Read MUKANDA WANZAMBI Mareka 11 Bible Online

Mareka 11 - MUKANDA WANZAMBI bible

Mareka 11

¹Chanaswiluwu kwakwihi naYerusalema, kuBetefwaji naBetani, kwokumpidi yaOliveta, hakutemesha atumbanji twindi ayedi,

²hakuyila nindi, Yenu mumukaia wudi kumbidi wuna. Chimukushikamu, hohenohu mukuwana mwana kachimbulu anamukasi, wakadi kukandamaŋahu dehi kudi muntu, mwakamusubuli mumuleti.

³Neyi hadi muntu wukuyila nindi, Mudi nakwiladi? mukwila nenu, Anamukeŋi kudi Mwanta; yena wukumufuntisha cheŋi swayi.

⁴Ayili kwawu, aweni mwana kachimbulu anamukasi kuchisu hanzi munjila kachi hiyakumusubula.

⁵Antu amakwawu emenuku hiyakuyila nawu, Mudi nakusubwiladi mwana kachimbulu?

⁶Hiyakuyileja mwomwayilejeliyi Yesu; hiyakuyiteja kuya nindi.

⁷Hiyakuleta mwana kachimbulu kudi Yesu; hiyakushahu mahinawu, yena hakukandamahu.

⁸Amavulu hiyakwala mahinawu munjila, amakwawu hiyakuhobola yiputa mumaha, hiyakuyala munjila.

⁹Ninawa atwaminini kumbidi ninawa alondeleli munyima hiyakubilela nawu, Hozana! Kisu kisu iwu wukwinza mwijina daYehova!

¹⁰Kisu kisu wanta wukwinza wowu watata yetu Davidi! Hozana mwiwulu dakubadika!

¹¹Hakwijila muYerusalema nimutembeli lwe; chanataliyi yuma yejima, kwila nimelela, hakwidikamu, hakuya kuBetani nekumi nayedi.

¹²Chikunachi, helili anafumi dehi muBetani, hakutiya nzala.

¹³Hakumona mutondu wachikuyu kwakulehi, wukweti mafu; hakuyaku nindi amonuku nyikabu; chanashikiyi kumutondu kuwana kwamafu hohu, muloŋa hihadiŋi hachila aka chayikuyuku.

¹⁴Hakuwuhosha nindi, Kufuma kulelu bayi akadya nyikabu yeyi kudi muntu haya nyakaku. Atumbanji twindi achitiyili.

¹⁵Ashikili kuYerusalema. Hakwijila mutembeli, hakutachika kutemunamu adiŋi nakulandisha, niadiŋi nakulanda mutembeli, hakuhinona nŋimesa jawakwakuhimpa mali, nimatanda anawa alandishilaŋa tutela;

¹⁶hetejeli muntu kusenda chuma achihitishi mutembeluku.

¹⁷Hakuyileja nindi, Anasoneki nawu, Itala dami akaditena nawu itala dakulombela nyuza yejima. Hakwinza enu munadibalumuni dehi kwikala iyeŋu dawamakombi.

¹⁸Akulumpi jawatupristu niansoneki chachitiyiluwu, hiyakukeŋa hakumukisaŋena; muloŋa amutiyili woma, nanochu chahayaminuwu antu ejima kuleja kwindi.

¹⁹Hakufumaŋa muŋanda namelela hefuku hefuku.

²⁰Chadiŋi nakupandakanawu budidi, hiyakumona owu mutondu wachikuyu wunomi dehi chau, kufumisha kunyiji.

²¹Petulu hakwanuka, hakumwila nindi, Eyi Rabi, tala mutondu wachikuyu washiŋa, wunomi dehi chau.

²²Yesu hakuyakula nindi, Mukuhwelelenu Nzambi.

²³Nukuyileja chalala nami neyi muntu wukwila mpidi iyi nindi, Tutulukaku wudinati mwijiya; mumuchima windi kutadika nehi, hakukuhwelela nindi ichi chanahoshiyi chikwila, wukuchitambula.

²⁴Dichi nukuyileja nami, yuma yejima yimukulomba, yimukukeŋa, kuhwelelenu nenu munayitambuli dehi, mwakayitambula.

²⁵Mafuku ejima chimukwimanaŋa nakulomba, neyi hadi mwinenu wudi nindi nansaŋu, mwanakenenu, kulonda tata yenu wudi mwiwulu ayanakeni nyiloŋa yenu nawa.

²⁶Ilaŋa neyi enu mukubula kuyanakena akwenu, nitata yenu wudi mwiwulu hakuyanakena nyiloŋa yenuku.

²⁷Hiyakwinza cheŋi kuYerusalema. Chadiŋi nakwendayi mutembeli, awakulumpi jawampristu niansoneki niakulumpi hiyakwinza kudi yena.

²⁸Hiyakumwila nawu, Eyi welaŋa yumiyi nawantanyi? Indi nakwinki wantiwu wakwila yumiyi hinyi?

²⁹Yesu hakuyila nindi, Nukuyihula chuma chimu muŋakuli, ninami nukuyileja wanta wunélaŋa nachu yumiyi.

³⁰Chipapatishu chaYowanu chakwiwulu, tahindi chakudi antu? Ejakulenu.

³¹Hiyakudihujola muntu namukwawu nawu, Neyi tukwila netu chakwiwulu, wukutwila nindi, Indi dinu mwalekelelidi kumwitiya?

³²Kwinza neyi tukwila netu chakudi antu—! Hiyakutiya nawa antu woma, muloŋa antu ejima elilaŋa nawu Yowanu chalala hikaprofwem.

³³Hiyakumwakula Yesu nawu, Kwiji, etu kwiluka nehi. Yesu niyena hakuyila nindi, Ninami nawa hinukuyileja wanta wunelaŋa nachu yumiyuku.