Read MUKANDA WANZAMBI Luka 15 Bible Online

Luka 15 - MUKANDA WANZAMBI bible

Luka 15

¹Ansonkeshi ejima niakwanshidi hiyakukundama kwakwihi nayena kulonda amutiyi.

²AFwarisi nawansoneki hiyakutoba nawu, Iwu muntu watambulaŋa akwanshidi, hakudya nawu.

³Hakuyitila chishimu ichi,

⁴nindi, Mwinenwinyi wukwila neyi wukweti nkulakaji yanyikoku, hajimbala wumu, wukubula kushiya owu makumi atanu nawana nanyikoku yitanu nayiwana mwisaŋa, hakuya nakukeŋakeŋa owu najimbali, keŋe-e nichakumuwanayi?

⁵Chakumuwanayi, wukumusha hamafwiji nakuzaŋalala.

⁶Chakushikayi kwiindi, hakutambika amabwambu jindi ni akwawu atuŋayi nawu kwakwihi, hakuyila nindi, Tuzaŋalalenu enu akwetu, mukoku wami wajimbala namuwani dehi.

⁷Nukuyileja nami, mwiwulu, neyi akumona mukwanshidi wumu nabalumuki mumuchima, mukwi kala muzaŋalu wakubaaika muzaŋalu wakuzaŋalala namakumi atanu nawana natanu nawana awantu aloŋa anabuli nsaŋu yakubalumuka mumuchima.

⁸Hela mumbandanyi wukwila neyi wukweti ikumi damali, neyi ajimbeshahu idali dimu, wukubula kubutula inoŋu, akombakomba mwitala, nakukeŋakeŋa chacheni nichakudiwanayi?

⁹Chakudiwanayi hakutambika amabwambu jindi ni akwawu atuŋayi nawu kwakwihi, hakwila nindi, Tuzaŋalalenu enu akwetu, nawani idali dinajimbesheli.

¹⁰Nukuyileja nami, kumesu awaŋelu aNzambi kwekalaŋa muzaŋalu hansaŋu yamukwanyiloŋa wumu nabalumuki mumuchima.

¹¹Hakwila nawa nindi, Kwadiŋi muntu wumu wadiŋi nawanyanindi amayala ayedi.

¹²Wakansi wamwilili tata yindi nindi, Tata, nyinki iseka dayuma yinakeŋa kudya. Hakuyipaŋila yuma yindi yakudihandisha nachu.

¹³Hakadi nikuleha mafuku, owu mwana wakansi hakupompesha yuma yejima, hakudiyila kwindi kwituŋa dakwakulehi, kwenoku hakukisaŋana mahetindi nakwenda nakubajama.

¹⁴Chanamanishiyi yuma yejima, mwituŋa odu muholoka ninzala yeneni, hakutachika kufwa nzala.

¹⁵Hakuya nakushakama namwenimbu wetuŋiodu; yena hakumutemesha mumahindi adiishi aŋulu.

¹⁶Wakeŋeli nankashi kwikuta namafulu adiilaŋa aŋulu, hikwadiŋi muntu wakumwinka chuma, hela wumuku.

¹⁷Chanawundishiyi mumesu, hakwila nindi, Aŋamba jatata o kuvula akweti yakudya yayivulu, enda ashiyahu, hakwila ami kunu hinukufwa nanzala.

¹⁸Nukunyamuka kwami niyi kudi tata, nakamwili nami, Tata, navulumuni Nzambi wamwiwulu, navulumuni nineyi nawa;

¹⁹hinateli kwami kuntena cheŋi nawu mwaneyuku; aŋiteji mwani kwikala neyi ŋamba yeyi wumu.

²⁰Anyamuka nikunyamuka, aya nikudi tata yindi. Ilaŋa hadiŋiyi wuchidi maaya, tata yindi hakumumona, hakutiya wushona, hakuya lufuchi, hakumukumbata kunshiŋu, hakumupwepujola.

²¹Mwanindi hakumwila nindi, Tata navulumuni Nzambi wamwiwulu, navulumuni nineyi nawa; hinateli kwami kuntena cheŋi nawu mwaneyuku.

²²Ilaŋa tata yindi hakuyila anduŋu jindi nindi, Letenu swayi chi kovwelu chachilehi chochasweja kuwaha, mumuvwikichu; mumushi nikazeya kumunu windi, nimasapatu kunyendu yindi.

²³Letenu mwana kaŋombi wamanji, mumujahi; tudyenu, tuluŋenu;

²⁴muloŋa iwu mwanami iwu wafwili, nahandi cheŋi; wajimbeli, namwekani. Atachika nikuluŋa.

²⁵Ilaŋa mwanindi wamukulumpi wadiŋi mwiha. Chadiŋi nakwinzayi, hakushika kwakwihi netala hakutiya nikwimba nikuhaŋana.

²⁶Hakutambika mukwenzi weyala wumu, hakumwihula nindi, Kunasoŋidi?

²⁷Yena hakumwakula nindi, Mana kweyi nenzi dehi; tata yeyi namujahili dehi mwana kaŋombi wamanji, nanichi chanamutambuliyi cheŋi wamuwenyi, wakola ngu.

²⁸Ilaŋa yena hakuzuwa, kwonti kwindi kwijila mu. Tata yindi hakwidika, hakumulembelela.

²⁹Ilaŋa yena hakumwakula nindi, Nyaka yejimiyi nakukalakelaŋa ho-o, kanda dehi nimotokuhu izu deyi; eyi kunyinka hela mwana kampembi, kulonda niluŋi chimu nawamabwambu jami, nehi.

³⁰Hakwila chanenziyi iwu mwaneyi iwu, wakisaŋana dehi yuma yeyi yakudihandisha nachu nawayivumbi, hiwukumujahila ni mwana kaŋombi wamanji.

³¹Yena hakumwila nindi, Eyi mwanami, twekala neyi mafuku ejima, yuma yami yejima yeyeyi hohu.

³²Twadi kwila ŋahi? Tubuli kuluŋa nikuzaŋalala? Iwu mana kweyi wafwili, nahandi cheŋi; wajimbeli, namwekani.