Read MUKANDA WANZAMBI Luka 11 Bible Online

Luka 11 - MUKANDA WANZAMBI bible

Luka 11

¹Chadiŋiyi nakulombayi kumu chelili nakumishi dehi, kambanji kindi wumu hakumwila nindi, Mwanta, tuleji kulomba neyi chalejeliyi Yowanu atumbanji twindi.

²Hakuyila nindi, Chimukulomba ilenuŋa nenu, Tata yetu wekala mwiwulu, ijina deyi dijili. Wanta weyi winzi. Muchima weyi awili hamaseki neyi chawilaŋawu mwiwulu.

³Twinkaŋa hefuku hefuku kudya kwetu kutunakeŋi.

⁴Twanakeni nyiloŋa yetu, muloŋa ninetu nawa twaanakenaŋa antu ejima akweti nyikudi yetu. Bayi wututwala mukwesekaku; twamwini kukutama.

⁵Hakuyila nindi, Hadenu hadi mwinenwinyi wukweti ibwambu dindi wukuya kudi yena mukachi kawufuku nindi, Eyi ibwambu dami, nsondamishuku mankendi asatu;

⁶kunenzi ibwambu dami munjila yindi, hinikweti yakumudiishaku.

⁷Yena amwakuli omu mukachi mwadiyi eli nindi, Kuchisu kwakwenzela dehi; nakama dehi kwami hakadidi, ni anyanami nawa, kutwesha kuhinduka nakukwinka nehi.

⁸Nukuyileja nami, hela kwonti kwindi kuhinduka nakumwinka nansaŋu yawubwambu, wukuhinduka nakumwinka yuma yejima yanakeŋiyi nansaŋu yakumuka kelayi.

⁹Nukuyileja nami, lombenu akuyinka; keŋakeŋenu mukuwana; dondomwenenu akuyenzulwila.

¹⁰Muloŋa ejima akulomba akutambula; muntu wukukeŋakeŋa wukuwana; wukudondomwena akumwenzulwila.

¹¹Mwinenwinyi wukwila neyi hitata yawantu, amulomba dinkendi kudi mwanindi weyala, amwinki ilola? Hela nalombi inshi amwinki kapela?

¹²Hela nalombi iteta amwinki kanjimbu?

¹³Dichi neyi enu atama muneluki kwinka anyanenu yamukunkulu yayiwahi, Tata yenu wamwiwulu wukubadika kuyinka awa akumulomba Spiritu Wajila.

¹⁴Wadiŋi nakufumisha demoni wakamama. Demoni chanafumiyi mudi muntu, owu kamama hakuhosha; mazaza awantu hiyakuhayama.

¹⁵Amakwawu hiyakwila nawu, Wafumishaŋa demoni naŋovu yamwanta wawademoni Belezebuli.

¹⁶Acheŋi hiyakukeŋa chinjikijilu chakufuma mwiwulu kulonda amweseki nachu.

¹⁷Yena hakwiluka yitoŋojoka yawu, hakuyila nindi, Mawanta ejima akudambula akulwaŋana, akushala kwamahembi hohu; hela akwetala dimu akudambula hiyakukolaku.

¹⁸NiSatana niyena nawa neyi wukudambula yomweni, wanta windi wukukola ŋahi? Nahoshi nanochu chimudi nakwila nenu nafumishaŋa demoni naŋovu yaBelezebuli.

¹⁹Neyi ami nafumishaŋa demoni naŋovu yaBelezebuli, indi awa anyanenu ayifumishaŋa naŋovu janyi? Dichi wena diwu akekala akwakuyisompesha.

²⁰Neyi ami nafumishaŋa demoni namunu waNzambi, komana wanta waNzambi wunashiki dehi kudenu.

²¹Mukwaŋovu namanyeki dehi, neyi wukuhemba chipaŋu chindi yomweni, yuma yindi yikwikala yayiwenyi;

²²neyi kudi yena kukwinza wamubadika Ŋovu hakumufwomona, wukumutambula yitwa yindi yejima yakuhwelelaŋayi, yuma yindi yanamupupiyi hakupaŋila akwawu.

²³Muntu wabulaŋa kwikala mwinetu, wanhelaŋa; nimuntu wabulaŋa kupompesha hamu nanami, wapalaŋeshapa.

²⁴Demoni wazonda chakufumayi mudi muntu, hakuya nakutambatamba kwakadi meji, amoni kwakunookela; chakukaŋanyayi kumona kwakunookela, wukwila nindi, Nifunti mwitala dami munafumini.

²⁵Chakwinzayi hakuwana akombakombamu dehi, apoŋomwenamu dehi.

²⁶Hakuya nakutambula akwawu ademoni atanu nayedi amubadika yomweni kutama, hiyakwijila mu, hiyakushakamamu; kutama kwanowu muntu kukubadika hadiŋiyi hatachi.

²⁷Hadiŋi nakuhoshayi mazu awa, mwizaza himukubidika mumbanda wumu nindi, Ivumu dakuvweli, nimayeli waamwini anakooleki.

²⁸Yena nindi, Chalala antu akutiya mazu aNzambi hiyakwila, anakooleki.

