Read MUKANDA WANZAMBI Mareka 12 Bible Online

Mareka 12 - MUKANDA WANZAMBI bible

Mareka 12

¹Hakutachika kuhosha nawu nayishimu. Nindi, Muntu wumu wadimini itempa danyivinyu, hakukolekaku ikoli, hakupunda ibukudakukamwina vinyu, hakutuŋa itala dakola, hakudishila akwakudima, hakuya kwituŋa dacheŋi.

²Hachila aka chavinyu hakutemesha ŋamba kudi akwakudima kulonda atambuluku nyikabu yamwitempa danyivinyu.

³Wena hiyakumukwata, hiyakumweta, hiyakumufuntisha makasakasa.

⁴Hakuyitemeshela cheŋi ŋamba mukwawu, niyena amutapili kunamutu, hiyakumukoŋa chatama.

⁵Hakutemesha mukwawu, hiyakumujaha. Niamakwawu amavulu, amakwawu ayeteli amakwawu ayijahili.

⁶Washeli nawumu hohu, yowu mwanindi akeŋayi; nkumininaku hakuyitemeshelayi nindi, Akamwakama mwanami.

⁷Ilaŋa owu akwakudima hiyakuhosha mukachi kawu nawu, Iwu diyi nswana, twayenu tumujahenu, kulonda wuswana wikali wetwetu.

⁸Hiyakumukwata, hiyakumujaha, amunatila nihanzi yetempa.

⁹Dichi owu mwanta wetempa danyivinyu wakela ŋani? Wakenza nakujilumuna owu akwakudima; itempa danyivinyu wakayinka antu acheŋi.

¹⁰Munataŋi mazu amumukanda wajila wanasonekuwu nawu, Ilola dalekeli antuŋi, didu delishiluwu namutu wewombu;

¹¹ichi chafumini kudi Yehova, chakuhayama kumesu etu.

¹²Akeŋeli kumukwata, ilaŋa atiyili woma wezaza, muloŋa elukili nawu chishimu ichi natutili etu. Hiyakumushiya, hiyakudiyila kwawu.

¹³Hiyakumutemeshela aFwarisi amakwawu niakwaHerodi kulonda amuti namazu akuhoshayi.

¹⁴Chanashikuwu hiyakumwila nawu, Eyi Nkuluŋaŋa, etu tuneluki netu eyi wumuntu walala, hiwatiyaloŋa muntu womaku, hiwaakamaŋa mesu awantuku, Ilaŋa chalala walejaŋa antu njila yaNzambi. Kusonka kudi Kesari chaloŋa, tahindi nehi?

¹⁵Tuhanaŋa tahindi tuleki? Ilaŋa yena welukili wufwikŋi wawu, hakuyila nindi, Mukuŋesekeladi? Nletelenu idali niditali.

¹⁶Hiyakudileta, hakuyila nindi, Ichi chifwikija chanyi, ninŋi nsona janyi? Wena hiyakumwila nawu, JaKesari.

¹⁷Yesu hakuyila nindi, Yuma yaKesari inkenu Kesari; yuma yaNzambi inkenu Nzambi. Hiyakumuhayama nankashi.

¹⁸Kudi yena hikukwinza aSadusi, elaŋa nawu afu hiyasaŋukaŋaku;

¹⁹hiyakumwihula nawu, Eyi Nkuluŋaŋa, Mosi watusonekeleli nindi, Neyi mana kwamuntu wukufwa, hakushiya mumbanda, kushiya mwana nehi, nindi mana kwindi akatambuli owu Iŋodindi, akamuvweli mana kwindi anyana.

²⁰Kwadiŋi amayala atanu nayedi ivumu dawu dimu; wakusambila wasumbwili Iŋodindi, wafwili, kushiya mwana nehi.

²¹Wamuchiyedi hakumuswana, hakufwa, kushiya mwana nehi; niwamuchisatu chochimu;

²²ejima atanu nayedi kushiya mwana nehi. Nkumininaku niyena mumbanda yofwa ni kufwa.

²³Hakusaŋuka afu wakekala iŋoda wumwodihi? Muloŋa ejima atanu nayedi wadiŋi iŋodawu.

