Read MUKANDA WANZAMBI Luka 23 Bible Online

Luka 23 - MUKANDA WANZAMBI bible

Luka 23

¹Izaza dawantu dejima hidikunyamuka, hidikumutwala kudi Pilatu.

²Hiyakutachika kumwinka nyiloŋa nawu, Muntu iwu tunamuwani wudi nakuluwaŋesha muza wetu, nakulekesha kusonka kudi Kesari, nakwila nindi yomweni diyi Kristu, mwanta.

³Pilatu hakumwihula nindi, Komana eyi wuMwanta wawaYudeya? Yena hakumwakula nindi, Mwomwenomu muwunahoshi.

⁴Pilatu hakuyila awakulumpi jawatupristu nimazaza awantu nindi, Muntu iwu hinamumoni namuloŋaku.

⁵Wena hiyakusweja kutata nawu, Wayikoleshaŋa antu hamesu, nakuyileja muYudeya mwejima, kutachika kuŊaliliya nikunu.

⁶Pilatu chanachitiyiyi hakwihula nindi, Iwu muntu hikaŊaliliya, tahindi?

⁷Chanelukiyi nindi himuntu wakuwuloŋu waHerodi, hakumutemesha kudi Herodi, muloŋa yena wadiŋi kuYersalema hawena mafuku owu.

⁸Herodi chanamumoniyi Yesu, hakutiya kuwaha nankashi, muloŋa hakeŋeleliyi kumumona hanalehi dehi, muloŋa wamutiya dehi nsaŋu jajivulu. Hakukuhwelela nindi kwiji keŋa amumoni nakwila chinjikijilu chimu.

⁹Hakumwihula mazu amavulu, yena kumwakula nehi.

¹⁰Akulumpi jawatupristu niansonelu hiyakwimana kwenoku nakumwinka nyiloŋa naŋovu yayeni.

¹¹Herodi hakudibomba namashidikindi nakumusawula nikumuseha. Hakumuvwika mahina awanta, hakumufuntishilayi cheŋi Pilatu.

¹²Herodi naPilatu akwata niwubwambu dena ifuku odu, muloŋa hásambilili adiŋi adikwata nkunyi.

¹³Pilatu hakupompesha awakulumpi jawatupristu nianyuli niantu hamu.

¹⁴Hakuyila nindi, Munanleteh muntu iwu nenu himuntu waluwaŋeshaŋa antu; talenu, munamoni chinamweseki dehi muntu iwu, ami hinamumoni namuloŋa wansaŋu yimunamwinkeli muloŋaku.

¹⁵Kaŋanyahu Herodi; natufuntishiliyi. Tiyenu, hanakoŋi chuma chakutela kufwaku.

¹⁶Dichi nukukumina dakumuvupula, nimuumbuku.

¹⁷Hachawija ochu wenjilila dehi kuyumbilaku muntu wamukaleya wumu.

¹⁸Wejima wawu avwakuka niipumba nawu, Iwu muntu waadi! Tuumbiluku Baraba;

¹⁹yena amushili mukaleya hansaŋu yakuleta njita muŋanda, niyawubanji.

²⁰Pilatu hakuyihosha cheŋi, muloŋa wakeŋa eli kumuumbaku Yesu.

²¹Wena hiyakubidika nawu, Mupopelenu kukulusu! Mupopelenu kukulusu!

²²Hakuyila kamuchisatu nindi, muloŋanyi? Chuma chatama chanakoŋiyi iwu muntu, chumanyi? Hinamumoni nachitelaku. Nukukumina dakumuvupula, nimuumbuku.

²³Wena asweja nikuvwakuka naŋovu, hiyakulomba nawu amupopeli kukulusu. Mwahosheluwu musweja niŋovu.

²⁴Pilatu hakuketula nsaŋu nindi eli mwanalombuwu.

²⁵Hakumuumbaku owu alombeluwu, ashiluwu mukaleya hansaŋu yanjita niwubanji; hakwinza Yesu hakumuhana nindi amwili mwomwaya muchima wawu.

²⁶Chadiŋi nakumutwalawu, hiyakukwata muntu, Shimona wakuKireni, wadiŋi nakufuma mwisaŋa, hiyakumutwika kulusu amusendeluku Yesu munyima.

²⁷Hikukumulondela izaza dawantu deneni, nidawambanda hiyakutumpa makumbu akumudila.

²⁸Yesu hakushetumuka kudi wena nindi, Enu anyana awambanda amuYerusalema, bayi mundilamuku, didilenu enu aweni, ni anyanenu.