²⁹Hadiŋi nakuhwila mazaza awantu kudi yena, hakutachika kuhosha nindi, Awa antu achisakichi chatama hiyakukeŋa chinjikijilu, hiyakayilejachuku, akayileja chochinjikijilu chaYona hohu.

³⁰Muloŋa chabalumukiliyi Yona kwikala chinjikijilu kumesu awakwaNineve, dichi chakelayi ni mwana kamuntu kumesu awantu achisakichi.

³¹Mwanta wamumbanda wakukabeta kakuchidiilu wamba kemana nakuhisha antu achisakichi hakusompesha; muloŋa yena wafumini kwakumina maseki, enzi nakutiya maana aSolomoni; talenu, kunu kudi wabadika Solomoni.

³²Antu akuNineve amba kemana nakuhisha antu achisakichi hakusompesha, muloŋa wena abalumukili munyichima hayishimwininuwu kudi Yona; talenu, kunu kudi wabadika Yona.

³³Hikwekala muntu wabutulaŋa inoŋu adisha muchisweku, hela kudikuvumika ibaŋuku; wukudisha hamesa kulonda antu akwijila akamoni to-o.

³⁴Inoŋu damujimba weyi disu; neyi disu deyi dikutalaŋa mumu hohu, nimumujimba weyi wejima mukutooka to-o; neyi datama, mumujimba weyi wejima mukwi kala kwamwidima hohu.

³⁵Dichi babalaku wutali chachiwahi ochu chejeji chidi mudeyi, hamwaha himwidima.

³⁶Dichi neyi mumujimba weyi wejima mukwi kala kwachejeji hohu, niheyila hosi, mukwi kala kwachejeji to-o, neyi chelaŋa inoŋu dasweja kutoŋeka, dakutoŋekelaŋa to-o.

³⁷Henohu hadiŋi nakuhoshayi, kaFwarisi wumu hakumutambi ka nindi adiyi nindi; hakwijila, hakushakama nakudya.

³⁸Owu kaFwarisi chanamoniyi wudi nakudya chakadi kusambila kwisuka, hakuhayama.

³⁹Mwanta hakumwila nindi, Enu aFwarisi mwatookeshaŋa hanzi yalupasa nicheŋa, hakwila mukachi kenu chochimwadisoma nanyilami nikutama.

⁴⁰Enu o kusupa! Welili chahanzi hidiyi welili nichamukachi nawaku, tahindi?

⁴¹Kwila yuma yayiwahi yowu wukutookesha mukachi, dichi mukumona yuma yejima yikutooka.

⁴²O yihuŋu yimwakamona enu aFwarisi! Mwamulambu laŋa Nzambi tumafu twamwikumi twamavumba amawahi twejima, hakwila kusompesha nikukeŋa kwaNzambi kuchisha kumuchima nchi; neyi mwela yeniyi, ninoyu yi kwawu himwadi kuyikaŋanya kuyilaku.

⁴³O yihuŋu yimwakamona enu aFwarisi! Mwakeŋa aŋa kushakama mumashikola hayitwamu yalema, nikuyimwosha kuwulandilu.

⁴⁴O yihuŋu yimwakamona! muloŋa mudi neyi majamu akadi kumwekana, akadi kwilulta antu akwendahu.

⁴⁵Mukwanshimbi wumu hakumwakula nindi, Eyi Nkuluŋaŋa, ichi chiwunahoshi wunasawuli ninetu nawa.

⁴⁶Hakumwila nindi, O yihuŋu yimwakamona ninenu akwanshimbi nawa! Mulona mwatwikaŋa akwenu yiteli yakala kusenda, enu aweni kwiteja kukunkaku hela namunu wenu nehi.

⁴⁷O yihuŋu yenu! Mwaloŋeshaŋa chachiwahi majamu awatuprofwetu ajahiluwu kudi ankakulula jenu.

⁴⁸Dichi munekali dehi ayinsahu, mudi nskwiteja nyidimu yelili ankakulula jenu; muloŋa wena ayijahili, enu mwenda namutuŋiulula majamu awu.

⁴⁹Mwomwahosha dehi maana aNzambi nindi, Nukuyitemeshela atuprofwetu nawapostolu; amakwawu akayijaha nikuyikabisha,

⁵⁰kulonda mashi awatuprofwetu ejima apwekesheluwu kufumisha haaliluwu chikuku champata yamunu mwishina, amba kayihulamu antu achisakichi,

⁵¹kufumisha kumashi aAbeli kushika nikumashi aZakariya ajahililuwu hakachi kakameŋa namwajila. Eŋa, nukuyileja nami amba kayihulamu antu achisakichi.

⁵²O yihuŋu yimwakamona enu akwanshimbi! Munafumishi nsaŋi yakwiluka nachu maana; enu aweni kwijila mu nehi, himukulekesha ninawa akukeŋa kwijila.

⁵³Chanedikiyi mwenomu, ansoneki nawaFwarisi atachika nikumweseka naŋovu nankashi, hiyakumuvuloka kulonda ahoshi yuma yayivulu;

⁵⁴hiya kumuta namazu akukanwa kindi, atiyi chuma chakuhoshayi, amwinkeluhu muloŋa.