Read MUKANDA WANZAMBI Mareka 5 Bible Online

Mareka 5 - MUKANDA WANZAMBI bible

Mareka 5

¹Hiyakushika kwishinadi dejiya mwituŋa dawaGeraseni.

²Chanafumiyi muwatu, hohenohu hakumubulakana muntu wudi nakufuma mumalalu, wazakukaŋa demoni wazonda,

³washakaminaŋa kumalalu. Antu ejima amukaŋanya dehi kumukasa, hela neleŋi kumutwesha nehi;

⁴muloŋa mukasa dehi kakavulu natuyanda nimaleŋi; maleŋi wayikotoleli kotu kotu, tuyanda watubalwili balu balu; hikwadiŋi muntu wadiŋi naŋovu jakumufwomonaku.

⁵Wadiŋi nakubilela mafuku ejima, niwufuku nimwaana, nikumalalu nikumapidi, nakudisupola namalola.

⁶Chanamumoniyi Yesu kwakulehi hakuyaku lufuchi, hakudifukula kudi yena,

⁷hakubilela nezu daŊovu nindi, Eyi Yesu, Mwana kaNzambi Mukwakubadika, ni kweti nsaŋwinyi naneyi? Nakwili mwijina daNzambi, nami bayi wunkabishaku.

⁸Muloŋa Yesu namwili dehi nindi, Eyi demoni wazonda, fumaku mudi muntu.

⁹Hakumwihula nindi, ijina deyi yeyinyi? Yena nindi, ijina dami yami Lejiyoni, muloŋa tudi amavulu.

¹⁰Hakumulembelela nankashi nindi, Bayi wuyitemuna neyi afumi mwituŋaku.

¹¹Henohu kumbavu yampidi kudi izanvu dawaŋulu dadeni adi nakudya.

¹²Hiyakumulembelela nawu, Tutemeshi tuyi mudi aŋulu, kulonda twiŋilumu.

¹³Hakuyi iteja. Owu ademoni azonda hiyakufuma, hiyakwijila mudi aŋulu; izanvu hidikwanduka hidikukunkumukila mwakunama nankashi, nimwijiya chu-u, afwili mwijiya. Adiŋi kwiji neyi makombakaji ayedi.

¹⁴Antu ayidiishilaŋa hiyakutemuka, hiyakuchishimununa mumukala nimwisaŋa. Hiyakwinza nawu amoni chuma chaneluwu.

¹⁵Hiyakushika kudi Yesu, kumuwana owu wazakukilaŋa ademoni nashakami navwali chachiwahi, maanindi anamuwani dehi, yoyenowu wadiŋi nalejiyoni; atiya niwoma.

¹⁶Antu achimweni hiyakuyileja chamwililuwu owu muntu wazakukilaŋa ademoni, ninsaŋu yawaŋulu.

¹⁷Hiyakutachika kumulembelela nawu afumi mwituŋa dawu.

¹⁸Chakeŋeliyi kwijila muwatu, yenowu wadiŋi nakuzakuka ademoni hakumulembelela nindi ekali chimu nindi.

¹⁹Ilaŋa yena kumwiteja nehi. Hakumwila nindi, Yaŋa kwitala deyi kudi akwenu wuyileji yuma yanakwililiyi Mwanta kutoha, nichanakutiyiliyi luwi.

²⁰Hakuya kwindi, hakutachika kushimuna kuDekapoli yuma yanamwililiyi Yesu kutoha; antu ejima hiyakuhayama.

²¹Yesu chanazambukiyi cheŋi kwishinadi muwatu, hikukumupompela izaza dawantu dadeni. Yena wadiŋi kwakwihi nejiya.

²²Hikukwinza nyuli yashikola wumu, ijina dindi Jayirusa; chanamumoniyi, hakudinata kunyendu yindi,

²³hakumulembelela nankashi nindi, Mwanami wamumbanda wanyanya keŋa afwi; nalembi nami winzi mwani, wumunaŋiki makaseyi kulonda akoli, ahandi.

²⁴Hakuya nindi; izaza dawantu dadeni hidikumulonda, hidikumuhumahuma.

²⁵Mumbanda wumu wapwekelaŋa mashi nyaka ikumi nayiyedi,

²⁶henohu wamona dehi kukala nayuma yayivulu yanamoniyi kudi ayimbuki amavulu, namanishi dehi yuma yindi yejima to-o, kuditiyaku nihanti nehi, yosweja nikusweja;

²⁷chanatiyiyi nsaŋu yaYesu, hakwinza munyima yindi mwizaza, hakukunka kwihina dindi.

²⁸Muloŋa welili nindi neyi nukukumina dakukunka kumahinindi nukukola.

²⁹Hohenohu hapwekelaŋa mashi homa nichau; hakutiya mumujimba windi musoŋu wunamufumi dehi.

³⁰Hohenohu Yesu eluka nikwiluka chinafumi Ŋovu mudi yena, hakushetumuka mwizaza nindi, Nakunki kumahinami hinyi?

³¹Atumbanji twindi hiyakumwila nawu, Wunamoni izaza didi nakukuhumahuma, wili neyi nankunki hinyi?

³²Hakutala niniku niniku amoni muntu neli chumochu.

³³Ilaŋa yena mumbanda hakutiya woma nikuzaala, neluki dehi chuma chanamwiliyi; hakwinza nakudinata hamaseki kumesu indi, hakumuleja nsaŋu yejima.

³⁴Yesu hakumwila nindi, Eyi mwanami, kukuhwelela kweyi kunakukoleshi dehi; yaloŋa nakuwunda, musoŋu weyi wukufumi.

³⁵Iku wuchidi kuhosha, antu hiyakufuma kwitala danyuli yashikola nawu, Mwaneyi wamumbanda nafwi dehi, wukumukabishiladi nawa Nkuluŋaŋa?

³⁶Ilaŋa Yesu chanatiyiyi mazu anahoshuwu, hakumwila nyuli yashikola nindi, Bayi wutiya womaku, kumina dakukuhwelela hohu.

³⁷Hetejeli muntu kumulondaku, chiŋa aPetulu naYakoba nimana kwaYakoba Yowanu.

³⁸Hiyakushika kwitala danowu nyuli yashikola, hakumona antu adi nakuleta ipumba, hiyakudila nakutumpa chacheni.

³⁹Chanepiliyi mwitala, hakuyila nindi, Mudi nakuleteladi ipumba nikudila? Mwana hanafuku, nakami tulu.

⁴⁰Hiyakumuseha. Yena chanayiidishiyi wejima wawu, hakutwala tata yamwana nimama yindi ninawa adiŋiyi nawu, hakwijila mwadiŋiyi owu mwana.

⁴¹Hakumukwata mwana kuchikasa, hakumwila nindi, Talita kumi; chaya mukwila nawu, Eyi mwana, nakwili nami hindukaku.

⁴²Hohenohu owu mwana yohinduka nikuhinduka, hakwenda; Muloŋa wadiŋi wanyaka ikumi nayiyedi. Hohenohu ahayama nikuhayama kwasweja.

⁴³Hakuyikaanda nankashi, nindi bayi achiluka kudi muntuku; hakuyileja nindi, Mwinkenu yakudya.