²⁹Tiyenu, mafuku akenza akela nawu, Anakooleki anshinta, nimavumu abulili kuvwala nimayeli abulili kwamwisha.

³⁰Henohu amba katachika kuyila mapidi amaneni nawu, Tuhinukilenu; nimpidi janyanya nawu, Tubutenu.

³¹Mutondu wutuuta awila chochichi, indi mutondu wawuma amba kawila ŋahi?

³²Kwadiŋi amakwawu ayedi, akwanyiloŋa, atweluwu hamu nindi kulonda ayijahi.

³³Chanashikuwu oku kwatenaŋawu nawu, Kuchaŋu, hiyakumupopela kukulusu kwenoku, niakwanyiloŋa, wumu kuchikasa chindi chachidiilu, mukwawu kuchimunswa.

³⁴Yesu hakwila nindi, Tata, yanakeni; chadi nakwilawu hiyanachilukuku. Hiyakudipaŋila mahinindi nachinjikijilu chakusakula nachu.

³⁵Antu hiyakwimana nakutalaku. Anyuli niwena hiyakumuseha nawu, Waamwinini akwawu, muleki adamwini yomweni, neyi diyi Kristu waNzambi, windi atondayi.

³⁶Mashidika niwena nawa hiyakumuseha, hiyakwinza kudi yena nakweseka kumwinka walwawabatuka,

³⁷nakwilanawu, Neyi wuMwanta wawaYudeya, damwini.

³⁸Hewulu hadiŋiyi ashiluku mukanda wakusoneka nawu, Iwu diyi Mwanta wawaYudeya.

³⁹Mukwanyiloŋa wumu wawena apopeleluwu kumakulusu, hakunamutuka nindi, Eyi hiwuKristuku? Damwini eyi aweni ninetu kumu.

⁴⁰Mukwawu hakumuhoshola nindi, Eyi kweyi, hela Nzambi hiwamutiyaloŋa womaku? kutoŋa nineyi anakuhishili kumu.

⁴¹Etu kwetu chinatuteleli, hitukutambula wufwetu wanyidimu yetu; hakwila iwu muntu hakweti kamuloŋa nikantuku.

⁴²Hakwila nindi, Eyi Yesu, kaŋanukaŋa chiwakenza muwanta weyi.

⁴³Yesu hakumwila nindi, Nukukuleja chalala nami, lelu nukwi kala neyi muparadisa.

⁴⁴Henohu hashika dehi neyi kwiji ora yamuchitanu nayimu, mwidima wuholoka ni mwituŋa dejima, ndo nikwora yamuchitanu nayiwana.

⁴⁵Itaŋwa diiyila nibwi, niihina dakujika mutembeli mwajila ditabuka nihakachi.

⁴⁶Yesu chanabileliyi nezu daŊovu, hakwila nindi, Tata, nashi spiritu yami mumakaseyi. Chanahoshiyi mwenomu yotula niwumi windi.

⁴⁷Senturinu chanamoniyi yuma yejimiyi, hakulemesha Nzambi nindi, Iwu chalala wadiŋi muntu waloŋa.

⁴⁸Mazaza ejima awuŋili nakutala chumichi, chanamonuwu yuma yeliluwu, hiyakufunta kwaawu nakudetola hantulu jawu.

⁴⁹Ejima adilukiliyi nawu niambanda afuminiyi nawu kuŊaliliya, hiyakwimena hahalehi nakutala yumiyi.

⁵⁰Kutala iyala ijina dindi Yosefu, wakumukala wawaYudeya ijina dawu Aramateya,

⁵¹wadiŋi mukwachota chawu; muntu wamuwahi waloŋa, hetejeli mpùŋa yawu, hela mwakoŋeluwuku; wadiŋi nakutalila wanta waNzambi.

⁵²Yeniwu Yosefu hakuya kudi Pilatu, hakulomba mujimba waYesu.

⁵³Hakuwukulula, hakuwujiŋajiŋa mwihina ditooka, hakuwukamika mwijamu dakupokola mwilola, kanda ajiikaŋamu dehi muntuku.

⁵⁴Dadiŋi ifuku dakuloŋesha paseka; sabata hiyikuswila kwakwihi.

⁵⁵Ambanda afuminiyi nawu kuŊaliliya, hiyakulondela munyima, hiyakutala ŋamu nichakamikiluwu mujimba windi.

⁵⁶Hiyakufunta nakuloŋesha nyitondu yamavumba amawahi, nimalasha. Hasabata hiyakunooka mwaya lushimbi.