Read MUKANDA WANZAMBI Luka 10 Bible Online

Luka 10 - MUKANDA WANZAMBI bible

Luka 10

¹Kulondela hayumiyi, hakutonda amakwawu makumi atanu nayedi, hakuyitemesha ŋahu dehi kumbidi, ayedi ayedi, kwahita nyikala yamaneni yejima, ni mwituŋa dejima mwakukeŋa kuyayi yomweni.

²Hakuyila nindi, Mbutu yinahi yayivulu, ilaŋa akwakukalakala anakehi. Dichi lombenu kudi Mwanta diyi mukwakwaŋula, atemeshi akwakukalakala kumudimu wakwaŋula mbutu yindi.

³Yenuŋa kwenu; tiyenu, chidi neyi nidi nakutemesha anyana kanyikoku mukachi kawatuŋiwidi.

⁴Bayi musenda hela chikwama, hela ipakumuna, hela nkwabiluku; bayi mwimwisha muntu munjilaku.

⁵Itala dimwakeŋa ila, mwakasambila kwilamu nenu, Mwitalidi kwikali kuwunda.

⁶Neyi mudi muntu wawunda, kuwunda kwenu kwakekala hadi yena; neyi nehi, kuwunda kwenu kwakafunta cheŋi kudenu aweni.

⁷Itala dimwakashakama, kadyenu nikunwa yuma yakayinkawu yejima, mulona mukwakukalakala nateli wufwetu windi. Bayi mwakatutujoka mufuma italidi muya itala dacheŋuku.

⁸Nyikala yejima yimwakeŋa ila yakayitambulawu, kadyenu yuma yejima yakayinkawu;

⁹kayukenu akata adumu; kayilenu nenu, Wanta waNzambi wunenzi dehi kwakwihi nanenu.

¹⁰Hakwila nyikala yejima yimwakeŋa ila yakabula kuyitambulawu, mwakayi munyikwakwa yayu,

¹¹mwakayili nenu, Tunayidikumwini nilunkuŋu lwakumukala wenu lunalamati kunyendu yetu. Hela chochu, ilukenu nenu wanta waNzambi wunenzi dehi kwakwihi.

¹²Tiyenu niyileji, ifuku dakusompesha, yihuŋu yakamona mukalowu yakabadika yihuŋu yakamonawu akwaSodoma.

¹³O yihuŋu yiwakamoneyi Korasi! O yihuŋu yiwakamoneyi Beteseda! Nyidimu yaŋovu yaneliluwu mudenu, neyi ayililili muTira naZidoni, mutenowu abalumukili dehi munyichima yawu, ashakama dehi nimumawuti avwala dehi nimasaka.

¹⁴Hakusompesha, ihuŋu daTira naZidoni dakakuminamu, denwenu dakabadika.

¹⁵Eyi Kaperinawu, nineyi nawa akakutúumbakesha chashika nikwiwulu, tahindi? Akakukunkumwisha mukaluŋa.

¹⁶Muntu wukutiyenu nantiyami; wukulekenu nanlekami; wukuniekami naleki yena wantemesheli.

¹⁷Owu makumi atanu nayedi hiyakufunta namuzaŋalu nawu, Mwanta, hela ademoni aweni, kuyitenena ijina deyi anatwovwahili.

¹⁸Hakuyila nindi, Namweni Satana kuholoka kwiwulu neyi chikwanzaji.

¹⁹Tiyenu, nayinki wanta wakudata nihatupela nihatunjimbu, nayinki wanta wakufwomona Ŋovu jachilumbu jejima; hikudi chuma chakayikatisha hela hantuku.

²⁰Hela chochu, bayi muzaŋalaia nanochu chanayovwahiluwu kudi ademonuku; ilaŋa zaŋalalenu nanochu chanasonekuwu majinenu mwiwulu.

²¹Hakuzaŋalala mudi Spiritu Wajila yena mpinji oyu nindi, Eyi Tata, Mwanta wewulu niiseki, nakusakilili chiwajindili akwamaana niakwakashinshi yumiyi, hiwukuyimwekesha kudi anyikeki; mwamweni Tata, dichi chiwamweni kuwaha.

