Read MUKANDA WANZAMBI Mareka 14 Bible Online

Mareka 14 - MUKANDA WANZAMBI bible

Mareka 14

¹Dichi chikwasheli mafuku ayedi naŋaseka nimankendi akadi iluŋa, awakulumpi jawatupristu niansoneki hiyakukeŋakeŋa hakumukwatila namakasu kulonda amujahi;

²Muloŋa elili nawu, Bayi mumafuku achawija ku, antu akenda kaleta ipumba.

³Chadiŋiyi muBetanimwitala damukwambumba Shimona, chashakaminiyi nakudya, hikukwinza mumbanda namalasha anaradi abadika kulema wuseya, muchipunda chelola dalubanji. Hakufumpa chipunda, hakuyihuŋunwina kunamutu windi.

⁴Ilaŋa kwadiŋi amakwawu atiyili kutama nankashi munyichima yawu, nawu, Chanakisaŋanuwu malashawa analondidi?

⁵Malashawa neyi ayilandisha adi kufwika mali akubadika mumakulakaji asatu, ayinki atuzweŋi. Hiyakumunyinyita owu mumbanda.

⁶Ilaŋa Yesu nindi, Mulekenu kwindi, mukumukabishiladi? Naŋilili mudimu wawuwahi.

⁷Muloŋatuzweŋi mudi nawu mafuku ejima, honsu munakeŋeli kuyila chachiwahi mukutwesha; Ilaŋa mi hinidi nenu mafuku ejimaku.

⁸Yena kwindi neli mwashika Ŋovu jindi; nawayishaŋahu dehi mujimba wami nanochu chakanjiikawu.

⁹Nukuyileja chalala nami, kwejima kwamba kashimunawu nsaŋu yayiwahi mwahita matuŋa ejima, amba katenaŋa chaneliyi mumbandiwu kulonda kumwanuka nachu.

¹⁰Yudasi Isakaroti wahekumi nayedi, hakuya kudi awakulumpi jawatupristu kulonda akamuhani kudi wena.

¹¹Niwena chanachitiyuwu, atiya nikuwaha, hiyakumukana kumwinka mali. Hakukeŋa hatela kumuhenena.

¹²Hefuku damuchimu damankendi akadi iluŋi, hajahaŋawu mukoku wapaseka, atumbanji twindi hiyakumwila nawu, Wukukeŋa tuyi kudihi, twakakuloŋesheli kwakudiila paseka?

¹³Hakutemesha atumbanji twindi ayedi, hakuyila nindi, Yenu muŋanda, mwakabulakani neyala nasendi nsaba yameji; mwakamulondi.

¹⁴Mwonsu mwakeŋa ilayi mwakamwili mwini itala nenu, Nkuluŋaŋa nindi, Itala dami dawenyi munukudiila paseka nawatumbanji twami didi kudihi?

¹⁵Yomwenindi wakayileja itala deneni dahewulu, mudi yuma yakupoŋomwena dehi; mwakatuloŋesheli mwenomu.

¹⁶Owu atumbanji hiyakuya, hiyakushika muŋanda, hiyakuwana mwomwayilejeliyi; aloŋesha nipaseka.

¹⁷Chikuneli melela, hakwinza nekumi nayedi.

¹⁸Chanashakamuwu nakudya, Yesu hakwila nindi, Nukuyileja chalala nami, hadi mwinenu wumu wukunfukeja, yowu tudi nakudya nindi.

¹⁹Hiyakutachika kuneŋa, hiyakumwila hamuntu hamuntu, iwu nindi, Yami tahindi? iwu nindi, Yami tahindi?

²⁰Hakuyila nindi, Hiwumu wahekumi nayedi, yowu wudi nakutanta nanami mucheŋa.

²¹Muloŋa Mwana kamuntu hakuya mwomwamusonekeleluwu; ilaŋa o yihuŋu yanowu muntu wukufukeja Mwana kamuntu! Owu muntu neyi havwalikiluku mutenowu chachiwahi.

²²Chadiŋi nakudyawu, hakunona dinkendi, chanakisuliyi nkisu hakudihumuna, hakuyinka nindi, Tambulenu, diwu mujimba wami.

