Read MUKANDA WANZAMBI Luka 14 Bible Online

Luka 14 - MUKANDA WANZAMBI bible

Luka 14

¹Hasabata yimu, cheŋililiyi mwitala danyuli yawaFwarisi wumu adiyi nindi, hiyakumushinshika swi-i.

²Kwatalishiliyi mesu indi kudi muntu wukweti musoŋu wandondu.

³Yesu hakuhosha nawakwanshimbi nawaFwarisi nindi, Kúuka hasabata chaloŋa, tahindi nehi?

⁴Wena chochamwenawu kwazo-o. Hakumukwata, hakumúuka, hakumwila nindi, Yaŋa kweyi.

⁵Hakuyila nindi, Mwinenwinyi wukwila neyi wukweti chimbulu hela ŋombi, aholokela mwishima hasabata, alabajala nakumukokamu?

⁶Hiyamweni mwakumwakwila cheŋi mazu awaku.

⁷Chamweniyi owu antu atambikiluwu hiyakutonda kushakama halema hohu,

⁸hakuyitila chishimu nindi, Neyi anakutambiki kumawija akusumbwisha, bayi wutonda kushakama halemaku, hamwaha anatambiki dehi muntu wabadikeyi kulema;

⁹chakwinzayi owu natambiki nineyi niyenowu, hakukwila nindi, Aha hambala haniwu. Chiwukutachika kuya habula kulema, o jinsonyi!

¹⁰Neyi anakutambiki, sambilaku kushakama habula kulema; chakwinzayi owu nakutambiki akwili nindi, Eyi ibwambu dami, inzaku wushakami hanu halema; akakumona kulema kudi akwenu ejima wunashakami nawu nakudya.

¹¹Muloŋa muntu wukuditohesha akamukehesha; nimuntu wukudikehesha akamutohesha.

¹²Hakumwila owu muntu wamutambi kili, nindi, Neyi wukuteleka chawija chamwaana hela chamelela, bayi wutambika amabwambu jeyi hela ana kweyi hela awusoku weyi, hela akwenu ahetaku; akenda kakutambika nineyi nawa, akakuhiŋishilamu.

¹³Neyi wukuteleka chawija cheyi, katambiki atuzweŋi, niayifwayi, niakwakubalakata, niamputamesu,

¹⁴kulonda wukooleki; muloŋa wena hiyakweti yakukuhiŋishilamuku, akakuhiŋishilamu hamba kasaŋuka akwakuloŋa.

¹⁵Mazu awa chanayitiyuwu kudi muntu wumu, wadiŋi hamu nawenowu ashakaminiyi nawu nakudya, hakumwila nindi, Muntu wakadya muwanta waNzambi nakooleki.

¹⁶Yesu hakumwila nindi, Muntu wumu watelekeli chawija cheneni, hakushiikashiika antu amavulu.

¹⁷Mpinji yakudya chawija chiyinashiki, hakutemesha nduŋu yindi nindi, Yaŋa wutambiki ashiikawu dehi neyi, Inzenuŋa, yuma yejima aloŋesha dehi.

¹⁸Wejima wawu hiyakutachika kuleyaleya namuchima wawu wumu hohu. Watachi nindi, Nalandi iha dami, nakeŋi niyi nakuditala; aŋiteji mwani kushala.

¹⁹Mukwawu nawa nindi, Nalandi ikumi daŋombi jakudimisha, nakeŋi niyi nakujeseka; aŋiteji mwani kushala.

²⁰Mukwawu nawa nindi, Nasumbuli iŋodami, hinukutwesha kuyaku.

²¹Owu nduŋu hakwinza, hakumuleja nkaka yindi yumiyi. Owu mwanta wetala hakuzuwa, hakumwila nduŋu yindi nindi, Yaku swayi munyikwakwa ninamutujila twamumukala, wuletaleti atuzweŋi, niayifwayi, niamputamesu, niakwakubalakata, wuyijiŋumu.

²²Owu nduŋu hakumwila nkaka yindi nindi, Mwanta, neli dehi muwunanleji, ilaŋa munashali mwakushakama antu amakwawu.

²³Mwanta hakumwila nduŋu yindi nindi, Yaku munjila jakula, ninamutunyilamba, wuyikanjikiji eŋilumu, kulonda mwitala dami mwinzali to-o.

²⁴Mulona nukuyileja nami, awa antu ashiikiluwu, hosi niwumu wakatompa kuchawija chamuku.

²⁵Mwadiŋi nakuyayi himukuya nimazaza awantu amavulu; yena hakushetumuka,

²⁶hakuyila nindi, Muntu wukwinza kudami chakadi kuhela tata yindi, nimama yindi, niŋodindi, ni anyanindi, niana kwindi, niahelindi, eŋa, hela wumi windi yomweni, hakutwesha kwikala kambanji kamuku.

²⁷Muntu wukubula kusenda kulusu yindi nakunlondami, hakutwesha kwikala kambanji kamuku.

²⁸Mwinenwinyi wukwila neyi wukukeŋa kutuŋa itala deneni, wukubula kusambila kusnakama nakuchinda mali achidi kochu, atali neyi wukweti mali akudimanisha nachu?

²⁹Wamba kela wukwala kwachikuku hohu, kumanisha nehi, antu ejima akutalaku hiyakutachika kumuseha,

³⁰nawu, Iwu muntu wakuminini dakutachika kutuŋa hohu, kumanisha nehi.

³¹Hela mwantanyi wukwila neyi wukukeŋa kuya nakulwa njita namwanta mukwawu, wukubula kusambila kushakama nakutoŋojoka nindi, ami nidi namakombakaji ikumi hohu; nukutwesha kuya nakumonaŋana namwantowu wudi nakwinza namakombakaji makumi ayedi kwaamu, tahindi?

³²Neyi hanatweshuku, wukunyakala kutemeshaŋahu dehi atuŋanda akwihula mwakuvu mbikilawu ikala, hohachidiyi mukwawu kwakulehi nankashi.

³³Dichi nimwinenu wukubula kuleka yadiyi nayu yejima, hakutwesha kwikala kambanji kamuku.

³⁴Muŋwa wawuwahi; neyi muŋwa wuneli dehi wasamuka, akutwesha kuwutoweja cheŋi nanka?

³⁵Hiwukutelela nawa cheŋi hamaseki hela hezeleluku, akuwunata tuhu. Yowu wukweti matu akutiya atiyi.