Read MUKANDA WANZAMBI Luka 12 Bible Online

Luka 12 - MUKANDA WANZAMBI bible

Luka 12

¹Henohu hadiŋi nakwilawu ochu, kupompa nimakombakaji awantu akwila hiyakudidata nikudidata; hakutachika kuleja atumbanji twindi chakusambila, nindi, Babelenu iluŋi dawaFwarisi, wowu wufwikiji.

²Muloŋa hikwekala chuma chabutaŋawu chibula kumwekana hatookaku; hela chajindaŋawu chibula kutiyakanaku.

³Dichi yuma yejima yimwakahoshela mumwidima yakatiyakana hamwaana; niyimwakashawutila mwitu namutupeka twamukachi, akayibidika hatuwumbu.[2]

⁴Enu amabwambu jami nukuyileja nami, bayi mutiya woma wena ajahaŋa mujimbaku, akuminaŋa mwomwenomu hohu, kutwesha kwila chuma chikwawu nehi.

⁵Nukuyilejaŋahu dehi imukutiya woma; tiyenu woma yena wukweti Ŋovu jakwila ajaha anatila muntu mukaluŋa kachinana; eŋa, nukuyileja nami mutiyenu woma.

⁶Tujila twanyanya tutanu hiyatulandaŋa natumali tuyeduku? Hela chochu, hikwekala hela kamu kavulamenaŋawu kudi Nzambuku.

⁷Hela nsuki jenu jajeni ajichinda dehi jejima. Dichi bayi mutiyaloŋa womaku, kulema kwenu kwabadika kulema kwatujila twatuvulu.

⁸Nukuyileja nami antu ejima akuŋiteja kumesu awantu, ni mwana kamuntu niyena wakayiteja kumesu awaŋelu jaNzambi.

⁹Muntu wukudikala kumesu awantu nindi haŋilukaku, niyena nawa akadikalayi kumesu awaŋelu jaNzambi.

¹⁰Muntu wukuhosha izu dakutena Mwana kamuntu chatama, akamwanakenadu; hakwila wukuhosha Spiritu Wajila chatama hiyakamwanakenaku.

¹¹Chakayitwalawu nakuyimika mumashikola kumesu awanyuli nawanyanta, bayi mwakaakama mwakwakwila hela mwakuhoshelaku.

¹²Spiritu Wajila wakayileja chatela kuhosha henohu.

¹³Muntu wahezaza dawantu wumu hakumwila nindi, Eyi Nkulupaŋa, mwili mana kwami twambuli nindi wuswana wetu.

¹⁴Yena hakumwila nindi, Eyi iyala, ananyinki kudinyi mudimu wakuyisompesha, hela wakuyipaŋila?

¹⁵Hakuyila nindi, Babalenu, dihembenu muleki lwisu lwejima, muloŋa wumi wamuntu hiwekalaŋa kukuvula kwamahetinduku.

¹⁶Hakuyitila chishimu nindi, Maha amukwakuheta wumu aswejeli kusoŋa nankashi;

¹⁷hakuhosha mumuchima windi nindi, Nukwila ŋahi chinabuli kwakuswekela kudya kwami?

¹⁸Hakwila nindi, Nukusanda nkalaŋa jami, nituŋa jamaneni, nakaswekumu tidiku yami yejima nimahetami.

¹⁹Nili wumi wami nami, Eyi wumi wami, wunalumbiki dehi maheteyi amavulu anyaka yayivulu; nookaku kweyi; dyaloŋa, nwaŋa, luŋaŋa.

²⁰Nzambi hakumwila nindi, Eyi chisupi, anakeŋi kutambula wumi weyi wufuku owu, indi iyi yuma yiwunaloŋeshi yikushala nanyi?

²¹Chochakekala muntu wadilumbikilaŋa maheta amavulu, nindi indi yomweni hohu, hekalaŋa namaheta kumesu aNzambuku.

²²Hakuyila atumbanji twindi nindi, Nukuyileja nami lekenu kwakama wumi wenu nenu tukudyadi? hela kwakama nyijimba yenu nenu tukuvwaladi?

²³Wumi wabadika yakudya, mujimba wabadika yakuvwala.

²⁴Toŋojokenu ayipuŋu, hiyakuwaŋaku, hiyamunaŋaku; hiyaheta hela nkalaŋa hela itala dakuswekelaku; ayidiishaŋa kudi Nzambi hohu. Komana kulema kwenwenu hikwabadika nankashi kwatujilaku?

²⁵Mwinenwinyi wukwila akame-e, anuŋa kuchiminu chindi chikunku chakweseka munkotweli yachikasa?

²⁶Chuma chantesha muchikaŋanya kuchila, indi mwaakaminaŋadi yuma yinashaluku?

²⁷Tonojokenu wuluya chiwakulaŋa; hiwakabakanaŋaku, hiwashintaŋaku; nukuyileja nami mwalemeneniyi Solomoni mwejima, havweli chakweseka nawuluyiwu wumuku.

²⁸Nzambi yovwika matahu amwiha chochichi, akwila lelu adi kwoku, kumadiki hiyakuyinatila mukesi, abuli kubadika kuvwikenu, enu mukweti kukuhwelela kwantesha?

²⁹Bayi musha muchima kuyakudya hela kuyakunwaku; bayi mululutaŋaku.

³⁰Muloŋa yuma yejimiyi diyi yakeŋaŋa nyuza yamunu mwishina. Tata yenu neluki chimunakaankili yumiyi.

³¹Dichi shenu muchima kuwanta windi, iyi yuma yejimiyi akayishilaku.

