Read MUKANDA WANZAMBI Mareka 9 Bible Online

Mareka 9 - MUKANDA WANZAMBI bible

Mareka 9

¹Wayilili nindi, Nukuyileja chalala nami amu anemani kunu hiyakafwaku, chiŋa anamoni wanta waNzambi wunenzi dehi naŋovu.

²Chimunahiti mafuku atanu nadimu, Yesu hakutwala aPetulu naYakoba niYowanu, hakuyikandamisha hampidi yayilehi kwakanka wawu; hiyakumumona nabalumuki mwacheŋi.

³Mahinindi hiyakukekema, hiyakubadika kutooka; munu mwishina himudi mukwakutookesha mahina niwumu natweshi kuyitookesha chochochuku.

⁴Elija naMosi hiyakumwekana kumesu awu; hiyakuhanjika naYesu.

⁵Petulu hakumwila Yesu nindi, Eyi Rabi, chachiwahi chitudi kunu; tutuŋi yisolu yisatu, chimu cheyeyi, chimu chaMosi, chimu chaElija.

⁶Helukili nimwakuhoshaku, muloŋa aswejeli kutiya woma nankashi.

⁷Ivu hidikwinza nakuyizeŋamina; mwivu himukufuma izu dakwila nawu, Diyi mwanami nakeŋa, mutiyililenu yena.

⁸Chanakasumukuwu nawu atalajali, hiyamweni nawa cheŋi muntuku, chiŋa yowu Yesu nawena hohu.

⁹Chadiŋi nakukunkumukawu hampidi, hakuyikaanda nindi, Bayi mushimwina muntu yuma yimunamonuku, sampu Mwana kamuntu nasaŋuki dehi mudi afu.

¹⁰Ashili mazu owu kunyichima yawu, hiyakudihujola mukachi kawu, nawu kusaŋuka mudi afu chaya mudihi?

¹¹Amwihwili nawu, Ansoneki elaŋa nawu chiŋa Elija asambila kwinza.

¹²Yena hakuyila nindi, Elija chalala wakasambila kwinza nakupoŋomwena yuma yejima; indi Mwana kamuntu anamusonekelidi nawu chiŋa akakaba yuma yayivulu, akamudiwula?

¹³Ilaŋa mi nukuyileja nami Elija wenza dehi, anamukoŋi mwejima mwakeŋa eluwu, mwomu mwanamusonekeluwu.

¹⁴Chanashikuwu kudi atumbanji, hiyakumona kunayinyeŋumuki izaza deneni, niansoneki adi nakuyihujola.

¹⁵Hohenohu antu ejima chanamumonuwu hiyakuhayama nankashi, hiyakuya kudi yena lufuchi nakumwimwisha.

¹⁶Hakuyihula nindi, Mudi nakuyihujola chumanyi?

¹⁷Muntu wahezaza dawantu wumu hakumwakula nindi, Eyi Nkuluŋaŋa, naleti mwanami weyala kudeyi, wazakukaŋa demoni wawumama.

¹⁸Kwejima kwamutwalaŋayi wamunatolaŋa heseki; hakwidisha mafulolu mukanwa, hakudisumona kumaji kelete kelete, hakuzeela. Nahoshi nawatumbanji tweyi nami amufumishi, ilaŋa wena anakaŋanyi.

¹⁹Hakuyakula nindi, Enu chisaka chakadi kukuhwelela, nukwi kala nenu nyaka yiŋahi? Nukukabakana nenu nyaka yiŋahi? Muletenu kudami.

²⁰Hiyakumuleta kudi yena; chanamumoniyi, hohenohu demoni hakumukonyesha nankashi, hakudimbuka heseki nakulwisha, hakwidisha mafulolu mukanwa.

²¹Hakumwihula tata yindi nindi, Hichamuweni munahiti dehi nyaka yiŋahi? Yena nindi, Kufumisha kuwansi.

²²Mapampa kakavulu namunati nimukesi nimumeji kulonda kumukisaŋana; Ilaŋa neyi wunatweshi kwila chuma, tutiyili wushona, wutukwashuku.

²³Yesu hakumwila nindi, Komana Neyi wunatweshi! Muntu wukukuhwelela wukutwesha yuma yejima.

²⁴Hohenohu tata yanowu mwana hakubilela nindi, Eŋa, nakuhweleli; nkwashuku chinakaŋanyi kukuhwelela chachiwahi.

