Read MUKANDA WANZAMBI Luka 1 Bible Online

Luka 1 - MUKANDA WANZAMBI bible

Luka 1

¹Antu amavulu anakwati mudimu wakusoneka nikushimuna nsaŋu yakutena yuma yitunetiyi chikupu mukachi ketu netu yalala;

²mwomwatulejeleluwu kudi ayinsahu amweni namesu hatachikilili nsaŋu, adiŋi akwakukalakala mudimu wamazu.

³Dichi neli nami chachiwahi nikusonekeli nawa, eyi Tiyofwilu wasweja kulema, muloŋa nashinshiki dehi chakashinshi mwaya nsaŋu yejima hachuma hachuma, kufumisha hatachikilili nsaŋu;

⁴kulonda wiluki yuma yakulejeluwu, neyi akulejeli mwalala chikupu.

⁵Hadiŋi mwanta wawaYudeya Herodi hadiŋi kapristu wumu, ijina dindi Zakariya, wakwizanvu daAbiya, Iŋodindi wakudi anyana kaAroni, ijina dindi Elizabeta.

⁶Mwayedi wawu adiŋi antu aloŋa kumesu aNzambi, endelaŋa mwaya nshimbi nimuyidi ka yaYehova yejima chakadi hakuyinkela muloŋa.

⁷Hiyadiŋi namwanaku, muloŋa Elizabeta wadiŋi nshinta, mwayedi wawu asweja dehi kukula.

⁸Chakoŋelaŋayi Zakariya mudimu windi wawupristu kumesu aNzambi, mwomwakalakelaŋa akwezanvu dindi,

⁹mwomuchaaku chamudimu wawupristu, chakwila kapristu wukwipila mutembeli yaYehova nakwocha insensi, chiŋa yowu wakusakula nachinjikijilu chakusakula nachu hohu.

¹⁰Izaza dawantu dejima dadiŋi nakulomba hanzi hampinji yakwocha insensi.

¹¹Kudi yena hikukumwekana kaŋelu kaYehova nemanikukameŋa kakwochela insensi, kumbadi yachikasa chachidiilu.

¹²Zakariya chanamumoniyi hakwakama, niwoma wumukwata nikumukwata.

¹³Kaŋelu hakumwila ni di, Eyi Zakariya, bayi wutiya womaku; kulembelela kweyi anakutiyi, iŋodeyi Elizabeta wakakuvwela mwana weyala, wakanamutumba ijina dindi neyi Yowanu.

¹⁴Eyi wakazaŋalala wakatiya kuwaha; amavulu akazaŋalala hakavwalikayi.

¹⁵Muloŋakamumona kulema kudi Yehova. Bayi akanwaŋa vinyu hela walwa washetanaku; wakenzala Spiritu Wajila kufumisha hakavwalikayi.

¹⁶Wakabalumuna anyana kaIsarela amavulu akatali kudi Yehova Nzambi yawu.

¹⁷Wakayaloŋahu dehi kumbidi nimuSpiritu nimuŊovu yaElija, kulonda kubalumuna nyichima yawatata jawantu yakatali kudi anyanawu, ajikwa akendi nama ana awaloŋa; akamuloŋesheli Yehova antu akawani amuloŋeshelawu dehi.

¹⁸Zakariya hakumwila kaŋelu nindi, Chumichi nukuchiluka ŋahi? Ami niipala deyala, niŋodami nasweji dehi kukula.

¹⁹Kaŋelu hakumwakula nindi, Ami yami Gabireli, nemanaŋa kumesu aNzambi; anantemeshi ninzi nihoshi neyi nikuleji nsaŋu iyi yayiwahi.

²⁰Tiya, eyi wukwi kala kamama, hiwukutwesha kuhoshaku, kushika nihamba kamwekana yumiyi, muloŋa wunabuli kwitiya mazu ami akalumbuluka hakakweji kawu.

²¹Antu saŋa emenawu nakumuchiŋilila Zakariya, hiyakuhayama chadiŋi nakulabilayi mutembeli.

²²Chanedikiyi kutwesha kuhosha nawu nehi, eluka nikwiluka nawu namoni chuma mutembeli; kwakwinyeka namakasindi hohu, kukanwa chochikwamwena zo.

²³Chelili mafuku indi akoŋelaŋayi mudimu anawani dehi, hakuya kwitala dindi.

