Read MUKANDA WANZAMBI Mareka 15 Bible Online

Mareka 15 - MUKANDA WANZAMBI bible

Mareka 15

¹Henohu habudidi awakulumpi jawatupristu, niakulumpi, nawansoneki, nichota chejima, hiyakukwata mpùŋa, hiyakumukasa Yesu, hiyakumutwala nakumuhana kudi Pilatu.

²Pilatu hakumwihula nindi, Yeyi Mwanta wawaYudeya tahindi? Yena hakumwakula nindi, Mwomwenomu muwunahoshi.

³Akulumpi jawatupristu hiyakumwinka nyiloŋa yayivulu.

⁴Pilatu hakumwihula cheŋi nindi, Eyi kwakula nehi? Tiya nyiloŋa yidi nakukwinkawu kuvula!

⁵Ilaŋa Yesu haakwili cheŋuku; Pilatu ahayama nikuhayama.

⁶Ilaŋa hachawija wadiŋi nakuyisubwila muntu wamukaleya wumu akulombawu.

⁷Kwadiŋi muntu wamukaleya wumu ijina dindi Baraba, amushili mukaleya hamu nawantu aleteli njita yakulwa nawakwakuyula ituŋa, hiyakujaha antu.

⁸Izaza hidikuya nakumulomba kulonda ayilili mwayililaŋayi.

⁹Pilatu hakuyakula nindi, Munakeŋi niyisubwili Mwanta wawaYudeya, tahindi?

¹⁰Muloŋa yena welukili nindi awakulumpi jawatupristu anamuheni ichima danatiyuwu.

¹¹Ilaŋa awakulumpi jawatupristu akanjikŋili izaza dawantu nawu alombi kuyisubwila Baraba.

¹²Pilatu hakuyihula cheŋi nindi, Indi iwu mwatenaŋa nenu Mwanta wawaYudeya, nukumwila ŋahi?

¹³Ilaŋa wena hiyakubidika cheŋi nawu, Mupopelenu kukulusu.

¹⁴Pilatu hakuyila nindi, Muloŋanyi? Chuma chatama chanakoŋiyi chumanyi? Ilaŋa wena asweja nikubidika nawu, Mupopelenu kukulusu.

¹⁵Pilatu wakeŋa eli kutiyisha izaza kuwaha, hakuyisubwila Baraba. Chana muvupoliyi Yesu, hakumuhana nindi amupopeli kukulusu.

¹⁶Mashidika hiyakumutwala mwibulu dawu datenaŋawu nawu, Paretoŋya. Hiyakutambika chendu chejima.

¹⁷Hiyakumuvwika ihina dawusombu, hiyakutuŋa chibaaba chanyiŋa, hiyakuchisha kunamutu windi;

¹⁸hiyakutachika kumwimwisha nawu, Kalombu, eyi Mwanta wawaYudeya!

¹⁹Hiyakumweta kunamutu neteti, hiyakumufwŋila mazeŋi, hiyakufukama nakudifukula kudi yena.

²⁰Chanamusehuwu, hiyakumuvúula odu ihina dawusombu, hiyakumuvwika cheŋi mahinindi. Hiyakumutwala nakumupopela kukulusu.

²¹Hiyakukwata muntu wadiŋi nakuhita, yowu Shimona wakuKireni, tata yawaAlesanderi naRufusa, wadiŋi nakufuma mwisaŋa, ayi nawu amusendeluku kulusu yindi.

²²Hiya kumuleta kwatenaŋawu nawu kugologota, chaya mukwila nawu kuChaŋu.

²³Hiya kumwinka vinyu yakubombashana namora; Ilaŋa yena hayi tambwiluku.

²⁴Hiya kumupopela kukulusu; hiya kudi paŋila mahinindi nakudisakwila nachinjikijilu chakutambulawu nachu hamuntu hamuntu.

²⁵Hamupopeleluwu kukulusu hadiŋi haora yamuchisatu.

²⁶Mukanda wamuloŋa windi washiluwu hewulu, asonekeluku nawu, Mwanta wawaYudeya.

²⁷Hiyakupopela atupondu ayedi kumakulusu awu hamu nayena; wumu kuchikasa chindi chachidiilu, mukwawu kuchimunswa.

²⁸Nyikanda yajila yelawu nawu, Amuchindilili kumu nawakwanyiloŋa, yilumbuluka nikulumbuluka.

²⁹Antu adiŋi nakuhita hiyakunamutukola nakumulembola nanyitu yawu nawu, A-a! Eyi wasandaŋa tembeli, hiwukuyituŋa cheŋi mumafuku asatu,

³⁰damwini, sulukaku kukulusu.

³¹Chochimu nawa niakulumpi jawatupristu amuseheli mukachi kawu hamu nawansoneki nawu, Waamwinini akwawu, yomweni hanatweshi kudamwinaku.

³²Mulekenu Kristu Mwanta wawaIsarela asuluki kukulusu katataka, tumoni kulonda twitiyi. Ninawa apopeleluwu kumakulusu hamu nindi amuhosheli chatama.

³³Chiyashikili ora yamuchitanu nayimu, kwikala nimwidima mwituŋa dejima, kushika nikuora yamuchitanu nachiwana.

³⁴Haora yamuchitanu nachiwana Yesu hakubilela nezu daŊovu nindi, Eloyi, Eloyi, lama sabakatani, chaya mukwila nawu, Nzambi yami, Nzambi yami, wunanshiyilidi kanka wami?

³⁵Amakwawu emenuku chanachitiyuwu, hiyakwila nawu, Tiyenu, hakutambika Elija.

³⁶Wumu hakuya lufuchi nakwinzesha siponja nawalwa wabatuka hakuyisha kwiteti, hakumwinka anwi, nindi, Mulekenu tutali neyi Elija wukwinza nakumukulula.

³⁷Yesu hakubidika nezu daŊovu, atula niwumi windi.

³⁸Ijina dakujika mutembeli mwajila ditabuka nihakachi, kufumisha kwiwulu ndo nikwishina.

³⁹Sentuŋinu wemenuku hatalaŋana nayena, chamweniyi chanatuliyi wumi windi chochochu, hakwila nindi, Chalala muntu iwu wadiŋi Mwana kaNzambi.

⁴⁰Kwadiŋi nawa ambanda adiŋi nakutalila hahalehi; hadi wena hadiŋi niMariya Mandaleni, niMariya mama yaYakoba munyanya naYosesi, niSalomi;

⁴¹wowu amulondelaŋa nakumukalakela hadujiyi muŊaliliya, niambanda amakwawu amavulu enjiliyi nawu kuYerusalema.

⁴²Chelili kuneli dehi melela, nanochu chelili hiifuku dakuloŋesha paseka, dodifuku datambikaŋa sabata,

⁴³hikukwinza Yosefu wakuAramateya, muntu walumbwa muchota, niyena wadiŋi nakutalila wanta waNzambi; hakuya mwadiŋi Pilatu chakadi woma, hakulomba mujimba waYesu.

⁴⁴Pilatu hakuhayama nindi, Nafwi dehi? Hakutambika owu sentuŋinu, hakumwihula nindi, Hanafwiyi hanalehi dehi tahindi?

⁴⁵Chanatiyiyi kudi owu sentuŋinu, hakumwinka Yosefu mufu.

⁴⁶Yena hakulanda ihina ditooka, hakumukulula, hakumujiŋajiŋa mwihinodu ditooka, hakumukamika mwijamu dapokolawu dehi mwilola, kuchisu chejamu hakukunku mwinaku ilola.

⁴⁷Mariya Mandaleni niMariya mama yaYosesi amweni kwamukamikiluwu.