Read MUKANDA WANZAMBI Mareka 3 Bible Online

Mareka 3 - MUKANDA WANZAMBI bible

Mareka 3

¹Wepilili chenimushikola; mwenomu mwadiŋi muntu wukweti chikasachawulepa.

²Hiyakumutala neyi wukumúuka hasabata, kulonda amwinki muloŋa.

³Hakumwila owu muntu wukweti chikasa chawulepa nindi, Imanaku mukachi.

⁴Hakuyila nindi, Chaloŋa kwila chachiwahi hasabata, tahindi kwila chatama? kuhandisha muntu, tahindi kumujaha? Wena hiyakumwena zo.

⁵Chanayitaliyi wejima wawu kwi-ndo nakuzuwa, hakuneŋa chachinchikili nyichima yawu; hakumwila owu muntu nindi, Ololaku chikasa cheyi. Hakucholola, chikola nikukola.

⁶AFwarisi hiyakwidika, hohenohu hiyakukwata nimpùŋa nawaHerodi nawu, Tukumukisanana ŋahi?

⁷Yesu hakufumaku nawatumbanji twindi, hiyakuya kwijiya; kwamulondeli izaza deneni dafumini kuŊaliliya, nikuYudeya,

⁸nikuYerusalema, nikuEdomi, nikwishinadi daYodana, nikuTira naZidoni; izaza dadeni chidinatiyi yuma yamaneni yeliliyi, hidikwinza kudi yena.

⁹Hakuhosha nawatumbanji twindi, nindi amushili kawatu kanyanya kwakwihi, kuchina izaza kumuhumahuma;

¹⁰muloŋa woka dehi amavulu, dichi ejima adiŋi nanyisoŋu hiyakudishinjekela hadi yena kulonda amukunki.

¹¹Niademoni azonda chanamumonuwu, hiyakudinata hamaseki kumesu indi, hiyakubilela nawu, Eyi wuMwana kaNzambi.

¹²Hakuyihoshola naŋovu nindi, Bayi mwakantiyakeshaku.

¹³Hakukanauka hampidi, hakutambika akeŋeliyi yomweni; hiyakuya kudi yena.

¹⁴Hakutondahu ikumi nayedi kulonda ekalaŋa nindi, akayitemeshaŋa nakushimuna,

¹⁵akaheti Ŋovu yakufumisha ademoni.

¹⁶Shimona hakutumba ijina di kwawu nindi, Petulu;

¹⁷ni mwana kaZebedewu Yakoba, nimana kwaYakoba Yowanu, wenawa wayitumbili ijina di kwawu nindi, Bowaneji, daya mukwila nawu anyana kachivumina chanvula;

¹⁸niAnderi, niFwilipu, niBatolomewu, ni Matewu, niTomasi, ni mwana kaAlafwewu Yakoba, niTadewu, nikaKenani Shimona,

¹⁹niYudasi Isakaroti, diyi wamufukejeli nawa. Hakwijila nimwitala.

²⁰Hikukupompa cheŋi izaza dakukaŋanya wena kumona nihakudiila.

²¹Awusoku windi chanachitiyuwu hiyakuyaku nawu amukwati, muloŋa elili nawu, Naandali.

²²Niansoneki afumini kuYerusalema elili nawu, Wukweti Belezebuli; nawu, Wudi nakufumisha ademoni naŋovu jamwanta wawademoni.

²³Hakuyitambika, hakuyila nayishimu nindi, Satana wukutwesha kufumisha Satana nindi ŋahi?

²⁴Neyi wanta wukudambula, wantowu hiwukutwesha kukolaku.

²⁵Neyi itala dikudambula italodu hidikutwesha kukolaku.

²⁶Neyi Satana wukudilukuka yomweni hakudambula, hakutwesha kukolaku, jikumukuma.

²⁷Muntu kutwesha kwijila mwitala damukwaŋovu nakubuwa yuma yindi, chiŋa yosambila kumukasa owu mukwaŋovu, nkumininaku hakubuwa mwitala dindi.

²⁸Nukuyileja chalala nami, nyiloŋa yawanyana kawantu yejima akayanakenayu, nimatukawu atukaŋawu Nzambi;

²⁹kwinza muntu wukutuka Spiritu Wajila, hamba kamona kumwanakenaku, nahi namuloŋa wahaya nyaka;

³⁰nanochu cheliluwu nawu, Wukweti demoni wazonda.

³¹Mama yindi nawana kwindi hiyakwinza nakwimana hanzi, hiyakumutemeshela muntu wakumutambika.

³²Izaza dawantu dashakamini nakumuwuŋila, hiyakumwila nawu, Tala, mama yeyi nawana kweyi adi hanzi, anakukeŋi.

³³Hakuyakula nindi, Mama yami hinyi? Ana kwami anyi?

³⁴Hakutala antu ashakamini nakumuwuŋila nindi, Talenu mama yami nawana kwami.

³⁵Muloŋa muntu wukwila mwaya muchima waNzambi, diyi mana kwami, diyi muhelami, diyi mama yami.