²⁴Mafuku alondeli mumafuku owu, Iŋodindi Elizabeta abaaba niivumu, hakudi ŋinda tukweji tutanu,

²⁵nindi, Dichi chanaŋiliyi Yehova chanenziyi nakuntala mafuku anu, anfumishi nsonyi yinatiyaloŋa kudi akwetu antu.

²⁶Hakakweji kamuchitanu nakamu, owu kaŋelu Gabireli amutemesheli kudi Nzambi kumukala wamuŊaliliya wumu, ijina dawu Nazareta.

²⁷Hakwinza kudi mumbanda wumu wakadi kudi monaŋahu dehi neyala, anakumini dakumwota kudi iyala ijina dindi Yosefu, wakumutaŋa waDavidi; ijina danowu mujiki diyi Mariya.

²⁸Kaŋelu hakwijila mwadiŋiyi yena, hakumwila nindi, Kolaku, eyi anakutiyili luwi lwakubadika, Yehova wudi naneyi; yeyi wunakooleki hakachi kawakwenu ambanda.

²⁹Yena chanatiyiyi izu odu hakwakama nankashi, hakujinoka mumuchima windi nindi anaŋimwishi ŋahi?

³⁰Owu kaŋelu hakumwila nindi, Eyi Mariya, bayi wutiya womaku; wunawani wuselewa kudi Nzambi.

³¹Tiya, wakabaaba ivumu, wakavwala mwana weyala, wakanamutumba ijina dindi neyi YESU.

³²Yena wakekala muneni, akamutena nawu Mwana kaMukwakubadika Mwiwulu, Yehova Nzambi wakamwinka itanda datata yindi Davidi dawanta;

³³wakekala mwanta wakumutaŋa waYakoba naya nyaka; wanta windi hiwamba kakumaku.

³⁴Mariya hakumwila kaŋelu nindi, Chumichi chikutwesheka ŋahi, ichi chinabuli iyala?

³⁵kaŋelu hakumwakula nindi, Spiritu Wajila wakenza hadeyi; Ŋovu jaMukwakubadika Mwiwulu jakakuzeŋamina; dichichuma chiwakavwala akachitena nawu chajila, hiMwana kaNzambi weyala.

³⁶Tiya, nikawusoku weyi Elizabeta niyena nawa naba abi dehi ivumu damwana weyala muwushinakaji windi, mumbanda atenenaŋawu nawu nshinta; kakweji kanu diku kaneli dehi kamuchitanu nakamu.

³⁷Muloŋa kudi Nzambi hikwafumaŋa izu dabula Ŋovuku.

³⁸Mariya hakwila nindi, Tala ami kambuŋambala kaYehova; mwonsu muwunahoshi mumwekani kudami. Kaŋelu hakufuma kudi yena.

³⁹Wena mafuku owu Mariya hakunyamuka bakuya swayi kwituŋa damapidi, kumukala wamuYuda wumu;

⁴⁰hakwijila mwitala daZakariya, hakumwimwisha Elizabeta.

⁴¹Elizabeta chanatiyiyi kwimwisha kwamwimwishiluwu kudi Mariya, mwana wadiŋi mwivumu dindi hakutuntoka. Elizabeta hakwinzala Spiritu Wajila.

⁴²Hakubidika nezu daŊovu nindi, Yeyi wunakooleki hakachi kawakwenu ambanda, niwakafuma mwivumu deyi nakooleki.

⁴³Ichi chanenziyi mama yaMwanta wami kudami chinafumi hanka?

⁴⁴Talenu, izu diwunaŋimwishi, chidinepili mumatu ami, mwana wudi mwivumu dami hakutuntoka namuzaŋalu.

⁴⁵Iwu mumbanda wetiya nakooleki, muloŋa yuma yanamulejuwu kudi Yehova yakamwekana.

⁴⁶Mariya hakwila nindi, Muchima wami hiwukumutohesha Yehova;

⁴⁷spiritu yami yinazaŋalali naNzambi Chamwinu chami.

⁴⁸Muloŋa yena namoni chinabula kulema ami kambuŋindi. Tiyenu, kufumisha kulelu antu ejima akavwalikaŋa, mufwawa muhiŋawa, amba kantenaŋa nawu wakooleka.

⁴⁹Muloŋa mukwaŋovu naŋili yuma yamaneni; niijina dindi dajila.

