Read MUKANDA WANZAMBI Luka 20 Bible Online

Luka 20 - MUKANDA WANZAMBI bible

Luka 20

¹Wena mafuku owu, ifuku dimu wadiŋi nakuleja antu mutembeli, nakushimuna nsaŋu yayiwahi, kudi yena hikukwinza awakulumpi jawa tupristu niansoneki niakulumpi.

²Hiyakumwila nawu, Tuleji; eyi welaŋa yumiyi nawantanyi? Indi nakwinki wantiwu hinyi?

³Hakuyakula nindi, Ninami nawa nukuyihula kadizu kamu, munleji.

⁴Chiŋapatishu chaYowanu chakwiwulu, tahindi chakudi antu?

⁵Wena hiyakudihujola nawu, Neyi tukwila netu chakwiwulu, yena wukwila nindi, Mwalekelelidi kumwitiya?

⁶Neyi tukwila netu chakudi antu, akutwasola malola kudi antu ejima; muloŋa wena etiyaloŋa nawu Yowanu wadiŋi kaprofwetu.

⁷Dichi hiyakwakula nawu, Kwiji; hituneluki kuchafuminuku.

⁸Yesu hakuyila nindi, Hela ami hinukuyileja wanta wunelaŋa nachu yumiyuku.

⁹Hakutachika kuyitila antu chishimu chakwila nindi, Muntu wumu wadimini itempa danyivinyu; hakudishila akwakudima, hakuya kwituŋa dacheŋi haleheli chacheni.

¹⁰Hachila aka chanyikabu hakutemeshela akwakudima nduŋu wumu, kulonda amwinki nyikabu yamwitempa ilaŋa akwʼakudima hiyakumweta, hiyakumufuntisha makasakasa.

¹¹Hakutemeshaku ninduŋu mukwawu; niyena nawa hiyakumweta, hiyakumukoŋa chatama, amufuntisha nimakasakasa.

¹²Hakutemeshaku wamuchisatu; niyena nawa hiyakumukatisha, amunata nikumpata.

¹³Mwini itempa danyivinyu nindi, Nukwila ŋahi? Nukutemesha mwanami nakeŋa nankashi, wamba kela akamwakama yena.

¹⁴Ilaŋa akwakudima chanamumonuwu, hiyakutiyaloŋana nawu, Iwu diyi nswana; tumujahenu, kulonda wuswana wikali wetwetu.

¹⁵Hiyakumwidisha mwitempodu, hiyakumujaha. Dichi mwini itempa wakayila ŋahi?

¹⁶Wakenza nakujilumuna awa akwakudima, odu itempa wakenka antu acheŋi. Chanachitiyuwu, hiyakwila nawu, Chinjila!

¹⁷Ilaŋa yena hakuyitala nindi, Idi izu danasonekuwu dakwila nawu, Ilola dalekeli antuŋi dodabalumwinuwu kwikala namutu wewombu, daya mudihi?

¹⁸Antu ejima akuholokela helolodu, akukotoka kotu kotu; hakwila muntu akaholokelawu kudi ilolodu, akamufukumuna neyi lunkuŋu.

¹⁹Yena mpinji oyu ansoneki niakulumpi jawatupristu akeŋeli nawu amukwati, ilaŋa hiyakutiya woma wawantu; muloŋa wena elukili nawu chishimu ichi natili etu.

²⁰Hiyakumweba, hiyakutemeshaku akwakumwendesha adimbeni kumwekana neyi antu aloŋa, kulonda amukwati namazu akuhoshayi, amoni jakumuhana kuŊovu nikuwanta wanguvulu.

²¹Hiyakumwihula nawu, Eyi Nkuluŋaŋa, tuneluki netu eyi wahoshaŋa nikuleja mwaloŋa, hiwatiyaloŋa muntu womaku, walejaŋa njila yaNzambi chalala.

²²Chaloŋa etu kusonka kudi Kesari, tahindi nehi?

²³ilaŋa yena wamweni makasu awu,

²⁴hakuyila nindi, Nlejenu idali. Dikweti chifwikija chanyi, ninsona yanyi? Nawu, YaKesari.

²⁵Kuchinka yena nindi, Dichi mwinkenu Kesari yuma yaKesari; mwinkenu Nzambi yuma yaNzambi.

²⁶Chanahoshiyi mazu owu kumesu awantu, hiyamweni hakumushintakeshelaku; akuminini dakuhayama mwakwiliyi, amwena nizo.

²⁷Kudi yena hikukwinza aSadusi amakwawu, elaŋa nawu afu hiyasaŋukaŋaku.

²⁸Hiyakumwihula nawu, Eyi Nkuluŋaŋa, Mosi watusonekeleli nindi, neyi muntu wukweti mana kwindi ofwa chakadi kumushiya Iŋodindi namwana, mana kwindi akatambuli mumbanda, akamuvweli mana kwindi mwana.

²⁹Dichikwadiŋi amayala atanu nayedi ivumu dawu dimu. Watachi wasumbwili mumbanda, wafwili wakadi anyana;

³⁰niwamuchiyedi, niwamuchisatu chochu.

³¹Wejima wawu atanu nayedi ihochu nawa, afwili, kushiya anyana nehi.

³²Nkumininaku mumbanda niyena ofwa ni kufwa.

³³Dichi hamba kasaŋukawu afu, mumbanda wakela iŋoda wumwodihi? muloŋa mwatanu nayedi amusumbwili.

³⁴Yesu hakuyila nindi, Antu anyakiyi asumbulaŋa, asumbukaŋa;

³⁵ilaŋa antu anafuukuluwu nawu anateli kushika kunyakoyu, nikukusaŋuka mudi afu, hiyakasumbula hela kusumbukaku.

³⁶Muloŋa hela kufwa, hiyakatwesha kufwa cheŋuku; anabwambuli dehi nawaŋelu, hiyanyana kaNzambi anasaŋuki dehi.

³⁷Hakwila nsaŋu yakusaŋuka, hela Mosi wayilejeli, oku kwasonekawu nsaŋu yachiputa, hateneniyi Yehova nindi, Yami Nzambi yaAbarahama, Nzambi yaIsaka, Nzambi yaYakoba.

³⁸Yena hiNzambi yawafuku, hiNzambi yawamomi; muloŋa ejima amuhandilaŋa yena.

³⁹Ansoneki amakwawu hiyakwakula nawu, Eyi Nkuluŋaŋa, wunahoshi chachiwahi.

⁴⁰Muloŋa atiyili woma wakumwihula cheŋi chuma chikwawu.

⁴¹Hakuyila nindi, Chelaŋawu nawu Kristu himwana kaDavidi, chaya mudihi?

⁴²Muloŋa Davidi yomweni namuteni mumukanda waMasamu nindi, Yehova wamwilili Mwanta wami nindi, Shakamaku kuchikasa chami chachidiilu,

⁴³nichinamba kayila ayilumbu jeyi hiyadi itanda dakunyendu yeyi.

⁴⁴Davidi wamutenaŋa nindi Mwanta; wukwi kala mwanindi ŋahi?

⁴⁵Hakuyila atumbanji twindi, iku antu ejima adi nakumutiya,

⁴⁶nindi, Babelenu ansoneki, atiyaloŋa kuwaha kuvwalavwala mahina akuluka, akeŋa kuyimwosha kuwulandilu, akeŋa matanda alema mumashikola, akeŋa kushakama halema kuyawija;

⁴⁷hiyakulomba lombe-e kulomba kwakudimbana nachu, iku adi nakudya matala awambanda anfwila. Diwu amba kamona kuhisha kwasweja.