Read MUKANDA WANZAMBI Mareka 6 Bible Online

Mareka 6 - MUKANDA WANZAMBI bible

Mareka 6

¹Wafumini kwenoku, hakuya kwituŋa dindi yomweni; atumbanji twindi hiyakumulondela.

²Sabata chiyinashiki, hakutachika kulejaantu mushikola; antu amavulu chanamutiyuwu hiyakuhayama nawu, Muntu iwu nawani yumiyi kudihi? Indi maanawa anamwinkuwu muntu iwu anka? Indi nyidimu yaŋovu yishikaha yakukoŋayi namakasindi yaya mudihi?

³Hidiyi mukwakusona mapitu, mwana kaMariyaku? Hidiyi mana kwaYakoba naYosesi naYuda niShimonaku? Ahelindi hitudi nawu kunuku? Amweni mudi yena chuma chakuyidimbwisha.

⁴Yesu hakuyila nindi, Kaprofwetu hiyamudiwulaŋaku, kumudiwula chiŋa mwituŋa dindi yomweni, nikudi awusoku windi, nimwitala dindi.

⁵Kwenoku wakaŋenyi kwila nyidimu yaŋovu, wakuminini dakunanika makasindi hadi antu akata antesha hakuyikolesha.

⁶Wahayamini chabuliluwu kwitiya. Wendoleli munyikala yakwenoku nakuleja antu.

⁷Watambikili owu ikumi nayedi, hakutachika kuyitemesha munyikala, ayedi ayedi; hakuyinka Ŋovu yansaŋu yawademoni azonda.

⁸Hakuyileja nindi, Bayi musenda yuma yakuya nachu munjilaku, chiŋa kwambwechi hohu; yakudya nehi, ipakumuna nehi, mali muchikwama nehi;

⁹Ilaŋa vwalenu nkwabilu; bayi muvwala yi kovwelu yiyeduku.

¹⁰Hakuyila nindi, Kwejima kumukuya mwakashakama mwitala dimwakashikena, kufumamu chiŋa himukunyamuka.

¹¹Mukala wukubula kuyitambula, hela kuyitiya, chimukufumamu mukuditotomona lunkuŋu ludi kumadachilu enu, kulonda kuyikonkolola nachu.

¹²Hiyakuya, hiyakushimuna nawu, Balumukenu mumuchima.

¹³Hiyakufumisha ademoni amavulu; hiyakuwayisha manji antu amavulu adiŋi akata, hiyakuyikolesha.

¹⁴Mwanta Herodi hakuchitiya, muloŋa ijina dindi dinatiyakani dehi; hakwila nindi, Yowanu Mpapatishu nasaŋuki dehi mudi afu, dihu hanafumi kukoŋa nyidimu iyi yaŋovu mudi yena.

¹⁵Ilaŋa makwawu nawu diyi Elija. Amakwawu nawu hikaprofwetu, wudi neyi kaprofwetu wumu.

¹⁶Ilaŋa Herodi chachitiyiliyi, nindi Yowanu naketwili namutu diyi Nasaŋuki dehi.

¹⁷Muloŋa yomweni Herodi diyi watemesheli antu, nindi akwati Yowanu amushi mukaleya hansaŋu yaHerodiya, iŋodamana kwindi Fwilipu anasumbuliyi.

¹⁸Muloŋa Yowanu wamwilili Herodi nindi, Kusumbula iŋodamana kweyi chinjila.

¹⁹Herodiya hakumushila nkunyi, hakukeŋa kumujaha, Ilaŋa kutwesha nehi;

²⁰Muloŋa Herodi wamutiyili Yowanu woma, welukili nindi hiiyala waloŋa, wajila; hakukumina dakumuhemba chachiwahi. Chamutiyiliyi hakujinoka nankashi; hakutiya kuwaha kumutiya.

²¹Ifuku dadiwahi chidinashiki, Herodi hakuteleka chawija chakudiisha ayilolu jindi nawawakulumpi anjita amaneni nawantu alemena muŊaliliya, ifuku dakwanuka kuvwalika kwindi.

²²Mwana kayomweni Herodiya wamumbanda, cheŋililiyi nakuhaŋana hakumutiyisha Herodi kuwaha, hamu nanowu ashakaminiyi nawu nakudya. Mwanta hakumwila owu chaŋadima nindi, Nlombi yuma yejima yiwunakeŋi nikwinki.

²³Hakumusanyikila nindi, Yuma yejima yiwukunlomba nukukwinkayu, hela kukubalwila wanta wami hakachi.

²⁴Hakwidika hakuya nakwihula mama yindi nindi, Nukulombadi? Yena nindi, Lombaku neyi, Nyinki namutu waYowanu Mpapatishu.

²⁵Henohu eŋila nimudi mwanta lufuchi, hakulomba nindi, Nakeŋi wunyinki katataka namutu waYowanu Mpapatishu hacheŋa.

²⁶Mwanta hakuneŋa nankashi; ilaŋa ochu cheliliyi yena nasanyiki dehi, nichamweniyi owu anashakami nakudya, hamweni hakumukanishilaku.

