Read MUKANDA WANZAMBI Mareka 8 Bible Online

Mareka 8 - MUKANDA WANZAMBI bible

Mareka 8

¹Hamafuku owu chikwadiŋi cheŋi izaza dawantu deneni, chiyabulili yakudya, hakutambika atumbanji twindi,

²nindi, Natiyili izaza dawantu wushona, muloŋa anashakami dehi nanami mafuku asatu, hiyakweti yakudyaku.

³Neyi nukuyila nami ayi kunyikala yawu nanzala akufwa chinzeya munjila; muloŋa amakwawu afuma kwakulehi.

⁴Atumbanji twindi hiyakumwakula nawu, Mankendi akwikutisha wenawa munu mwisaŋa akufumahi?

⁵Hakuyihula nindi, Mukweti mankendi aŋahi? Nawu, Atanu nayedi.

⁶Hakuleja izaza nindi ashakami heseki; hakutambula owu mankendi atanu nayedi, hakusakilila, hakuhumuna hakwinka atumbanji twindi ayinki; wena hiyakwinka izaza.

⁷Adiŋi natunyisaŋi twanyanya twantesha, hakutukiswila nkisu, hakuyileja nindi yinkenu nitwenitu nawa.

⁸Hiyakudya, hiyakwikuta. Hiyakunona yibalu yasheluhu yimpaya yitanu nayiyedi.

⁹Antu ashikili neyi mumakombakaji awana; hakuyila nindi ayi kwawu.

¹⁰Hohenohu eŋila nimuwatu hamu nawatumbanji twindi, hakuya kumutamba waDalamanuta.

¹¹AFwarisi hiyakwinza, hiyakutachika kutadika nindi, hiyakukeŋa kumona kudi yena chinjikijilu chamwiwulu, adiŋi nakumweseka.

¹²Hakudishishimuna nankashi muspiŋtu yindi nindi, Antu achisakichi anakeŋelidi chinjikijilu? Nukuyileja chalala nami, antu achisakichi hiyakuyileja chinjikijiluku.

¹³Hakuyishiya, hakwijila cheŋi muwatu, hakufumaku, hakuya kwishinadi.

¹⁴Avulameneni kusenda mankendi; muwatu mwadiŋi kwadinkendi dimu hohu.

¹⁵Hakuyikaanda nindi, Shinshikenu mubabeli iluŋi dawaFwarisi niiluŋi daHerodi.

¹⁶Hiyakudihujola nawu chochitunabuli mankendi tahindi?

¹⁷Yesu chanachishinshikiyi, hakuyila nindi, Mwenda mudihujoleladi nenu chochitunabuli mankendi? Nihanu kanda mushinshiki, kanda mwiluki? Nyichima yenu saŋa yachinchikila?

¹⁸Mesu mukweti, himwamonaŋaku? Matu mukweti, himwatiyaloŋaku? Himwaanukaŋaku?

¹⁹Awa makombakaji atanu, chinayihumwinini mankendi atanu, mwanonenuku mabaŋu aŋahi enzala yibalu? Hiyakumwila nawu, Ikumi nayedi.

²⁰Indi ana makombakaji awana chinayihumwina mankendi atanu nayedi, mwanona yimpaya yiŋahi yenzala yibalu? Hiyakumwila nawu, Yitanu nayiyedi.

²¹Hakuyila nindi, Nihanu kanda mwiluki?

²²Hiyakushika kuBeteseda. Hiyakumuletela mputamesu, hiyakumulembelela nawu amukunki.

²³Hakukwata mputamesu kuchikasa, hakumufumisha mumukala; chanamufwijiliyi mazeŋi hamesu hakumunaŋika makasa, hakumwihula nindi, Wunamoni chuma?

²⁴Yena hakubanduka nindi, Namoni antu; nayimoni neyi nyitondu yidi nakwenda.

²⁵Hakumunaŋika cheŋi makasa hamesu; muntu hakutala swi-i, hakukola, hakumona yuma yejima chalumbuluka.

²⁶Hakumwila nindi, Yaŋa kwitala deyi, bayi wiŋila hela mumukalaku.

²⁷Yesu hakufumaku nawatumbanji twindi, hiyakuya kunyikala yakuKesareya Fwilipi; hakuyihula atumbanji twindi munjila nindi, Antu antenaŋa nawu yaminyi?

²⁸Hiyakumuleja nawu yeyi Yowanu Mpapatishu; amakwawu nawu yeyi Elija; amakwawu nawu wukaprofwetu wumu.

²⁹Hakuyihula nindi, Indi enu aweni mwelaŋa nenu yaminyi? Petulu hakwakula nindi, Yeyi Kristu.

³⁰Hakuyikaanda nindi bayi munshimuna kudi muntuku.

³¹Hakutachika kuyileja nindi, Mwana kamuntu chiŋa akakaba yuma yayivulu, akamuleka kudi awakulumpi, nikudi awakulumpi jawatupristu, nikudi ansoneki; akamujaha, chimwakahita mafuku asatu wakasaŋuka mudi afu.

³²Wahosheli mazu owu hatooka. Petulu hakumutwala hambadi, hakutachika kumukaanda.

³³Yena hakushetumuka, hakutala atumbanji twindi, hakumuhoshola Petulu nindi, Eyi Satana, hita kunyima yami; muloŋa hiwasha muchima kuyuma yaNzambuku, washa kuyuma yawantu.

³⁴Hakutambika izaza dawantu nawatumbanji twindi, hakuyila nindi, Muntu wukukeŋa kunlondami adibondi, anyamuni kulusu yindi anlondaŋa.

³⁵Muloŋa muntu wukukeŋa kuhemba wumi windi wakawujimbesha; hakwila muntu wukujimbeshela wumi windi hamujimba wamami nihansaŋu yayiwahi, wakawuhemba.

³⁶Muloŋa neyi muntu wukuheta mpata yamunu mwishina yejima, ajimbeshelahu wumi windi, wakadiila kwodi?

³⁷Chumanyi chakahanayi muntu akahimpi nachu wumi windi?

³⁸Muntu wukuntiyilami nimazu ami nsonyi muchisakichi chawuvumbi chanshidi, Mwana kamuntu niyena wakamutiyila nsonyi hakenzayi mulubanji lwakulema kwaTata yindi nawaŋelu ajila.