⁵⁰Luwi lwindi lwamba kashikaŋa kudi antu ejima akavwalikaŋa, mufwawa muhiŋawa, amba kamwakamaŋa.

⁵¹Namwekeshi Ŋovu nachikasa chindi; naŋalaŋeshi adifuukwili nawu alema.

⁵²Nafumishi anyanta hamatandawu awanta, natúumbakeshi akadi kulema.

⁵³Nekutishi adiŋi nanzala nayuma yayiwahi, nahaŋi akwakuheta makasakasa.

⁵⁴Nakwashi kambuŋindi Isarela aanuki luwi lwindi,

⁵⁵lwatiyilili Abarahama ni anyanindi, mwomwakanininiyi ankakulula jetu kufumisha kunyaaka.

⁵⁶Mariya hakushakama nindi kafwampi neyi tukweji tusatu, hakufunta cheŋi kumukala wawu.

⁵⁷Chawanini mafuku akusapuluka, Elizabeta hakuvwala mwana weyala.

⁵⁸Akwawu atuŋayi nindi kwakwihi, niawusoku windi, chanatiyuwu nawu Yehova namutoŋi nankashi, hiyakuzaŋalala chimu nindi.

⁵⁹Chelili ifuku damu chitanu nachisatu chidinashiki dehi, hiyakwinza nawu amwalamishi mwana; elili nawu anamutumbi ijina datata yindi Zakariya.

⁶⁰Kuchinka mama yindi nindi, Nehi, namutumbenu nenu Yowanu.

⁶¹Hiyakumwila nawu, Kwosi kawusoku weyi atumbawu dehi ŋinoduku.

⁶²Hiyakumukobola tata yindi kulonda ayileji danakeŋiyi kunamutumba.

⁶³Hakulomba ilola kulonda asonekuhu; hakusoneka nindi, ijina dindi diyi Yowanu. Wejima wawu hiyakuhayama.

⁶⁴Kanwa kindi kajikuka ŋihohenohu, niidimi dindi disubuka nikusubuka, hakuhosha mazu akumusakilila Nzambi.

⁶⁵Woma wuyikwata niantu ejima atuŋi mbadi oyu; yumiyi yitiyakana nimwahita ituŋa daYudeya damapidi dejima ti-li-li.

⁶⁶Antu ejima ayitiyili, hiyakuyisweka munyichima yawu nawu, Iwu mwana wamba kela ŋahi? muloŋa chikasa chaYehova chadiŋi nayena.

⁶⁷Tata yindi Zakariya hakwinzala Spiritu Wajila, hakuprofweta,

⁶⁸nindi, Yehova Nzambi yaIsarela akisulewi, muloŋa nenzi nakutala antu indi ayikúuli;

⁶⁹natunyamwini dehi wamwinu waŋovu wakumutaŋa wakambuŋindi Davidi,

⁷⁰mwomwahosheliyi dehi kutunwa twawatuprofwetu twindi ajila kufumisha kushankulu.

⁷¹Wamwinu wakutwamwina kudi akwankunyi netu, nikumakasa awantu ejima atuhelaŋa;

⁷²kulonda akatiyili ankakulula jetu luwi hakwanuka kutiyaloŋana kwindi kwajila;

⁷³kwokusanyika kwasanyikililiyi nkakulula yetu Abarahama;

⁷⁴kulonda chakutwamwinayi kumakasa awakwankunyi netu, twakamukala kelaŋa kumesu indi chakadi woma,

⁷⁵nimukujila nimukuloŋa mafuku etu ejima.

⁷⁶Nineyi mwana akakwilaŋa nawu wukaprofwetu kaMukwakubadika. Wakatwaminaŋahu dehi kumbidi yaYehova, kulonda kumuloŋeshelaŋahu dehi njila jindi;

⁷⁷kulonda chiwakayileja neyi anayanakeni dehinyiloŋayenu, akeluki nawu anatuhandishi dehi,

⁷⁸naluwi lwaNzambi yetu lwawushona. Naluwi olu twakamona nachu kucha kwakufuma mwiwulu, kwakwinza nakututala;

⁷⁹kucha kwakuchiila ashakama mumwidima nimuwulelu wakufwa, kwakalomboli nyendu yetu yakaholokeli munjila yakumona kuwunda.

⁸⁰Mwana wakulili, wakwatili Ŋovu muspiritu, Hakwikalaŋa mumasaŋa kushika nikwifuku damumwekesheluwu kudi aIsarela.