Read MUKANDA WANZAMBI Luka 22 Bible Online

Luka 22 - MUKANDA WANZAMBI bible

Luka 22

¹Henohu chawija chakudya mankendi akadi iluŋi, chi kweti ijina dapaseka, hichikuswila kwakwihi.

²Akulumpi jawatupristu niansoneki hiyakukeŋa hakumujahila, muloŋa atiyili antu woma.

³Satana hakwijila mudi Yudasi atumbawu ijina di kwawu daIsakaroti, wadiŋi wahekumi nayedi.

⁴Hakuya, hakutiyaloŋana nawawakulumpi jawatupristu niakulumpi janjita, mwakumuhena kudi wena.

⁵Atiya nikuwaha; hiyakutiyaloŋana nindi kumwinka mali.

⁶Yena hakwitiya, hakukeŋa hatela kumuhenena kudi wena hakadi izaza dawantu.

⁷Chidinashiki ifuku damankendi akadi iluŋi, dajahaŋawu paseka,

⁸hakutemesha aPetulu naYowanu nindi, Yenu namutuloŋesheli paseka, twakadyi.

⁹Wena hiyakumwihula nawu, Wunakeŋi tuloŋesheli kudihi?

¹⁰Yena hakuyila nindi, Chimukushika muŋanda, kukuyibulakana iyala nasendi nsaba yameji; mwakamulondi mwitala mwakwijila yi.

¹¹Mwakamwili mwini itala nenu, Nkuluŋaŋa neliuli nindi, Itala dawenyi dinakadiila paseka nawatumbanji twami didihi?

¹²Yena wakayileja itala dahewulu deneni, mudi yuma yakupoŋomwena dehi; dimu mwakaloŋeshela.

¹³Hiyakuya, hiyakuwana mwomwayilejayi; aloŋesha nipaseka.

¹⁴Chiyinashiki mpinji, hakushakama hamu nawapostolu.

¹⁵Hakuyila nindi, Nafwili kudya nenu pasekiyi, hinichidi kanda nikabi.

¹⁶Muloŋa nukuyileja nami, kuyidya cheŋi, chiŋa yinalumbuluki dehi chalala muwanta waNzambi.

¹⁷Hakutambula lupasa, chanasakililiyi hakwila nindi, Tambulenu lwenilu munwi wejima wenu.

¹⁸Ami nukuyileja nami, kufumisha kulelu hinakanwa cheŋi yanyikabu yamuvinyuku, kunwa cheŋi, chiŋa wanta waNzambi wunenzi dehi.

¹⁹Hakunona dinkendi, chanasakililiyi hakudihumuna, hakuyinka, nindi, Weniwu diwu mujimba wami wanahanuwu hanyijimba yenwenu; ilenuŋa mwenimu muŋanakanaŋa nachu.

²⁰Mwomumu nawa, cheliluwu anadyi dehi, hakunona lupasa nindi, Lupasilu dichi chitiyaŋenu chachiha chamumashi ami, awa akuyipwekela.

²¹Talenu, chikasa chanfukeji chidi hamu nachami hamesa.

²²Muloŋa Mwana kamuntu chalala hakuya, mwomwatoŋweluwu dehi; o yihuŋu yakamona muntu wukumufukeja!

²³Wena hiyakutachika kudihujola nawu mukwetwinyi wukwila chumichi?

²⁴Mukachi kawu himukuvulumuka ntaai yakwila nawu mwinetwinyi aketejawu nawu nabadiki akwawu?

²⁵Yena hakuyila nindi, Anyanta jawaJentili ayiyulaŋa; niakweti wanta mukachi kawu ayitenaŋa nawu akwakuwahisha akwawu.

²⁶Ilaŋa enu bayi mwilaŋa omuku. Nabadiki akwawu mukachi kenu ekali neyi kansi, niwalema ekali neyi mukwakukalakela akwawu.

²⁷Muloŋa nabadiki hinyi, wakalakalaŋa, tahindi iwu nashakami nakudya? Netu, iwu nashakami nakudya. Ilaŋa ami nidi mukachi kenu nimukwakukalakala.

²⁸Enu munakakeli kushakama nanami mwanaŋesekuwu;

²⁹ami nukuyikunjika wanta wenu, neyi chankunjikiluwu ami kudi Tata yami,

³⁰kulonda mwakadyi nakunwa kumesa yami muwanta wami, mwakashakami hamatanda awanta nakusompesha nyuza yaIsarela ikumi nayiyedi.

³¹Eyi Shimona, Shimona, Satana nayilombi dehi kulonda ayisali neyi tidiku;

³²ilaŋa ami nakulembeleli kulonda kukuhwelela kweyi kubulikukaŋanya. Nineyi, chiwakabalumuka mumuchima, wakakoleshaŋa ana kweyi.

³³Petulu hakumwila nindi, Mwanta neteji kuya naneyi hela mukaleya hela tuhu kufwa.

³⁴Hakumwila nindi, Eyi Petulu, nukukuleja nami, ikombu kwidikila lelu chiŋa eyi wunasambili dehi kudikala kasatu neyi hinamwiluka Yesuku.

³⁵Hakuyila nindi, Chinayitemesheli chakadi hela chikwama hela ipakumuna hela nkwabilu, mwakaankilili chuma, tahindi? Nawu, Nehi.

³⁶Hakuyila nindi, Ichi dinu, yowu wukweti chikwama asendi, niipakumuna chochimu; nabuli mpoku yakabali alandishi kahuma kindi kulonda alandi yimu.

