Read MUKANDA WANZAMBI Mareka 2 Bible Online

Mareka 2 - MUKANDA WANZAMBI bible

Mareka 2

¹Chimwahitili mafuku, wepilili cheŋi muKaperinawu; amutiyili nawu wudi mwitala.

²Kwapompeli antu amavulu, nimwitala mwakaŋenyi mwakushakama, hela muchisu tuhu; hakuhosha nawu mazu.

³Enjili nakumuletela muntu wakata kalepa, anamweleki kudi antu awana.

⁴Chanakaŋanyuwu kushika kwakwihi nayena nansaŋu yezaza, hiyakubutulula hewulu detala dadiŋiyi; chanadilokoluwu, hiyakuzelumuna kadidi kakaminiyi owu wakata kalepa.

⁵Yesu chanamoniyi kukuhwelela kwawu, hakumwila owu wakata kalepa nindi, Eyi mwanami, anakwanakeni nyiloŋa yeyi.

⁶Ilaŋa mwenomu mwashakamini ansoneki amakwawu hiyakudihujola munyichima yawu,

⁷nawu, Iwu muntu nahoshelidi chochichi? Natuki Nzambi. Wukutwesha kwanakena antu nyiloŋa yawu hinyi? Chiŋa yowu Nzambi hohu.

⁸Hohenohu Yesu eluka nimuspiritu yindi chadi nakudihujolawu munyichima yawu; hakuyila nindi, Mukudihujoleladi yumiyi munyichima yenu?

⁹Chaswayi kumwila mukwakalepa nami, Anakwanakeni nyiloŋa yeyi, tahindi kumwila nami, Hindukaku, nyamunaku kadidi keyi, endaku?

¹⁰Ilaŋa nalondi mwiluki nenu Mwana kamuntu wukweti Ŋovu yakwanakena antu nyiloŋa yawu hanu hamaseki; hakumwila owu wakata kalepa,

¹¹nindi, Nakwili nami, hindukaku, nyamunaku kadidi keyi, yaloŋa kweyi kwitala deyi.

¹²Hakunyamuka, hohenohu yonyamuna nikadidi kindi, edika nimwitala iku adi nakumutala wejima wawu. Wejima wawu hiyakuhayama, hiyakulemesha Nzambi nawu, Kanda tuchimonaŋahu dehi chochichuku.

¹³Wayili cheŋi kuchi kumu chejiya; izaza dawantu dejima hidikumupompela, yena hakuyileja.

¹⁴Chahitiliyi, hakumona mwana kaAlafwewu Levi nashakami kwakutambwila nyombu, hakumwila nindi, Nlondaŋa. Niyena hakunyamuka hakumulonda.

¹⁵Chashakaminiyi mwitala dindi nakudya, ansonkeshi amavulu niakwanshidi hiyakushakama hamu naYesu nawatumbanji twindi; muloŋa wenawa amavulu amulondelaŋa.

¹⁶Ansoneki jawaFwarisi chanamumonuwu nakudya hamu nawakwanshidi nawansonkeshi, hiyakuyila atumbanji twindi nawu, Hakudya nakunwa nawansonkeshi niakwanshidi.

¹⁷Yesu chanachitiyiyi hakuyila nindi, Antu akola hiyakeŋakeŋaŋa chimbukuku, chiŋa antu akata; hinenjili nakutambika aloŋaku, chiŋa akwanshidi.

¹⁸Atumbanji twaYowanu nawaFwarisi adiŋi nakujiŋa nakuleka kudya. Antu hiyakwinza nakumwihula nawu, Atumbanji twaYowanu niatumbanji twawaFwarisi ajiŋaŋa nakuleka kudya, hakwila atumbanji tweyi hiyajiŋaŋaku. Chafuma hanka?

¹⁹Yesu hakuyila nindi, Amayala adi nansumbuli atweshi kuleka kudya hachiduwu nansumbuli? Hachiduwu nansumbuli hiyakutwesha kuleka kudyaku.

²⁰Ilaŋa mafuku amba kenza amba kayifumishawu nsumbuli, hefuku odu dihu hamba kajiŋawu nakuleka kudya.

²¹Kwosi muntu wukuchimina chitabu chehina dadiha kuchikovwelu chachikuluku, mukunkulwayi ochu chadiŋi chakujikamu nachu chikutabula dadikulu; dadiha dikutabula dadikulu, chiloku chikusweja kutoha.

²²Kwosi muntu wukuloŋa vinyu yayiha munjeki jayitembi yayikuluku; neyi wukwila chochochu, vinyu yikubuza yitembi, nivinyu niyitembi yikukisika; ilaŋa aloŋaŋa vinyu yayiha munjeki jayitembi yayiha.

²³Sabata yimu wadiŋi nakuhita mumaha atidiku; chadiŋi nakuhitawu atumbanji twindi hiyakutachika kumuna nyitu yatidiku.

²⁴AFwarisi hiyakumwihula nawu, Tala, adi nakwililadi chuma chajila kwila hetaŋwa dasabata?

²⁵Yena hakuyila nindi, Kanda mutaŋaŋahu dehi ochu cheliliyi Davidi habuliliyi yakudya, hatiyiliyi nzala, niyena niantu adiŋiyi nawu?

²⁶Cheŋililiyi mwitala daNzambi hadiŋiyi kapristu muneni Abiyatari, chadiiliyi mankendi akutenteka kumesu aNzambi, ajila kudya antu acheŋi chiŋa atupristu hohu, hakwinkahu ninowu adiŋiyi nawu.

²⁷Hakuyilanindi, Sabata ayililili muntu, muntu hiyamwililili sabataku;

²⁸dichiMwana kamuntu himwanta wasabata nawa.