²⁵Yesu chanamoniyi izaza dawantu hidikupompa lufuchi, hakuhoshola demoni wazonda nindi, Eyi demoni wawumama nikujika matu, ami nakuleji nami fumaku mudi yena, bayi wakamwiŋila cheŋuku.

²⁶Chanakalukiyi nakumukonyesha nankashi, hakufuma mudi yena; owu mwana hakwikala neyi mufu hohu; niantu amavulu elili nawu nafwi dehi.

²⁷Ilaŋa Yesu hakumukwata kuchikasa, hakumunyamuna, yonyamuka nikunyamuka.

²⁸Chanepiliyi mwitala, atumbanji twindi hiyakumwihula kwakanka wawu nawu, Indi etu tunakaŋenyidi kumufumisha?

²⁹Hakuyila nindi, Wudi neyi iwu, hatweshaŋa kufuma tuhuku; kufuma chiŋa nakulomba.

³⁰Afumini kwenoku, hiyakuhita muljaliliya; yena hakeŋeli muntu kuchilukaku.

³¹Muloŋa wadiŋi nakuleja atumbanji twindi nindi, Mwana kamuntu anamuhani dehi kumakasa awantu, akamujaha; chakamujahawu, mwakahita mafuku asatu wakasaŋuka mudi afu.

³²Wena hiyelukili mazu owuku, atiyili woma wakumwihula.

³³Ashikili kuKaperinawu; chadiŋiyi mwitala hakuyihula nindi, Mwatadikaŋadi munjila?

³⁴Wena hiyakumwena zo; Muloŋa munjila adiŋi nakutadika nawu wabadika hinyi?

³⁵Hakushakama, hakutambika ikumi nayedi, hakuyila nindi, Muntu wukukeŋa kwikala wakusambila, ekali wakukuminina hadi ejima, ekali mukwakukalakela akwawu ejima.

³⁶Hakutambika mwana wanyana, hakumusha mukachi kawu; hakumwakata mumakasindi;

³⁷hakuyila nindi, Muntu wukutambula mwana wanyanya wumu wudi neyi iwu mwijina dami, nantambulami; wukuntambulami, hanatambuli amuku, natambuli wantemesheli.

³⁸Yowanu hakumwila nindi, Eyi Nkulupaŋa, etu twamona muntu wudi nakufumisha ademoni mwijina deyi; twamulekesha Muloŋa hendaŋa nanetuku.

³⁹Ilaŋa Yesu nindi, Bayi mumulekeshaku, muloŋa muntu wukutwesha kukoŋa mudimu waŋovu mwijina dami hakutwesha kuntuŋiula swayuku.

⁴⁰Muntu wukubula ntadi nanetu diyi wetu.

⁴¹Muloŋa yowu wukuyinka lupasa lwameji akunwa nanochu chimudi aKristu, nukuyileja chalala nami, hakabula wufwetu winduku.

⁴²Yowu wukudimbwisha mwana wanyanya wumu wanawa ankuhwelelami, chikuwaha kumukasila ilola dakuhala deneni kunshiŋu, hikumúumbila mukaluŋalwiji.

⁴³Neyi chikasa cheyi chakudimbwishaŋa chiketuli;

⁴⁴chinawahi kwijila muwumi nawufwayi, hichinawahi kwijila mukaluŋa kachinana, mukesi kakajimaŋa, namakaseyi ayeduku.

⁴⁵Neyi mwendu weyi wakudimbwishaŋa wuketuli;

⁴⁶chinawahi kwijila muwumi nawufwayi, hichinawahi kukunatila mukaluŋa kachinana nanyendu yeyi yiyeduku.

⁴⁷Neyi disu deyi dakudimbwishaŋa ditubuli; chinawahi kwijila muwanta waNzambi nadisu dimu, hichinawahi kukunatila mukaluŋa kachinana namesu ayeduku.

⁴⁸Mwenomu himwafwaŋa kabubu kawuku, ni kesi hikajimaŋaku.

⁴⁹Muloŋa antu ejima akayikwita muŋwa wakesi.

⁵⁰Muŋwa wawuwahi; Ilaŋa neyi muŋwa wunasamuki, mukuwutoweja nanka? Ikalenu namuŋwa mudenu, shakamenu nakuwunda nawakwenu.