²³Hakunona lupasa, chanasakililiyi hakuyinka; hiyakunwamu wejima wawu.

²⁴Hakuyila nindi, Diwu mashi ami achitiyaŋenu akupwekela antu amavulu.

²⁵Nukuyileja chalala nami, hinamba kanwa cheŋi yanyikabu yamuvinyuku, chiŋa ifuku dinakanwa yayiha muwanta waNzambi.

²⁶Chanembuwu kamina, hiyakwidika, hiyakuya kumpidi yaOliveta.

²⁷Yesu hakuyila nindi, Mukudimboka wejima wenu; muloŋa anasoneki nawu, Nakatapa kabiŋa, ninyikoku yakapalaŋana ndu ndu.

²⁸Ilaŋa chakansaŋulawu mudi afu, nakayanahu dehi kuŊaliliya.

²⁹Ilaŋa Petulu hakumwila nindi, Hela ejima akudimboka, ami nehi.

³⁰Yesu hakumwila nindi, Nukukuleja chalala nami, eyi lelu, wufuku woweniwu, hakwila ikombu kanda edi kili kayedi, wukudikalami kasatu.

³¹Ilana yena hakuhosha naŋovu nankashi nindi, Hela chakufwa neyi hamu, hinakadikala eyuku. Wejima wawu ahosheli mwomumu nawa.

³²Hiyakushika kwatenanawu nawu kuŋesemani; hakuyila atumbanji twindi nindi, Shakamenu hanu, niyi nilombi.

³³Hakuya nawaPetulu naYakoba niYowanu, hakutachika kuhayama nankashi, nikukaba nankashi.

³⁴Hakuyila nindi, Muchima wami wunaneni chakubadika, neyi kena nifwi; shalenu hanu nakutona.

³⁵Hakuswila kumbidi chanti, hakudinata hamaseki, hakulomba nindi, Neyi chinatwesheki, mpinji iyi yinfumi.

³⁶Hakwila nindi, Aba, Tata, yuma yejima yinatwesheki kudeyi; nfumishili lupasilu; Ilaŋa dinu bayi chinukukenamuku, china chiwukukeneyi.

³⁷Hakwinza, hakuyiwana namutulu, hakumwila Petulu nindi, Eyi Shimona, wudi namutulu? Hiwunatweshi kutona hela mpinji yimuku?

³⁸Tonenu, lombenu, mubuli kwijila mukweseka. Chalala spiŋtu yinakeŋi, ilaŋa mujimba wunazeyi.

³⁹Hakufumaku cheŋi, hakuya nakulomba, wahosheli mwomumu.

⁴⁰Hakwinza, hakuyiwana cheŋi namutulu, muloŋa mesu awu aswejeli kulema, hiyelukili nimwakumwakwilaku.

⁴¹Hakwinza cheŋi kamuchisatu, hakuyila nindi, Ichi dinu kamenu kwenu munooki; chinawani dehi; mpinji yinashi ki dehi; talenu, Mwana kamuntu anamufukeji dehi kumakasa awakwanshidi.

⁴²Nyamukenu, tuyenu; talenu wukunfukeja hadi kwakwihi.

⁴³Hohenohu, iku wuchidi kuhosha, Yudasi wahekumi nayedi hakwinza nezaza dawantu akweti mpoku jatubali ninyitondu, anafumi kudi awakulumpi jawatupristu nikudi ansoneki nikudi awakulumpi.

⁴⁴Henohu mukwakumufukeja wayileja dehi chinjikijilu chakwila nindi, Yowu nukupwepula, diyi mukukwata, mumutwalaŋa chachiwahi.

⁴⁵Chanashikiyi, hohenohu enza nikudi Yesu, nindi, Eyi Rabi. Hakumupwepujola nankashi.

⁴⁶Niwena amwolwela nimakasawu, amukwata nikumukwata.

⁴⁷Wumu wahadi owu emenuku, hakuhola mpoku yindi yakabali, hakutapa nduŋu yakapristu muneni, kutapa kwakumuketula itu dindi.

⁴⁸Yesu hakuyila nindi, Munenzi nakunkwata neyi chakukwata mukwakubuwa, nampoku jatubali nanyitondu?