²²Tata yami nankunjiki yuma yejima; hikwekala wamwiluka Mwanaku, amwiluka kudi Tata hohu; hikwekala nawa wamwiluka Tataku, amwiluka kudi Mwana hohu, nimuntu anetejiyi Mwana kumumwekeshelayi.

²³Hakushetumuka kudi atumbanji twindi kumbadi kwakanka wawu, hakuyila nindi, Mesu amonaŋa yuma yimwamonaŋenu anakooleki.

²⁴Nukuyileja nami, atuprofwetu amavulu nawanyanta ankanu akeŋelaŋa nawu amoni yuma yimwamonaŋenu, hiyayimwenuku; akeŋelaŋa nawu atiyi yuma yimwatiyaŋenu, hiyayitiyiluku.

²⁵Kutala kunemani dehi mukwanshimbi wumu, hakumweseka nindi, Eyi Nkuluŋaŋa, nukwila ŋahi kulonda niswani wumi wahaya nyaka?

²⁶Yesu hakumwila nindi, Munshimbi anasoneki nawudi? Wataŋaŋamu ŋahi?

²⁷Hakwakula nindi, Nawu, Keŋaku Yehova Nzambi yeyi namuchima weyi wejima, nawumi weyi wejima, naŋovu jeyi jejima, namaaneyi ejima; keŋaku nawa mukwenu neyi chiwadikeŋa eyi aweni.

²⁸Yesu hakumwila nindi, Wunaakuli chachiwahi, ilaŋa kweyi mwomwenomu, wukuhanda.

²⁹Yena hakukeŋa kumwekesha kuloŋa kwindi, hakumwila Yesu nindi, Mukwetu yowinyi?

³⁰Yesu hakwila nindi, Muntu wumu wadiŋi nakufuma kuYerusalema nindi akunkumuki kuYeriku. Kukasumuka anamukwati dehi kudi atupondu; hiyakumuvúula, hiyakumweta, hiyakuya kwawu, kumushiya wudi kwakwihi nakufwa.

³¹Kapristu wumu hakukunkumuka njiloyu, chanamumoniyi hakumutondolwela.

³²Kushika nawa nikaLevi, niyena nawa chanamumoniyi hakumutondolwela.

³³Ilaŋa kaSamariya wumu wadiŋi nakuya munjila yindi, hakushika kwadiŋiyi; chanamumoniyi, hakumutiyila wushona,

³⁴hakuya kudi yena, hakuhuŋunwina hayitu yindi manji nivinyu; hakukasakasaku. Amusha nihakanyama kindi yomweni hakumuleta kwitala dakamaŋa enyi, hakumuhemba.

³⁵Chikunachi, hakunona mali ayedi, hakumwinka mwini itala nindi, Muhembi; neyi yiwakamwinka yakamotokamu, chinakafunta nakakuhiŋishilamu yacheŋi.

³⁶Awa asatu nanowu aholokeleluwu kudi atupondu, eyi wunatoŋojoki neyi mukwawu yowu wumwodihi?

³⁷Yena nindi, Owu wamutiyilili luwi. Yesu hakumwila nindi, Nineyi nawa yaloŋa wakelaŋa mwomumu.

³⁸Hadiŋi nakuyawu munjila yawu, hakushika hamukala wumu; mumbanda wumu, ijina dindi Mata, hakumutambula mwitala dindi.

³⁹Yenowu nawa wadiŋi namwanyikindi wamumbanda, ijina dindi Mariya; yena Mariya hakwinza nakushakama kunyendu yaMwanta nakutiyilila mazu adiŋi nakuhoshayi.

⁴⁰Ilaŋa Mata wadiŋi nakubimba nanyidimu yayivulu; hakwinza kudi yena nindi, Mwanta, chananlekeliyi mwanyikami nyidimu kanka wami, hiwunashuku muchima weyuku? Mwili enzi ankwashuku.

⁴¹Mwanta hakumwakulo nindi, Mata, Mata, yuma yayivulu wudi nakwakama, wudi nakudikabisha tuhu kweyi;

⁴²kunabuli chuma chimu hohu; chuma chanatondiyi Mariya, dichichuma chasweja kuwaha, hiyakamutambulachuku.