Read MUKANDA WANZAMBI Luka 2 Bible Online

Luka 2 - MUKANDA WANZAMBI bible

Luka 2

¹Wena mafuku owu kudi Aŋusitusi Kesari hikukufuma izu dakwila nawu asoneki antu amumatuŋa ejima.

²Diku kusoneka kwatachi kweliluwu hadiŋiyi Kerini nguvulu yaSiriya.

³Dichi antu ejima hiyakuya nakuyisoneka, iwu hamukala wawu, iwu hamukala wawu.

⁴Yosefu niyena hakunyamuka muŊaliliya, kumukala waNazareta, hakuya muYudeya kumukala waDavidi, ijina dawu Betelemi, muloŋa wadiŋi wakwivumu damutaŋa waDavidi;

⁵akamusoneki hamu naMariya oteliyi, henohu nakulishi dehi ivumu.

⁶Chadiŋuwu kwenoku, mafuku akusapuluka awana nikuwana.

⁷Hakuvwala wedi windi weyala, hakumuvuŋavuŋa mwihina, hakumukamika mwadiishililaŋawu ayimuna, muloŋa mwitala dawenyi mwabulili hakukama.

⁸Kwena kwituŋodu kwadiŋi tubiŋa twawanyikoku, adiŋi mwisaŋa nakuhemba nyikoku yawu nawufuku.

⁹Kaŋelu kaYehova hakwimana kwadiŋuwu; lubanji lwakulema kwaYehova hilukuyitoŋekela chejeji kwi-ndo; atiya niwoma nankashi.

¹⁰Kaŋelu hakuyila nindi, Bayi mutiya womaku; tiyenu, nayileteli nsaŋu yayiwahi yamuzaŋalu wasweja, wakekala kudi antu ejima.

¹¹Muloŋa ifuku dalelu, mumukala waDavidi, munavwaliki dehi Chamwinu, diyi Kristu, Mwanta.

¹²Chinjikijilu chimukumwiluka nachu, mukuwana mukeki anamuvuŋavuŋi mwihina, nakami mwadiishililaŋawu ayimuna.

¹³Kukasumuka hadi owu kaŋelu, hihadi izaza dawakwamwiwulu hiyakuhameka Nzambi,

¹⁴nawu, Kudi Nzambi mwiwulu dakubadika kwikali kulema, heseki hekali kuwunda hakachi kawantu atiyaloŋayi kuwaha.

¹⁵Chelili aŋelu anayishiyi dehi anayi dehi mwiwulu, atubiŋa hiyakudileja wumu namukwawu nawu, Tuyenu kuBetelemi katataka, tutali ichichuma chinamwekani chanatulejuwu kudi Yehova.

¹⁶Hiyakuya lufuchi, hiyakuwana Mariya niYosefu, nimukeki nakami mwadiishililaŋawu ayimuna.

¹⁷Chanachimonuwu hiyakutiyakesha nsaŋu yaniwu mwana yayilejeluwu.

¹⁸Antu ejima chanatiyuwu yuma yayilejeluwu kudi atubiŋa hiyakuhayama.

¹⁹Hakwila Mariya wahembeli yuma yejimiyi, hakuyitoŋashana mumuchima windi.

²⁰Atubiŋa hiyakufunta nakulemesha Nzambi, nikumuhameka nayuma yatiyiluwu niyamwenuwu yejima, mwomwayilejeluwu.

²¹Chawanini mafuku atanu nasatu akumwalamisha mwana, anamutumbili ijina dindi nawu YESU, mwomwanamutumbiluwu kudi kaŋelu helili wuchidi kanda amubaabi mwivumu.

²²Chawanini mafuku akuyijilika amwaya nshimbi jaMosi, amuleteli mwana kuYerusalema kulonda kumushikŋa kudi Yehova;

²³mwomwasonekeluwu munshimbi jaYehova nawu, Anyana amayala asambilaŋa kuvwalika ejima, akayitenaŋa nawu ajila, ambala aYehova;

²⁴akahani chimuna chakuketula chasonekawu munshimbi jaYehova, hela tutela tuyedi, hela anyana katupompa ayedi.

²⁵MuYerusalema mwadiŋi muntu wumu ijina dindi Simeyona; yena muntu iwu wadiŋi waloŋa, wukweti kalemesha kakulemesha Nzambi, wadiŋi nakutalila chamba kayikundejawu aIsarela; Spiritu Wajila wadiŋi hadi yena.