²⁴Yesu hakuyiia nindi, Chimwabulaŋa kwiluka nyikanda yajila, hela Ŋovu yaNzambi, dihu hafumaŋa kuluwa kwenu.

²⁵Hakasaŋuka antu mudi afu, hiyakasumbula hela kusumbukaku, akekala neyi chekalawu aŋelu amwiwulu.

²⁶Kwinza nsaŋu yakusaŋuka afu, kanda muyitaŋaŋahu dehi kumukanda waMosuku? ohu hatenawu chiputa, hahosheliyi Nzambi nayena nindi, Ami yami Nzambi yaAbarahama, Nzambi yaIsaka, Nzambi yaYakoba.

²⁷HiNzambi yawafuku, hiNzambi yawamomi; enu mwaluwaŋa nankashi.

²⁸Nsoneki wumu hakwinza, hakutiya chakudihujolawu, welukili nindinayakuli chachiwahi, hakumwihula nindi, Lushimbi lwabadika nshimbi jejima lushimbinyi?

²⁹Yesu hakwakula nindi, Lwabadikahu lwolwakwila nawu, Eyi Isarela, tiyaku; Yehova Nzambi yetu, Yehova wudi wumu.

³⁰Keŋaku Yehova Nzambi yeyi namuchima weyi wejima, nawumi weyi wejima, namaaneyi ejima, naŋovu jeyi jejima.

³¹Lwamuchiyedi hiyolwakwila nawu, Keŋaku mukwenu neyi chiwadikeŋa eyi aweni. Kwosi lushimbi lwakubadika ŋuku.

³²Owu nsoneki hakumwila nindi, Chalala, eyi Nkuluŋaŋa; ochu chiwunahoshi neyi yena wudi wumu, kwosi wacheŋi chiŋa yena hohu, wunahoshi chachiwahi.

³³Kumukeŋa namuchima wejima, nakashinshi kejima, naŋovu jejima, nakukeŋa mukwenu neyi chiwadikeŋa eyi aweni, chabadika nyilambu yakushita yamukuma, niyimuna yakuketula yejima.

³⁴Yesu chanamoniyi yena naakuli nama ana, hakumwila nindi, Hiwudi kwakulehi nawanta waNzambi uku. Kufuma henohu hikwadiŋi muntu wakwatili wulobu wakumwihula chumaku.

³⁵Yesu chadiŋi nakulejayi antu mutembeli, hakwihula nindi, Ansoneki ahoshaŋa ŋahi nawu Kristu himwana kaDavidi?

³⁶Yomweni Davidi welili mudi Spiritu Wajila nindi, Yehova wamwilili Mwanta wami nindi, Shakamaku kuchikasa chami chachidiilu, nichinamba kayila ayilumbu jeyi hiyadi itanda dakunyendu yeyi.

³⁷Yomweni Davidi wamutenaŋa nindi, Mwanta; indi wukwi kala mwanindi ŋahi? Antu amavulu chadiŋi nakumutiyawu hiyakutiya kuwaha.

³⁸Chayilejelaŋayi hakuyila nindi, Babelenu ansoneki, afwila kwendujola namahina akuluka, nikuyimwosha kuwulandilu,

³⁹nikushakama hamatanda alema mushikola, nihayididi yalema kumawija.

⁴⁰Adyaloŋa nimatala awambanda anfwila, alombaŋa kulomba kwakudimbana kwakwila lombe-e; kutanya kwawu kwakabadika.

⁴¹Hakushakama kwatalaŋana nachikasha chakusha mali; hakutala izaza chidikuumbila mali muchikasha, amavulu adiŋi aheta ombililumu mali amavulu.

⁴²Kwenjili kazweŋi, nfwila wamumbanda, hakúumbilamu tumali twanyanya tuyedi, kuyibomba ashika mukadali kamu.

⁴³Hakutambika atumbanji twindi, hakuyila nindi, Nukuyileja chalala nami, iwu nfwila kazweŋi nombilumu yakubadika ejima adi nakuumbila mali muchikasha;

⁴⁴Muloŋa wejima wawu anombilumu yakuyuma yawu yasweja kuvula; ilaŋa iwu mumbanda nombilumu yakuwuzweŋi windi yoyindi yejima yadiŋi yakudihandisha nachu.