³⁷Muloŋa nukuyileja nami, chuma chasonekeluwu chakuntenami chakwila nawu, Amubombeli bamu nawakwakuputola; keŋa chilumbulukili mudami. Muloŋa nsaŋu jasonekawu dehi jejima jakuntenami keŋa jimani.

³⁸Wena nawu, Mwanta, tala mpoku jatubali jiyedi ŋi. Yena hakuyila nindi, Jinawani.

³⁹Hakwidika, hakuya kumpidi yaOliveta neyi chelilaŋayi; atumbanji niwena hiyakumulondela.

⁴⁰Chanashikiyi kwayilaŋayi, hakuyila nindi, Lombenu mubuli kwijila mukweseka.

⁴¹Hakwambuka nawu kuleha neyi mwakunatila ilola, hakufukama nakulomba,

⁴²nindi, Eyi Tata, neyi wuneteji anfumishi lupasilu; ilaŋa bayi ela munakeŋamuku, chiŋa muwunakeŋeyi.

⁴³Hikukumumwekena kaŋelu wakufuma mwiwulu nakumukolesha.

⁴⁴Hakulwisha nankashi, hakusweja kulomba; masulwilindi hiyakwila kafwampi neyi malekileki amashi aweni hiyakuholokela hamaseki.

⁴⁵Hakunyamuka kukulomba kwindi, hakwinza kudi atumbanji, hakuyiwana anakami dehi tulu twakuneŋa.

⁴⁶Hakuyila nindi, Munakaminidi tulu? Hindukenu mulombi, mubuli kwijila mukweseka.

⁴⁷Iku wuchidi kuhosha, kutala izaza dawantu, ninowu wahekumi nayedi wukweti ijina daYudasi, natwaminuku. Hakwinza kwakwihi naYesu amupwepuli.

⁴⁸Ilaŋa Yesu hakumwila nindi, Eyi Yudasi, wufukeji Mwana kamuntu nakupwepula?

⁴⁹adiŋi nindi, chanamonuwu chakukeŋa kwilawu, hiyakwila nawu, Mwanta tutapani nampoku yakabali, tahindi?

⁵⁰Mwinawu wumu hakutapa ŋamba yakapristu muneni, kutapa kwakumuketula itu dachidiilu.

⁵¹Yesu hakwila nindi, Nlekenu ntahi. Yokunka niitu dindi, yomukuswisha nikumukuswisha.

⁵²Yesu hakuyila awakulumpi jawatupristu niakulumpi jamashidika akutembeli, niakulumpi jawantu enjili nakumukwata, nindi, Munenzi nampoku jatubali nanyitondu neyi chakukwata ikombi?

⁵³Chinadiŋi nenu mutembeli hefuku hefuku, enu himwolweli makasenu nakunkwataku. Ilaŋa iyi himpinji yenu, hiŋovu yamwidima.

⁵⁴Hiyakumukwata, hiyakumutwala nakumwiŋija mwitala dakapristu muneni. Petulu hakulondela hahalehi.

⁵⁵Chanabutuluwu kesi muchipaŋu, hiyakushakama hamu, Petulu niyena hakushakama nawu.

⁵⁶Chaŋadima wumu chanamumoniyi nashakami kuchejeji chakesi, hakumushinshika nindi, Iwu muntu niyena wadiŋi nindi.

⁵⁷Yena hakudikala nindi, Eyi mumbanda, hinamwilukaku.

⁵⁸Chihanalehi chanti, mukwawu hakumumona, nindi, Nineyi wumwinawu. Petulu nindi, Eyi iyala, ami hinimwinawuku.

⁵⁹Chihanahiti neyi mpinji yimu, mukwawu hakumulamata nindi, Iwu muntu, chalala wadiŋi nindi, muloŋa niyena hikaŊaliliya.

⁶⁰Petulu nindi, Eyi iyala, ami kwami kwiluka chiwudi nakuhosha nehi. Iku wuchidi kuhosha, ikombu edikila nikwidikila.

⁶¹Mwanta hakushetumuka, hakumutala Petulu. Petulu hakwanuka mazu aMwanta amwililiyi nindi, Lelu hakela ikombu wuchidi kanda edi kili, wakadikala kasatu neyi hinamwilukaku.

⁶²Hakwidika muchipaŋu nakudila chacheni.

⁶³Amayala adiŋi amukwata Yesu hiyakumuseha nikumweta.

⁶⁴Amukasa niihina hamesu, hiyakumwila nawu, Profwetaku! Nakweti hinyi?

⁶⁵Amuhosheli chatama yuma yi kwawu yayivulu, nikunamutuka.

⁶⁶Chikunachi awakulumpi jawaYudeya hiyakupompa nawawakulumpi jawatupristu niansoneki; hiyakumutwala muchota chawu,

⁶⁷nawu, Neyi wuKristu, tuleji. Hakuyila nindi, Neyi nukuyileja, himukwitiyaku.

⁶⁸Hela nukuyihula, himukuŋakulaku.

⁶⁹Kufumisha hanu, Mwana kamuntu akamushakamisha kuchikasa chaNzambi chachidiilu chaŋovu.

⁷⁰Wejima wawu hiyakwila nawu, Komana, eyi wuMwana kaNzambi? Yena nindi, Mwomwenomu mumunahoshi, muloŋa dichi chinidi.

⁷¹Wena nawu, Tukeŋi nawa wunsahu wukwawu? Tunamutiyi dehi etu aweni kukanwa kindi yomweni.