²⁶Henohu amumwekeshela dehi kudi Spiritu Wajila nawu hakafwaku, kufwa chiŋa namoni dehi Kristu waYehova.

²⁷Hakwijila mutembeli chakumwendesha kudi Spiritu. Chamuleteluwu mwana Yesu kudi anvwali jindi kulonda amwili mwaya chaaku chakunshimbi,

²⁸hohenohu hakumutambula mumakasa, hakukisula Nzambi nkisu,

²⁹nindi, Ichi dinu eyi Yehova, ŋiteji ami kambuŋeyi niyi chawunda, mwomuwahosha dehi;

³⁰muloŋa namoni dehi namesu ami wamwinu weyi,

³¹wuwunaloŋeshi dehi kumesu anyuza yejima;

³²chejeji chakutoŋekela aJentili, ni kulema kwawantu eyi aIsarela.

³³Tata yindi namama yindi hiyakuhayama yuma yatenenuwu mwana.

³⁴Simeyona hakuyikiswila nkisu, hakumwila mama yindi Mariya nindi, Tiya, iwu mwana anamutoŋoli dehi kwikala wakudimbwisha niwakuhindwisha aIsarela amavulu; kulonda akekali chinjikijilu chakutenawu chatama.

³⁵Eŋa, mpoku yakabali yakapwika mumuchima weyeyi aweni zwa, kulonda kumwekesha yitoŋojoka yajindawu antu amavulu munyichima yawu.

³⁶Hadiŋi nawa kaprofwetu wamumbanda Ana, mwana kaFwanuweli, wakumuza waAsheri; wadiŋi wasweja dehi kukula, kufuma hasumbukiliyi washakamini nanfumwindi nyaka yitanu nayiyedi,

³⁷henohu wela dehi nfwila wanyaka makumi atanu nasatu nanyaka yiwana; hafuminaŋa mutembeluku, wafukaminaŋa niwufuku nimwaana, nakulembelela kwakujiŋojoka nanzala yakuleka kudya.

³⁸Yena mpinji oyu hakwinza, hakusakilila Nzambi, hakumushimuna kudi antu ejima adiŋi nakutalila kukuula kwamba kakúulawu Yerusalema.

³⁹Chanamanishuwu yuma yakunshimbi jaYehova yejima, hiyakufunta kuŊaliliya kumukala wawu awenawu kuNazareta.

⁴⁰Mwana hakuya nakukula, akwata niŋovu, asweja nima ana; amutiya nikuwaha kudi Nzambi.

⁴¹Anvwali jindi ayilaŋa kuYerusalema hamwaka hamwaka hachawija chapaseka.

⁴²Helili nashiki dehi munyaka ikumi nayiyedi, hiyakukanduka kuYerusalema mwomuchaaku chachawijochu.

⁴³Chanawanishuwu mafuku owu hiyakufunta, mwana Yesu hakushala muYerusalema. Anvwali jindi kuchiluka nehi,

⁴⁴atoŋojokeli nawu wudi muchendu. Hiyakwenda lwendu lwefuku dimu, hiyakumukeŋakeŋa hadi awusoku wawu, nihadi akwawu adilukiluwu nawu.

⁴⁵Chabuliluwu kumumona, hiyakufunta cheŋi kuYerusalema nakumukeŋakeŋa.

⁴⁶Chimunahiti mafuku asatu hiyakumuwana mutembeli, nashakami mukachi kawankuluŋaŋa nakutiya nikuyihujola.

⁴⁷Ejima adiŋi nakumutiya ahayamini kashinshi kindi nimwakuyakulayi.

⁴⁸Chanamuwanuwu hiyakuhayama; mama yindi hakumwila nindi, Mwanami wunatukoŋelidi mwenimu? Nitata yeyi ninami tunakukeŋakei nawushona.

⁴⁹Hakuyila nindi, Mwankeŋelaŋadi? Munabulilidi kwiluka nenu ami chiŋa niikalaŋa mwitala daTata yami?

⁵⁰Odu izu dahosheliyi nawena hidayilumbulukililuku.

⁵¹Hakukunkumuka nawu, hakushika nawu kuNazareta; hakuyovwahilaŋa. Mama yindi hakusweka yuma yejimiyi mumuchima windi.

⁵²Yesu hakukula nikumaana nikuchiminu, rinumona nikuwaha nikudi Nzambi nikudi antu.