Read MUKANDA WANZAMBI Mareka 7 Bible Online

Mareka 7 - MUKANDA WANZAMBI bible

Mareka 7

¹AFwarisi nawansoneki amakwawu afumini kuYerusalema hiyakumupompela.

²Amweni atumbanji twindi adi nakudya yakudya yawu namakasa amajilu, wowu makasa akadi kwisuka.

³Muloŋa aFwarisi nawaYudeya ejima, kudya chiŋa esuka kumakasawu chalala, enda ahemba chaaku chawawakulumpi.

⁴Elaŋa chakufumawu kuwulandilu, kudya chiŋa awela. Kudi niyuma yi kwawu yayivulu yanatambuluwu kuhemba, yakukosa mpasa namamiŋu niyuma yawuneŋu.

⁵AFwarisi nawansoneki hiyakumwihula nawu, Atumbanji tweyi alekelaŋadi kwenda mwaya chaaku chawawakulumpi, chadyaloŋawu yakudya yawu namakasa amajilu?

⁶Hakuyila nindi, Komana mwaprofweteliyi Isaya chayiteneniyi enu anfwikiji mwalala, ichi chanasonekuwu nawu, Antu awa anlemeshaŋa nanyivumbu yawu, ilaŋa nyichima yawu yidi kwakulehi nanami.

⁷Komana chadifukulaŋawu kudami, hikudifukula kwamukunkulwayi, chalejaŋawu yijila yawantu.

⁸Mwalekaŋa kuleja kwaNzambi, himukukakela chaaku chawantu.

⁹Hakuyila nindi, Chalala mwenda muleka kuleja kwaNzambi kulonda muhembi chaaku chenu.

¹⁰Muloŋa Mosi welili nindi, Lemeshaku tata yeyi namama yeyi; nindi, Muntu wukutena tata yindi hela mama yindi chatama, chalala akafwi hohu.

¹¹Hakwila enu nenu, Neyi muntu wukumwila tata yindi hela mama yindi nindi, Ichi chadiŋi chakukukwashaku nachu chinekali dehi Korabani, chaya mukwila nawu nachinki dehi Nzambi;

¹²himukumulekesha kumwilila tata yindi hela mama yindi chuma;

¹³mwenda mupepesha mazu aNzambi nachaaku chenu chimunaleji antu. Himukwila niyuma yi kwawu yidi neyi iyi.

¹⁴Hakutambika cheŋi izaza dawantu, hakuyila nindi, Ntiyililenu wejima wenu mushinshiki.

¹⁵Hikudi chuma chafumaŋa hanzi yamuntu cheŋilaŋa mudi yena chikutwesha kumutamishaku; yuma yikufuma mudi muntu diyi yikumutamisha.

¹⁶Muntu wukweti matu akutiya, atiyi.

¹⁷Chanashiyiyi izaza dawantu, hakwijila mwitala, atumbanji twindi hiyakumwihula chishimu ichi.

¹⁸Hakuyila nindi, Ninenu nawa saŋa mwayambila tahindi? Mweluka dehi yuma yafumaŋa hanzi yeŋilaŋa mudi muntu hiyatweshaŋa kumutamishaku.

¹⁹Muloŋa hiyeŋilaŋa mumuchima winduku, yeŋilaŋa kwamwivumu hohu, yafumaŋamu yayaloŋa mumpata. Watookesheli nachu yakudya yonsu.

²⁰Welili nindi, Chuma chafumaŋa mudi muntu dichi chatamishaŋa muntu.

²¹Muloŋa mukachi, mumuchima wamuntu, dimu mwafumaŋa yitoŋojoka yatama, nikubajama,

²²niwukombi, niwubanji, niwuvumbi, nilwisu, nikwila yatama, nimakasu, nikufwila yatama, nidisu datama, nikutukana, nikudinka wanta, niwusupi.

²³Yuma yatama yejimiyi yafumaŋa mukachi, diyi yatamishaŋa muntu.

²⁴Hakunyamuka kwenoku, hakuya kumutamba waTira naZidoni. Hakwijila mwitala dimu, hakeŋeli muntu kuchilukaku, ilaŋa kutwesha kumusweka nehi.

²⁵Kwadiŋi mumbanda wumu wadiŋi namwanindi wamumbanda wanyanya wazakukaŋa demoni wazonda, chanamutiyiyi, hohenohu hakwinza nakudinata kunyendu yindi.

²⁶Mumbandowu wadiŋi kaHeleni, wakumuza waSirofwenisa. Hakumulembelela nindi afumishi demoni mudi mwanindi.

²⁷Yena hakumwila mumbanda nindi, Yileki anyana asambili kwikuta; hichinawahi kunona mankendi awanyana nakunatila tutuwaku.

²⁸Mumbanda hakumwakula nindi, Eŋa Mwanta, hela tutuwa ekalaŋa mwishina damesa adyaloŋa nkúuku jawanyana.

²⁹Yena hakumwila mumbanda nindi, Ochu chiwunahoshi ochu yaloŋa kweyi; demoni nafumi dehi mudi mwaneyi.

³⁰Owu mumbanda hakuya kwitala dindi hakuwana mwanindi nakami dehi hakadidi, demoni nafumi dehi mudi yena.

³¹Hakufuma cheŋi kuŋinza jaTira, hakuhita muZidoni; chanahitiyi mukachi ketuŋa daDekapoli, hakushika kwijiya daŊaliliya.

³²Hiyakumuletela muntu wajika matu wakukumaŋa; hiyakumulembelela nawu amunaŋiki chikasa.

³³Yena hakumufumisha mwizaza dawantu, hakumutwala kumbadi kwakanka wawu, hakwiŋija nyinu mumatu indi, hakufwija mazeŋi, hakukunka idimi dindi;

³⁴hakutala kwiwulu, hakudishishimuna, hakumwila nindi, Efwata; chaya mukwila nawu, Jikukaku.

³⁵Matu indi ajikuka nikujikuka, kalaka kindi kaketuka nikuketuka, hakuhosha chalumbuluka.

³⁶Yesu hakuyikaanda nindi, Bayi muleja muntuku. Chaswejehyi kuyikaanda, wena asweja nikuchishimununa nankashi.

³⁷Hiyakusweja kuhayama nankashi nawu, Neli yuma yejima chachiwahi hohu; hela wajika matu hakumutiyisha; hela kamama hakuiruhoshesha.