Read MUKANDA WANZAMBI Luka 16 Bible Online

Luka 16 - MUKANDA WANZAMBI bible

Luka 16

¹Wadiŋi nakalama kindi; yena kalama hiyakumushimuna kudi akwawu, nawu wudi nakukisaŋana yuma yambala yamwanta windi.

²Yena hakumutambi ka, hakumwila nindi, Iyi nsaŋu yeyi yinidi nakutiya yanka? Lumbululaku mwahita wulama weyi; muloŋa wulama weyi wunakumi dehi.

³Owu kalama hakwila mumuchima windi nindi, Ichi chakuntambulayi mwanta wami wulama wami, nukwila ŋahi? Ŋovu jakudima kwosi; kulomba chi kweti nsonyi.

⁴Neluki dehi chinukwila, kulonda chakunfumishawu muwulama akantambuli mumatalawu.

⁵Hakutambika akwanyikudi yamwanta windi ejima; hakumwihula watachi nindi, Mukudi weyi namwanta wami washika mudihi?

⁶Yena nindi, Manji akweseka ngungungu nkulakaji. Hakumwila nindi, Nonaku mukanda weyi wamukudi, shakamaku swayi wusoneki makumi atanu.

⁷Hakumwihula mukwawu nawa nindi, Indi eyi mukudi weyi namwanta wami washika mudihi? Yena nindi, Yesekelu yatidiku nkulakaji. Hakumwila nindi, Nonaku mukanda weyi wamukudi, wusoneki makumi atanu nasatu.

⁸Mwanta windi hakumuhameka owu kalama waheŋa chababeliyi; muloŋa antu ampata yamunu mwishina amakonu, anabadiki akwachejeji kubabala.

⁹Ami nukuyileja nami, yikwatilenu amabwambu hela namaheta akuheŋa, kulonda chiyakamana akayitambuli mwakushakama haya nyaka.

¹⁰Muntu wukushinshika nakachuma kasweja kukeha, wukushinshika nawa ninayuma yayivulu; muntu wukuheŋa nakachuma kasweja kukeha, wukuheŋa nawa ninayuma yayivulu.

¹¹Dichi neyi munabuli kushinshikila maheta akuheŋa, wukuyishila kuhemba maheta alala hinyi?

¹²Neyi munabuli kushinshikila chuma chamukwenu, wukukwinka cheyeyi aweni hinyi?

¹³Ŋambanyi wukutwesha kukalakela anyanta ayedi? Chiŋa yohelahu wumu, yokeŋa mukwawu; hela yokalakela wumu, yodiwula mukwawu. Himunatweshi kukalakela niNzambi nimahetaku.

¹⁴AFwarisi adiŋi akwalwisu, chanatiyuwu yuma yejimiyi hiyakumuseha.

¹⁵Hakuyila nindi, Enu yenu mwadishimunaŋa kudi antu nenu twaloŋa; ilaŋa Nzambi neluki nyichima yenu muloŋa chuma chalemeshaŋawu kudi antu, kumesu aNzambi hichishimashima.

¹⁶Nshimbi niatuprofwetu anakumini hadi Yowanu, ilaŋa kufuma henohu ashimunaŋa nsaŋu yawanta waNzambi yayiwahi, niantu ejima hiyakwijila mu naŋovu.

¹⁷Chapepela iwulu nimaseki kuhita, chakala kuholoka kamufunda kakunshimbi kamu.

¹⁸Muntu wukuseŋa Iŋodindi asumbula wacheŋi, neli wuvumbi; wukusumbula mumbanda anaseŋuwu kudi nfumwindi neli wuvumbi.

¹⁹Kwadiŋi mukwakuheta wumu wavwelaŋa mahina amawahi achinana niatooka, washakaminaŋa nakuluŋa hefuku hefuku.

²⁰Kwadiŋi nawa kazweŋi, ijina dindi Lazaru, amukamikilaŋa kuchisu chindi, mujimba wejima kwayilonda hohu;

²¹wakeŋa elaŋa nindi amudiishaŋa nkúuku jikuholokaŋa kumesa yanowu mukwakuheta; chalala niatuwa hiyakwinzaŋa nakulasha hayilonda yindi.

²²Owu kazweŋi hakufwa, amweleka nikudi aŋelu, amutwala nihantulu yaAbarahama. Mukwakuheta niyena hakufwa, amujiika nikumujiika.

²³Hakufumbwila mesu mukaluŋa mwadiŋiyi, hakukaba nankashi, hakumumwena Abarahama kwakulehi, niLazaru wudi hantulu yindi.

²⁴Hakubilela nindi, Tata Abarahama, antiyili luwi, atemeshi Lazaru atumpi insa yamunu windi mumeji, enzi awundishi idimi dami; ami nidi nakumona yihuŋu mumuzuzu iwu.

²⁵Kutiya Abarahama nindi, Eyi mwanami, anukaku eyi chiwadiŋi mumi, watambwilaŋa yuma yeyi yayiwahi, chochadiŋi nakutambulayi Lazaru yuma yindi yatama; hakwinzichi yena anamukundeji dehi, eyi hiwukumona yihuŋu.

²⁶Hadi nichuma chikwawu; hakachi ketu nanenu ashahu ikela dasweja, kulonda muntu wukukeŋa kufuma kunu enzi kudenu, akakaŋanyi; hela muntu wukukeŋa kufuma oku amotokeli kudetu, akapanyi nawa.

²⁷Yena nindi, Komana neyi ochu, nalembi tata, mutemeshi kwitala datata yami;

²⁸muloŋa ni kweti ana kwami atanu; ayi akayileji, kuchina niwena kwinza munu mwakukaba nankashi.

²⁹Ilaŋa Abarahama nindi, Akweti nyikanda yaMosi niyawatuprofwetu, ayitiyi.

³⁰Ilaŋa yena nindi, Nehi tata Abarahama, neyi muntu afuma mudi afu aya kudi wena, akabalumuka munyichima.

³¹Abarahama hakumwila nindi, Neyi ákubula kutiya Mosi niatuprofwetu, hela muntu wukusaŋuka mudi afu hiyaketiya nihantuku.