⁴⁹Nadiŋi nenu mutembeli nakuyileja hefuku hefuku, enu kunkwata nehi; Ilaŋa nyikanda yajila chiŋa yilumbuluki.

⁵⁰Wejima wawu amushiyili, atemukili.

⁵¹Hadiŋi mukwenzi weyala wumu wayili nindi, wadiŋi wadikumbakana ihina ditooka hamujimba wamukunkulu;

⁵²hiyakumukwata niyena, hakushiya odu ihina ditooka, hakutemuka nzekesi.

⁵³Hiyakumutwala Yesu kudi kapristu muneni; hikukupompa chimu nayena awakulumpi jawatupristu ejima, niakulumpi niansoneki.

⁵⁴Petulu hakumulondela munyima hahalehi, lwe nimuchipaŋu chakapristu muneni; hakushakama chimu naawatulama nakwota kesi muchejeji chakesi.

⁵⁵Henohu awakulumpi jawatupristu nachota chejima hiyakukeŋakeŋa wunsahu wakumujaha nachu Yesu, hiyawumwenuku.

⁵⁶Muloŋamavulu ashimwini wunsahu wakumutwambila, wunsahu wawu hiwatiyaŋenuku.

⁵⁷Amakwawu emeni nakushimuna wunsahu wakumutwambila,

⁵⁸nawu, Etu twamutiyili nakuhosha nindi, Ami nakasanda tembeli iyi yakutuŋa namakasa, nakatuŋa yacheŋi yaka kutuŋa namakasa mumafuku asatu.

⁵⁹Hela chochu; wunsahu wawu hiwatiyaŋenuku.

⁶⁰Kapristu muneni hakwimana mukachi, hakumwihula Yesu nindi, Eyi kwakula nehi? Wunsahu wudi nakushimunawu antu awa wunayi mudihi?

⁶¹Ilaŋa Yesu saŋa amwenenayi zo-o, kwakula nehi. Kapristu muneni hakumwihula nindi, Yeyi Kristu, Mwana kaMukwakukisulewa, tahindi?

⁶²Yesu nindi, Yami. Mwamba kamona Mwana kamuntu nashakami kuchikasa chachidiilu chaŋovu, hakwinza namavu amwiwulu.

⁶³Kapristu muneni hakutabula mahinindi nindi, Ayinsahu amakwawu aadi.

⁶⁴Munatiyi chanatukiyi Nzambi; munatoŋojoki nenwidi? Hiyakumuhisha wejima wawu nawu nateli kufwa.

⁶⁵Amakwawu hiyakutachika kumufwŋila mazeŋi, hiyakumubuta kumesu, hiyakumweta makaha, hiyakumwila nawu, Profwetaku. Niatulama hiyakumutambola nakumwetola namakasa.

⁶⁶Chadiŋiyi Petulu mwishina muchipaŋu, hikukwinza wumu wahadi ayaloŋadima akapristu muneni;

⁶⁷chanamoniyi Petulu wudi nakwota kesi, hakumutala nindi, Eyi nawa wadiŋi hamu naniwu Yesu kaNazareta.

⁶⁸Ilaŋa yena hakudikala nindi, Chiwunahoshi ami hinachilukuku, hela kushinshikamu nehi. Hakwidika, hakuya mwikeki, ikombu edikila nikwidikila.

⁶⁹Owu chaŋadima hakumumona, hakutachika cheŋi kuyileja antu emenuku nindi, Iwu diyi mwinawu.

⁷⁰Ilaŋa yena hakudikalamu cheŋi. Chihanalehi chanti, antu emenuku hiyakumwila Petulu nawu, Chalala chi, yeyi mwinawu, muloŋa wukaŊaliliya.

⁷¹Ilaŋa yena hakutachika kudishiŋa nikusanyika nindi, Iwu muntu mukutena, ami kwami hinamwilukaku.

⁷²Henohu ikombu edikila nikamuchiyedi. Petulu hakwanuka mazu amwililiyi Yesu nindi, Hakela ikombu kanda edi kili kayedi eyi wakadikalami kasatu. Chatoŋojokeliyi mwenomu hakudila.