²⁷Hohenohu mwanta atemesha niishidika wahadi awa amuhembelaŋa, hakumuleja nindi, Letaku namutu windi. Dichi hakuya, hakumuketula namutu windi omu mukaleya.

²⁸Hakuleta namutu windi hacheŋa, hakumwinka chaŋadima, chaŋadima hakumwinka mama yindi.

²⁹Atumbanji twindi chanachitiyuwu, hiyakuya nakunona chivuvuma chindi, hiyakuchiika mwijamu.

³⁰Apostolu hiyakupompela kudi Yesu; hiyakumuleja yuma yejima, niyeliluwu niyadiŋi nakulejawu antu.

³¹Yena hakuyila nindi, Inzenuŋa enu aweni kwakanka wenu mwisaŋa, munookuhu chanti. Muloŋa kwadiŋi antu amavulu, awa nakwinza, awa nakuya, hiyamweni hela hakudiilaku.

³²Dichi hiyakufuma kwenoku muwatu, hiyakuya mwisaŋa mwakanka wawu.

³³Chayilaŋawu ochu, antu adiŋi nakuyimona, amavulu elukili, hiyakufuma munyikala yejima, hiyakuyaku lufuchi hamaseki, hiyakuyaloŋahu dehi.

³⁴Yesu chanedikiyi muwatu, hakumona izaza deneni, hakuyitiyila wushona muloŋa adiŋi neyi anyikoku akadi kabiŋa; hakutachika kuyileja yuma yayivulu.

³⁵Chelili itaŋwa hidikuya nakuteŋuluka, atumbanji twindi hiyakwinza kudi yena nawu, Munu mwisaŋa itaŋwa dahita dehi;

³⁶yimwaŋi antu ayi mumaha nimunyikala yanyeŋumukaku, akadipawili yakudya yawu.

³⁷Ilaŋa yena hakuyakula nindi, Enu aweni yinkenu yakudya. Wena hiyakumwila nawu, Tuyi nakulanda mankendi amali makulakaji ayedi twakayinki adiyi, tahindi?

³⁸Hakuyihula nindi, Mukweti mankendi aŋahi? yenu mutali. Chanelukuwu hiyakwila nawu, Atanu, ninshi jiyedi.

³⁹Hakuyileja nindi antu ejima ashakami hamatahu atuuta, izanvu aha, izanvu aha.

⁴⁰Hiyakushakama nyikuku yankulakaji niyamakumi atanu.

⁴¹Hakutambula owu mankendi atanu ninoju inshi jiyedi, hakutala mwiwulu, hakukisula nkisu, hakuyinka atumbanji ayinki antu, ninoju inshi jiyedi hiyakuyanjaŋena wejima wawu.

⁴²Wejima wawu adiili ekutili.

⁴³Hiyakunonahu yibalu ikumi damabaŋu namabaŋu ayedi ambe, ninshi nawa.

⁴⁴Antu adiili mankendi adiŋi amayala makombakaji atanu.

⁴⁵Henohu hakukanjikŋa atumbanji twindi nindi epili muwatu, ayaloŋahu dehi kwishinadi kuBeteseda, hadiŋi yi wuchidi kwendesha antu ayi kwawu.

⁴⁶Cheliliyi nadishaliki dehi nawu, hakufumaku, hakuya hampidi nakulomba.

⁴⁷Chikuneli melela, watu hiwudi mukachi kejiya, yena kanka windi kumpata.

⁴⁸Chanayimoniyi adi nakukabakana nakuvuwa, Muloŋa mpepela yadiŋi nakufuma kwakuyawu, hakuya kudi wena nakwenda hewulu dameji, chikuneli neyi himuchilu chawufuku chamuchiwana; hakwila neyi wukukeŋa kuyipandakana.

⁴⁹Ilaŋa wena chamumwenuwu nakwenda hewulu dameji, hiyakutoŋojoka nawu himuŋamu, hiyakukaloka;

⁵⁰muloŋa amumweni wejima wawu, hiyakwakama. Ilaŋa yena hakuhosha nawu hohenohu, hakuyila nindi, Tiyenu kuwaha, yami; bayi mutiya womaku.

⁵¹Hakukandama muwatu mwadiŋuwu, mpepela yimwena nikumwena; wenahiyakuhayama nankashi munyichima yawu;

⁵²muloŋa abulili kwiluka mwayili nsaŋu yamankendi, nyichima yawu yachinchikili.

⁵³Chanazambukuwu hiyakushika kwituŋa daGenesareta, hiyakukuŋika watu kuchi kumu.

⁵⁴Chanafumuwu muwatu, hohenohu antu amwiluka nikumwiluka.

⁵⁵Hiyakuya lufuchi kumutamba wejimowu ndo, hiyakutachika kweleka akata hatudidi twawu, hiyakuyitwalatwala kwamutiyiluwu.

⁵⁶Mwayilaŋayi mwejima, hela munyikala yanyanya, hela munyikala yamaneni, hela mwisaŋa, hiyakutenteka akata kuwulandilu, hiyakumulembelela nawu akumini dakukunka hela kumukundulu wehina dindi; antu ejima amukunkili akoleli.