Read MUKANDA WANZAMBI Mareka 16 Bible Online

Mareka 16 - MUKANDA WANZAMBI bible

Mareka 16

¹Sabata chiyinahiti, Mariya Mandaleni, niMariya mama yaYakoba, niSalomi, alandili nyitondu yamavumba amawahi, kulonda enzi nakumuwayisha.

²Habudidi yayeni hefuku damulungu damuchimu, hiyakwinza kwijamu itaŋwa datuntuka dehi.

³Hiyakuhoshahosha mukachi kawu nawu, Wukutulaŋumwina ilola difumi kuchisu chejamu hinyi?

⁴Chataliluwu hiyakumona ilola anadilaŋumunuku dehi; muloŋa dadiŋi deneni nankashi.

⁵Chaneŋiluwu mwijamu hiyakumona mukwenzi weyala nashakami kumbadi yachidiilu, navwali chi kovwelu chitooka; hiyakuhayama.

⁶Yena hakuyila nindi, Bayi muhayamaku; mudi nakukeŋa Yesu kaNazareta apopeleluwu kukulusu; wasaŋuka dehi mudi afu; hadi munuku; talenu hamukamikiluwu!

⁷Ilaŋa yenu mwakaleji atumbanji twindi, niPetulu, nenu hakuyaloŋahu dehi kuŊaliliya; diku kumwakamumwena, mwomwayilejelaŋayi.

⁸Hiyakwidikamu, hiyakufuma kwijamu lufuchi, kunayiwani dehi nikuzaala nikuhayama; hiyahosheli chuma namuntuku, muloŋa atiyili woma.

⁹Cheliliyi nasaŋuki dehi habudidi hefuku damulungu damuchimu, wásambilili kumwekana kudi Mariya Mandaleni afumishiliyi ademoni atanu nayedi.

¹⁰Yena hakuya nakuleja adiŋiyi nawu, chadiŋuwu nakuneŋa nikudila.

¹¹Wena chatiyiluwu nawu wamumi, niyena Mariya namumoni dehi, hiyetiyili kwawuku.

¹²Kulondela hayumiyi, amumwekesheli mwacheŋi kudi akwawu ayedi chadiŋi nakufumawu kunanda nakuya kumukala wawu.

¹³Niwena ayili nakuyileja akwawu; hela wena nawa kuyiitiya nehi.

¹⁴Nkumininaku amumwekesheli kudi awenawu ikumi nawumu chashakaminuwu nakudya; hakuyihoshola nansaŋu jantadi jawu nikuchinchika nyichima, nanochu chabuliluwu kwitiya wena amumweni heliliyi Nasaŋuki dehi.

¹⁵Hakuyila nindi, Yenu mumatuŋa ejima ampata yamunu mwishina nakushimuna nsaŋu yayiwahi kudi ejima aleŋawu.

¹⁶Muntu wukwitiya, wukupapatishewa, wakahanda; ilaŋa wukubula kwitiya wakatanya.

¹⁷Tiyenu yinjikijilu yakalondela mudi wena akwitiya chakukuhwelela; akafumisha ademoni mwijina dami; akahosha namadimi amaha;

¹⁸akanyamuna tupela; neyi akanwa yafwana hiyakayikatisha nihantuku; akanaŋika akata makasawu, akakola.

¹⁹Dichi Mwanta Yesu cheliliyi nahoshi dehi nawu, hiyakumutambula mwiwulu, hakushakama kuchikasa chaNzambi chachidiilu.

²⁰Wena hiyakuya nakushimuna kwejima, Mwanta hakukoŋa nawu chimu, hakukolesha mazu nayinjikijilu yalondelumu. Amena.