Read MUKANDA WANZAMBI Luka 18 Bible Online

Luka 18 - MUKANDA WANZAMBI bible

Luka 18

¹Hakuyitila chishimu kulonda alombaŋa mafuku ejima chakadi kuzeya,

²nindi, Mumukala weneni wumu mwadiŋi mukwakuso-mpesha wumu wabulili kutiya Nzambi woma, hela kubaŋa antu nehi.

³Mumukalowu mwadiŋi mumbanda wanfwila wumu; yena mumbanda hakuzebaŋa kudi owu mukwakusompesha nindi, Nhosheli muloŋa nasamuloŋa wami.

⁴Hahitili mafuku yena kwonti kwindi; nkumininaku hakwila mumuchima windi nindi, Ami hinatiyaloŋa Nzambi womaku, hela antu kuyibaŋa nehi;

⁵hela chochu, chakuswejayi mumbanda iwu kunzebela, keŋa anzeyeshi tuhu, chakwilayi zebe-e ichi, nukukumina dakumuhoshela muloŋa windi tuhu.

⁶Mwanta wahosheli nindi, Tiyenu chahosheliyi owu mukwakusompesha waheŋa.

⁷Nzambi abuli kutenda antu indi atondayi dehi, amubilelaŋa nimwaana niwufuku, adiwunjikilaŋayi wunjike-e?

⁸Nukuyileja nami hakalaba nakuyitendaku. Hela ochu, chakenzayi Mwana kamuntu, wakawana kukuhwelela hamaseki, tahindi?

⁹Hakutila nawa chishimu antu adikuhwelelaŋa awenawu nawu twaloŋa, hiyakudiwula akwawu ejima,

¹⁰nindi, Antu ayedi akandukili mutembeli akalombi, iwu kaFwarisi, iwu nsonkeshi.

¹¹KaFwarisi hakwimana nakudilombela mumuchima windi nindi, Eyi Nzambi, nakusakilili chinabuli kwikala neyi antu acheŋi, akwanyilami, áheŋa, ayivumbi, hela tuhu neyi iwu nsonkeshi iwu.

¹²Najiŋaŋa nanzala yakuleka kudya hamulungu kayedi, hamulungu kayedi; nalambulaŋa yamwikumi yayuma yinahetaŋa yejima.

¹³Ilaŋa nsonkeshi hakwimana kwakulehi, kumona jakufumbula mesu indi atala kwiwulu nehi; Ilaŋa hakudetola hantulu yindi nindi, Eyi Nzambi, antiyili luwi, ami mukwanshidi.

¹⁴Nukuyileja nami, yeniwu muntu diyi wakunkumukili kwitala dindi nakuyiŋa, bayi iwu mukwawuku; muloŋa muntu wukuditohesha akamukehesha, ilaŋa muntu wukudikehesha akamutohesha.

¹⁵Hiyakumuletela anyanawu anyanya kulonda yena ayikunki; atumbanji chanachimonuwu, hiyakuyihoshola.

¹⁶Ilaŋa Yesu hakuyitambika nindi, Yitejenu anyana anyanya enzi kudami, bayi muyilekeshaku; muloŋa wanta waNzambi wawena adi chochichi.

¹⁷Nukuyileja chalala nami, muntu wukubula kutambula wanta waNzambi neyi mwana wanyanya, hakwijila mu nihantuku.

¹⁸Nyuli wumu hakumwihula nindi, Eyi Nkuluŋaŋa muwahi, nukwila ŋahi kulonda nakaswani wumi wahaya nyaka?

¹⁹Yesu hakumwila nindi, Wukuntenenadi neyi muwahi? Hosi muwahuku chiŋa Nzambi hohu.

²⁰Nshimbi wajiluka dehi nawu, Kwila wuvumbi chinjila. Kujaha muntu chinjila. Kwiya chinjila. Kushimuna wunsahu wakutwamba chinjila. Lemeshaku tata yeyi namama yeyi.

²¹Yena nindi, Yuma yejimiyi nayihemba dehi kufumisha kuwansi.

²²Yesu chanachitiyiyi, hakumwila nindi, Kunashali chuma chimu; landishaku yiwudi nayu yejima, wuyinki atuzweŋi, wuheti maheta amwiwulu; winzi wunlondaŋa.

²³Ilaŋa yena chanachitiyiyi, hakuneŋa nankashi, muloŋa wadiŋi wasweja kuheta.

²⁴Yesu hakumutala, hakwila nindi, O chamonaŋawu akwakuheta kukala kwijila muwanta waNzambi!

²⁵Nŋameli kwijila mudisu dandoŋu chaswayi; mukwakuheta kwijila muwanta waNzambi chakala.

²⁶Antu achitiyili hiyakwila nawu, Indi wamba kahanda hinyi?

²⁷Yena nindi, Yuma yikukaŋanya antu, Nzambi wukuyitwesha.

²⁸Petulu nindi, Tala, etu tunashiyi ayetu, tunakulondi.

²⁹Yena hakuyila nindi, Nukuyileja chalala nami, muntu wukushiya itala, hela Iŋodindi, hela ana kwindi, hela anvwali, hela anyana hansaŋu yawanta waNzambi,

³⁰wukutambula makonu amakwawu amavulu akubadika, nihanyaka yakenza wakatambula wumi wahaya nyaka.

³¹Hakupompesha ikumi nayedi kwadiŋiyi yena, hakuyila nindi, Tiyenu, hitukuya nakukanduka kuYerusalema; yuma yejima yakutena Mwana kamuntu munyikanda yawatuprofwetu yajila yakamana.

³²Muloŋa akamuhana kudi aJentili, akamuseha, akamutiyisha nsonyi nankashi, akamufwŋila mazeŋi,

³³akamuvupola, akamujaha; ifuku damu chisatu wakasaŋuka mudi afu.

³⁴Wena, yuma yejimiyi kuyilumbulukila nehi; izu idi ayijindilidu, kwiluka yuma yahosheliyi nehi.

³⁵Chelili naswili dehi kwakwihi naYeriku, mputamesu wumu washakamini kunsa yanjila nakulomba.

³⁶Chanatiyiyi izaza dawantu hidikuhita, hakwihula nindi, Kunasoŋidi?

³⁷Hiyakumuleja nawu, Yesu wakuNazareta hakuhita.

³⁸Hakubilela nindi, Eyi Yesu, Mwana kaDavidi, ntiyili luwi.

³⁹Atwamininuku hiyakumuhoshola nawu, Mwenaku. Ilaŋa yena hakusweja kubilela nindi, Eyi Mwana kaDavidi, ntiyili luwi.

⁴⁰Yesu hakwimana, hakuyila nindi, Muletenu kudami. Chanashikiyi kwakwihi,

⁴¹hakumwihula nindi, Wunakeŋi nikwilili chumanyi? Yena nindi, Nakeŋi nimonaŋa.

⁴²Yesu hakumwila nindi, Monaku; kukuhwelela kweyi kunakukoleshi dehi.

⁴³Hohenohu yomona nikumona; hakumulonda Yesu nakulemesha Nzambi. Antu ejima chanachimonuwu, hiyakuhameka Nzambi.