Read MUKANDA WANZAMBI Mareka 13 Bible Online

Mareka 13 - MUKANDA WANZAMBI bible

Mareka 13

¹Chanedikiyi mutembeli, kambanji kindi wumu hakumwila nindi, Eyi Nkuluŋaŋa, tala owu malola, ninowu matala!

²Yesu hakumwila nindi, Wunamoni awa matala amaneni? Hikwakashala ilola nidimu dakanaŋamana helola di kwawu, dakabula kunatika hesekuku.

³Chashakaminiyi hampidi yaOliveta yatalaŋana natembeli, aPetulu naYakoba naYowanu niAnderi, hiyakumwihula kwakanka wawu,

⁴nawu, Atuleji mwani, yumiyi yamba kamwekana mwakanyi? Hakakeŋa kumana yuma yejimiyi kwakekala chinjikijilu chanka?

⁵Yesu hakutachika kuyila nindi, Babalenu, akenda kayiluwaŋesha kudi muntu.

⁶Muloŋa antu amavulu akenza mwijina dami, akela nawu, Diyi yami; akaluwaŋesha amavulu.

⁷Chimwakatiya majita ninsaŋu jamajita, bayi mwakaakamaku. Yumiyi chiŋa yakashika, ilaŋa kukumisha kanda.

⁸Muloŋa muza wakanyamuka nakulwa namuza, wanta nawanta; kwakekala ninyitentanshi kwacheŋi nakwacheŋi; kwakaholoka nzala. Yumiyi diyi yihuŋu yakutachika.

⁹Ilaŋa enu babalenu enu aweni, Muloŋakayitwala muyota, akayetela nimumashikola; mwakemana kumesu awanguvulu nawanyanta hamujimba wamami, kulonda kuyilila wunsahu.

¹⁰Ninsaŋu yayiwahi chiŋa akasambila kuyishimuna kunyuza yejima.

¹¹Chakayitwalawu nakuyihana kudi ansompeshi, bayi mwakaakamaŋahu dehi yimwakahoshaku; mwakahosha yakayinkawu kuhosha mpinji oyu, muloŋa hiyenu mwakahoshaku, Spiritu Wajila diyi wakahosha.

¹²Iyala wakajahisha mana kwindi, nitata yawantu wakajahisha mwanindi; anyana akanyamukila anvwali jawu, akayijahisha.

¹³Akayihela kudi antu ejima hansaŋu yejina dami; Ilaŋa muntu wakakakela nikunsa diyi wakahanda.

¹⁴Ilaŋa chimwakamona chishimashima chakaletesha mahembi, hichikwimana kuchabula kutelela, yowu wukutaŋa ashinshiki, henohu owu akekala muYudeya akatemukili kwawu kumapidi;

¹⁵niwakekala hewulu detala, chakasulukayi bayi eŋila nakunona chuma mwitala dinduku;

¹⁶wakekala mwiha, bayi akafunta nakunona kahuma kinduku.

¹⁷Ilaŋa o yihuŋu yakamona akekala namavumu, niakaamwisha hamafuku owu!

¹⁸Lombenu chakabuli kwikala hachila aka chamashika.

¹⁹Muloŋa hamafuku owu hakekala lukadi lwakadi kwikalaŋahu dehi, kufumisha hatachi haleŋeliyi Nzambi yuma, kushika nikulelu, hilwamba kekalaku nawa cheŋuku.

²⁰Neyi Yehova kukehesha mafuku owu nehi, hikwakekala antu akahandaku; ilaŋa nayikehesheli hanyijimba yawatondewa atondeliyi.

²¹Henohu neyi hakekala muntu wakayila nindi, Talenu Kristu iwu; hela nindi, Talenu owu; bayi mwaketiyaku.

²²Muloŋa hakanyamuka aKristu akutwamba, niatuprofwetu akutwamba, akamwekesha yinjikijilu nayihayamisha, kulonda nawu akaluwaŋeshi atondewa, neyi chinatwesheki.

²³Kwinzenu kwenu kababalenu; talenu nayilejaŋahu dehi yuma yejima.

²⁴Ilaŋa hamafuku akalondela lukadi olu, itaŋwa dakeyila, nikakweji hikakatoneka mwejuku,

²⁵nitutumbwa twakaholoka mwiwulu, niŋovu jidi mumawulu jakakanka.

²⁶Henohu akamona Mwana kamuntu hakwinza mumavu naŋovu yeneni nilubanji lwakulema.

²⁷Henohu wakatemesha aŋelu jindi, wakapompesha indi atondewa kumpepela jiwana, kufumisha kunsa yamaseki, ndo nikunsa yewulu.

²⁸Kwatilenu maana kuchishimu chamutondu wachikuyu. Neyi mutayi wawu wukutachika kwovwaha, hiwukusapuka mafu, enu himukwiluka nenu mayinza adi kwakwihi.

²⁹Dichi ninenu nawa chimukumona yumiyi hiyikwinza, ilukenu nenu wudi kwakwihi, kwoku kuyisu kachi.

³⁰Nukuyileja chalala nami, chisakichi hichakahitaku, chiŋa yuma yejimiyi yakamana.

³¹Iwulu niiseki akahita, Ilaŋa mazu ami hiyakahitaku.

³²Ilaŋa itaŋwodu hela mpinji oyu kwosi wayilukaku, chalala hela aŋelu amwiwulu hela Mwana, chiŋa Tata.

³³Babalenu, tonenu, lombenu; Muloŋa himuneluki mpinji oyuku.

³⁴Chidi neyi muntu nayi njila yayilehi kumpata yacheŋi, nashiyi itala dindi, nenki anduŋu jindi wuchakala, ninyidimu yawu, iwu nawindi iwu nawindi, naleji mukwakuhemba chisu nindi akatoni.

³⁵Dichi tonenu; Muloŋa himuneluki hakenza nkaka yetalaku, kwiji melela, kwiji mukachi kawufuku, kwiji hedikilaŋa ikombu, kwiji budidi;

³⁶kuchina kwila chakenzayi chakukasumwisha hakayiwana namutulu.

³⁷Chinukuyilenu, nayili niantu ejima, nami, Tonenu.