuku. Yowu wukukeŋa kwikala muneni mukachi kenu ekali mukwakuyikalakela.

⁴⁴Yowu wukukeŋa kwikala mukwakubadika mukachi kenu ekali nduŋu yenu.

⁴⁵Muloŋa chalala chenjiliyi Mwana kamuntu, halondeli nindi akamukalakeluku; nindi akakalakeli akwawu, akahani wumi windi wakukuula nachu antu amavulu.

⁴⁶Hiyakushika kuYeriku. Chadiŋi nakufumayi kuYeriku nawatumbanji twindi niizaza deneni, mwana kaTimewu Baratimewu, mputamesu, mukwakulomba, wadiŋi washakama kunsa yanjila.

⁴⁷Chanatiyiyi nawu diyi Yesu wakuNazareta, hakutachika kubilela nindi, Eyi Yesu mwana kaDavidi, ntiyili luwi.

⁴⁸Antu amavulu hiyakumuhoshola nawu, Mwenaku. Ilaŋa yena hakusweja nikubilela nankashi nindi, Eyi mwana kaDavidi, ntiyili luwi.

⁴⁹Yesu hakwimana ku-ka, nindi, Mutambi kenu. Hiyakumutambika owu mputamesu, hiyakumwila nawu, Tiyaku kuwaha, nyamukaku, hakukutambika.

⁵⁰Yena hakunata chi kovwelu chindi, hakutakumuka, hakwinza kudi Yesu.

⁵¹Yesu hakumwihula nindi, Wunakeŋi nikwilili chumanyi? Mputamesu nindi, Eyi Mwanta, nakeŋi nimoni.

⁵²Yesu hakumwila nindi, Yaŋa kweyi, kukuhwelela kweyi kunakukoleshi dehi. Hohenohu amona nikumona, hakumulondela Yesu munjila.