³²Enu kamukanka kawanyikoku kantesha, bayi mutiyaloŋa womaku, Tata yenu watiyaloŋa kuwaha kuyinka wanta.

³³Landishenu yimudi nayu muyinki atuzweŋi; namutuŋi yikwama yenu yabulaŋa kukula, maheta amwiwulu hiyanoŋaŋaku, mwiwulu himwashikaŋa ikombi nakwiyaku, hela kabubu kakukisaŋana.

³⁴Muloŋa kukwikala mahetenu diku kukwikala ninyichima yenu nawa.

³⁵Pimpilenu mahinenu, manoŋu enu abutukaŋa. Enu aweni ikalenu neyi antu adi nakutalila mwanta wawu wukufuma kumawija kwayiliyi, kulonda hakenzayi nakudondomwena akamwenzulwili hohenohu.

³⁶Anduŋu akawanawu kudi nkaka yawu adi nakumutalila anakooleki;

³⁷nukuyileja chalala nami nkaka yawu wakavwala chachiwahi, wakayishakamisha nakudya, wakenza nakuyikalakela.

³⁸Neyi wakenza hachilu chamuchiyedi hela chamuchisatu, kuyiwana chochichi, anakooleki.

³⁹Tiyenu mwiluki, mwini itala neyi welukili mpinji yikwinza ikombi, mutenowu watoneni, hadi kwiteja kumupundila itala dinduku.

⁴⁰Dichi ninenu nawa babalenu, muloŋa mpinji yimukubula kutoŋojoka, diyi yakenzayi Mwana kamuntu.

⁴¹Petulu hakumwila nindi, Mwanta, ichi chishimu wunatili etu hohu, tahindi munatili niantu ejima?

⁴²Mwanta nindi, Kalama washinshika wukweti maana yowinyi, akushilawu kudi mwanta windi mudimu wakutala mukala windi, enkaŋa aŋamba jindi yakudya yawu hayinkelaŋawu?

⁴³Nduŋu akawanawu kudi nkaka nindi wudi nakwila mwenimu nakooleki.

⁴⁴Nukuyileja chalala nami, wakamukunjika mudimu wakuhemba yuma yahetayi yejima.

⁴⁵Hakwila owu nduŋu, neyi wakahosha mumuchima windi nindi, Nkaka yami wuchidi kulaba; hakutachika kweta akwawu anduŋu amayala nawambanda, hakudya, hakunwa, hakusheta,

⁴⁶mwanta wanowu nduŋu hakumukasumwisha mwifuku dákubula kumutalilayi, hela mumpinji yákubula kwilukayi; wakamuvupola nankashi, hakumusha kwijiku dawakadi kwitiya.

⁴⁷Nduŋu welukili mwakeŋa a kwilayi mwanta windi, yena kuloŋeshamu nehi, hela kwilamu nehi, akamweta yikoti yayivulu;

⁴⁸hakwila muntu wabulili kwiluka, neyi neli yuma yatela kumwetela, akamweta yikoti yanti. Muntu anenkuwu yayivulu, akakeŋelaku nawa yayivulu; muntu anashiluwu yayivulu, akehwilaku nawa yasweja kuvula.

⁴⁹Ami nenzi nakunatila kesi hanu hamaseki, nakeŋi nami kabutuki; indi neyi kanabutuki dehi, ami nakela ŋahi?

⁵⁰Nidi nachipapatishu chakampapatishawu nachu; chinankatishi kumuchima nankashi nami chimani.

⁵¹Munatoŋojoki nenu ami nenzi nakuleta kumwena hanu hamaseki, tahindi? Nukuyileja nami, ami hinenzi nakuleta kumwenaku, nenzi nakwambola.

⁵²Muloŋa kufumisha hanu, mwitala mudi antu atanu, asatu akaambuka kudi akwawu ayedi, ayedi akaambuka kudi asatu.

⁵³Tata yamuntu wakadambula namwanindi weyala, mwana weyala wakadambula natata yindi; mama yamuntu wakadambula namwanindi wamumbanda mwana wamumbanda wakadambula namama yindi; mawenu yamuntu wakadambula namuku windi wamumbanda, muku wamumbanda wakadambula namawenu yindi.

⁵⁴Hakuyila mazaza awantu nindi, Mwelaŋa chimukumona ivu dikusela kumuji ka, himukuhosha nenu, Kukunoka kuvula; chalala kwaamu mwomwenomu.

⁵⁵Chimukumona mpepela yikukunka nakufmna kukabeta kakuchidiilu, himukuhosha nenu, Kukuholoka nkanza yasweja iyena; chalala kwaamu mwomwenomu.

⁵⁶Enu anfwikiji! Muneluki kulumbulula nsaŋu jayuma yahamaseki niyamuluzwizu, indi munakaŋenyidi kulumbulula mukuya nsaŋu jamakonu?

⁵⁷Enu aweni mwakaŋenyaloŋadi kwiluka mukuya yuma yaloŋa?

⁵⁸Neyiwudi nakuya kudi mukwakusompesha namuntu nakwinki muloŋa, esekaku kumanisha muloŋa hiwuchidi nindi munjila; mukunkulwayi wukukutwala kudi mukwakusompesha, mukwakusompesha hakukuhana kudi mukwakaleya, niyena hakukusha mukaleya.

⁵⁹Nukukuleja nami hiwamba kafuma mwokuku, kufumamu chiŋa wunafuti muloŋa wejima, nikadali kanyanya kakushalaku nehi.