Read MUKANDA WANZAMBI Luka 17 Bible Online

Luka 17 - MUKANDA WANZAMBI bible

Luka 17

¹Hakuyila atumbanji twindi nindi, nsaŋu yakudimbwisha antu hijikutwesha kubula kwinzaku, chiŋa jinza hohu; hakwila owu wukujileta, o yihuŋu yakamonayi!

²Muntu wukudimbwisha mwana wanyanya wumu iwu, chikuwaha kumukasa ilola deneni dakuhala kunshiŋu yindi, hikumunatila mukaluŋalwiji.

³Babalenu enu aweni. Neyi mana kweyi nakuvulumuni, muhosholi; neyi nabalumuki mumuchima, mwanakeni.

⁴Neyi ifuku dimu wukukuvulumuna mapampa katanu nakayedi, afunta kudeyi mapampa katanu nakayedi nawa nakwila nindi, Nalembi; kamwanakeni.

⁵Apostolu hiyakumwila Mwanta nawu, Tuvulishili kukuhwelela kwetu.

⁶Mwanta nindi, Neyi mukwi kala nakukuhwelela kwanti kwakweseka nakalubutu kamostadi kamu, mwadi kuwila iwu chilembalemba nenu, Bwitikaku, wuditumbi mukaluŋalwiji; wadi kuyovwahila.

⁷Hadi mwinenwinyi wukweti ŋamba yindi wadimaŋa, indi kwiji wadiishaŋa nyikoku, chakufumayi kwiha amwili nindi, inzaŋa swayi wushakami nakudya?

⁸Abuli kumwila nindi, Loŋeshaku yakudya nidyi, vwalaku chachiwahi wuŋimeni, nidyi, ninwi. Neyi wunakumishi dehi, nineyi aweni wakadyi wakanwi?

⁹Chakwilayi yuma yakumulejawu, wukumusakilila owu ŋamba, tahindi?

¹⁰Dimu mukwila ninenu nawa, neyi muneli yuma yayilejawu yejima, mukuhosha nenu, Tuyaloŋamba amukunkulwayi; tunakumini dakwila kwanyidimu yetu hohu.

¹¹Cheliluwu adi munjila yawu yakuya kuYerusalema, yena wadiŋi nakuhita kuSamariya iku, Ŋaliliya iku, yena mukachi.

¹²Chayiliyi mumukala wumu, hikukumubulakana amayala ikumi akweti musoŋu wambumba, hiyakwimana hahalehi;

¹³hiyakubideka naŋovu nawu, Yesu, Mwanta, tutiyili luwi.

¹⁴Chanayimoniyi, hakuyila nindi, Yenu mwakadimwekeshi kudi atupristu. Chadiŋi nakuyawu, musoŋu wawu wutooka nikutooka.

¹⁵Wumu, chanamoniyi nakoli dehi, hakufunta nakulemesha Nzambi nezu daŊovu.

¹⁶Hakudinata chamesu heseki kunyendu yaYesu nakumusakilila; yenowu muntu wadiŋi kaSamariya.

¹⁷Yesu hakumwihula nindi, Hiyanatookeshi ikumuku? Indi awa atanu nawana adi kudihi?

¹⁸Kwosi nafunti nakumulemesha Nzambi, chiŋa yoyeniwu mwenyi wamwituŋa dacheŋi hohu?

¹⁹Hakumwila nindi, Nyamukaku, yaloŋa kweyi; kukuhwelela kweyi kunakukoleshi dehi.

²⁰Chamwihwiluwu kudi aFwarisi hamba kenza wanta waNzambi, hakuyakula nindi, Wanta waNzambi hiwukwinza nakuwutala namesuku,

²¹hela nakuhosha nawu, Iwu! hela, Owu! Talenu, wanta waNzambi wudi mukachi kenu.

²²Hakuyila atumbanji nindi, Mafuku akenza imwakakeŋa kumona ifuku daMwana kamuntu dimu, himwakadimonaku.

²³Chakahoshawu nawu, Owu! hela, Iwu! bayi mwakafumahu hela kuyilondelaku.

²⁴Hefuku daMwana kamuntu, yena wakela neyi nvula yikukena kumutamba wumu wewulu, kutooka nikumutamba wukwawu.

²⁵Ilaŋa chiŋa yosambila kukaba yuma yayivulu, amuhela kudi antu achisakichi.

²⁶Cheliluwu hamafuku aNowa, dichi chakelawu nihamafuku aMwana kamuntu.

²⁷Adiilaŋa, anwinaŋa, asumbwilaŋa, asumbwishilaŋa, ndo nikwifuku depililiyi Nowa muwatu; dibaji dinza nikwinza, diyijilumuna niwejima wawu.

²⁸Cheliluwu hamafuku aLoti, adiilaŋa, anwinaŋa, alandilaŋa, alandishilaŋa, adiminaŋa, atuŋilaŋa;

²⁹ilaŋa hefuku dafuminiyi Loti muSodoma, kwanokeli kesi, ni kesi kaNzambi kwiwulu, kayijilumwini wejima wawu.

³⁰Mwomumu nawa dimu mwakelawu ifuku dakamwekana Mwana kamuntu.

³¹Ifuku odu muntu wakekala hewulu detala, yuma yindi yidi mwitala, bayi asuluka nakuyitwala kwacheŋuku. Chochimu nimuntu wakekala mwiha, bayi afunta cheŋuku.

³²Anukenu iŋodaLoti.

³³Muntu wukukeŋa kumona wumi windi wakawujimbesha; muntu wukujimbesha wumi windi wakawumona wawuwenyi.

³⁴Nukuyileja nami, hawufuku wenowu amayala ayedi akekala hakadidi kamu; wumu akamutwala, mukwawu wakashala.

³⁵Ambanda ayedi akekala nakutwa hamu; wumu akamutwala, mukwawu wakashala.

³⁶Amayala ayedi akekala mwiha; wumu akamutwala, mukwawu wakashala.

³⁷Hiyakumwihula nawu, Kudihi Mwanta? Yena hakuyila nindi, Kunafwili kanyama, diku kukupompela makubi.