Read MUKANDA WANZAMBI Mareka 4 Bible Online

Mareka 4 - MUKANDA WANZAMBI bible

Mareka 4

¹Hakutachika cheŋi kuyileja kuchi kumu chejiya. Kwamupompeleli izaza deneni nankashi, dichi yena hakwijila muwatu, hakushakama muwatumwijiya; izaza dejima hidikwikala kuchi kumu kwakwihi nejiya.

²Hakuyileja yuma yayivulu nayishimu.

³Mukuleja kwindi wayilili nindi, Tiyililenu. Talenu, mukwakukuwa wayili nakukuwa.

⁴Chakuwiliyi, jikwawu jaholokeleli kunsa yanjila, atujila hiyakwinza nakujidya.

⁵Jikwawu jaholokeleli hamalola habulili maseki amavulu, jibaluka nihohenohu, muloŋa habulili maseki amavulu kwishina;

⁶itaŋwa chidinashiki mwiwulu hijikubabika, hijikuuma, muloŋa jabulili nyiji.

⁷Jikwawu jaholokeleli mukachi kanyiŋa, oyu nyiŋa hiyikukula, hiyikujika mbutu, hijasoŋeluku.

⁸Jikwawu jaholokeleli hamaseki amawahi, hijikusoŋa nakukula nakusemunwina; jasoŋeli jikwawu makumi asatu, jikwawu makumi atanu nadimu, jikwawu nkulakaji.

⁹Hakuyila nindi, Yowu wukweti matu akutiya, atiyi.

¹⁰Chadiŋiyi kanka windi, owu adiŋiyi nawu niikumi nayedi, hiyakumwihula mwaya oyu yishimu.

¹¹Hakuyila nindi, Enu anayinki nsaŋu yawanta waNzambi yajindawu, hakwila awa adi hanzi ayililaŋa yuma yejima muyishimu;

¹²kulonda kumona akamona, akabuli kushinshika; kutiya akatiya, akabulikwiluka; kuchina akubalumuka cheŋi hiyakuyanakena.

¹³Hakuyila nindi, Chishimu ichi himunachilukuku? Indi mwakeluka ŋahi yishimu yejima?

¹⁴Mukwakukuwa wakuwaŋa mazu.

¹⁵Awa adi kunsa yanjila kwanakuwuwu mazu, wowu akwila chanatiyuwu, hohenohu Satana hakwinza nakufumisha mazu anakuwuwu mudi wena.

¹⁶Chochimu ninawa anakuwuwu hadi malola, wowu akwila chanatiyuwu mazu, hiyakuyitambula namuzaŋalu hohenohu.

¹⁷Mudi aweni muji mwosi, ilaŋa akukakelamu chantesha; nkumininaku chikukwinza yihuŋu, hela kuyikabishila nsaŋu yamazu, hiyakudimbuka hohenohu.

¹⁸Amakwawu anakuwuwu munyiŋa, wowu akutiya mazu;

¹⁹kwakama kwamakonu, nikudimbana kwamaheta, nikufwila yuma yi kwawu, hikukwijila mu, hikukuvumbisha mazu, hiyákubula kusoŋa.

²⁰Awa akuwiluwu hamaseki amawahi, wowu akutiya mazu, hiyakuyitambula, hiyakusoŋa wa makumi asatu, awa makumi atanu nadimu, awa nkulakaji.

²¹Hakuyila nindi, Inoŋu adiletaŋa kulonda adisweki mwibaŋu hela muchalilu, tahindi? Hiyalondaŋa kudisha hamesaku?

²²Muloŋa hikwekala chuma chakusweka nichimu, chakabula kumwekeshawuku; hikwekala chuma chakujinda nichimu, chakabula kwidika hatookaku.

²³Muntu wukweti matu akutiya, atiyi.

²⁴Hakuyila nindi, Babelenu yimukutiya; chesekelu chimukwesekela akwenu dichi chakayesekelawu ninenu, ayishilaku nikuyishilaku.

²⁵Muloŋa wukweti akamwinka; wabula akamutambula ninaka kadiyi naku.

²⁶Hakwila nindi, Wanta waNzambi wudi neyi muntu wukukuwa mbutu heseki;

²⁷hakukama, hakuhinduka, niwufuku nimwaana, mbutu hijikubaluka, hijikukula, yena kwiluka mujinakulili nehi.

²⁸Maseki adisoŋeshelaŋa awenawu; kusambila mbali, kulondelamu nyitu, kukuminina hitidiku yayeni munyitu.

²⁹Ilaŋa mbutu chikwiha, hakutwalamu chikwakwa, muloŋa chilaaka chakwaŋula chinashiki dehi.

³⁰Hakwila nindi, Wanta waNzambi tukuwufwikŋa neyi chumanyi? Indi tukuwushimuna nachishimwinyi?

³¹Wudi neyi kalubutu kamostadi, kelaŋa chakukitumbawu heseki, hela kabadika kukeha hambutu jamunu mwishina jejima,

³²chakukitumbawu, hikakukula, hikakutoha chakubadika yisakola yejima, hikakwila ninyitayi yamaneni yakwila atujila ahaluzwizu hiyakushakama muwulelu wayu.

³³Wayilejelaŋa mazu nayishimu yayivulu yidi neyi iyi, mwatwesheli kutiyilawu.

³⁴Hahosheli nawu chakadi chishimuku; ilaŋa atumbanji twindi wadiŋi nakuyilumbulwila yuma yejima kumbadi.

³⁵Dena ifuku odu, chikuneli melela, hakuyila nindi, Tuzambukenu kwishinadi.

³⁶Hiyakushiya izaza dawantu, hiyakumutwala tuhu muwatu choche nochu. Wayili namaatu amakwawu nawa.

³⁷Hikukwinza mpepela yeneni nankashi, mankanda hiyakusumpokela muwatu, watu hiwukukeŋa nikwinzala.

³⁸Yomweni wadiŋi kuntoŋi yakunyima, nakami tulu hamusawu. Hiyakumuhindwisha nawu, Eyi Nkuluŋaŋa, hiwunaakami chitukujilumukaku?

³⁹Hakuhinduka, hakuhoshola mpepela, hakumwila ŋiya nindi, Mwenaku, wundaku zo. Nimpepela swi-i, kumwena ninankashi zo.

⁴⁰Hakuyila nindi, Munatiyi woma wanka? Kanda mukuhweleli nihanu?

⁴¹Hiyakutiya woma nankashi, hiyakudila muntu namukwawu nawu, Indi iwu dinu hinyi mwaka amwovwahili nikudi mpepela nikudi meji?