Read MUKANDA WANZAMBI Luka 24 Bible Online

Luka 24 - MUKANDA WANZAMBI bible

Luka 24

¹Hefuku damuchimu damulungu, hiyakwinza kwijamu hankunku yakucha, anasendi nyitondu yamavumba amawahi yanaloŋeshuwu.

²Hiyakuwana ilola anadilaŋumuni dehi, anadifumishi kwijamu.

³Hiyakwijila mu, kuwana mujimba waMwanta Yesu mwosi.

⁴Chadiŋi nakujinokawu chumichi, kutala amayala ayedi anemani kwakwihi, anavwali mahina atoŋeka chejeji.

⁵Ambanda hiyakutiya woma, anoŋama nimesu awu hamaseki. Owu amayala hiyakwila nawu, Mudi nakukeŋeladi wamumi mukachi kawafu?

⁶Hadi munuku, wasaŋuka dehi mudi afu. Anukenu chayilejeliyi hadiŋiyi muŊaliliya,

⁷nindi, Mwana kamuntu chiŋa akamuhana kumakasa awakwanshidi, akamupopela kukulusu, wakasaŋuka mudi afu hefuku damu chisatu.

⁸Hiyakwanuka mazu indi,

⁹hiyakufuma kwijamu kwayiluwu, hiyakuleja ikumi nawumu ni akwawu ejima yuma yejimiyi.

¹⁰Owu ambanda adiŋi niMariya Mandaleni, niYowana, niMariya mama yaYakoba, hamu nawambanda amakwawu nawa, hiyakuleja apostolu yumiyi.

¹¹Mazu awa hiyakuyitiya neyi adi nakuhosha tuhu; kuyiteja kwawu nehi.

¹²Petulu hakunyamuka, hakuya lufuchi kwijamu, hakubandama nakutalamu; hakumona mahina atooka adi hakanka wawu. Hakufunta kwiindi nakujinoka yuma yanamoniyi.

¹³Kutala akwawu ayedi adi nakuya ifuku dodenodu kumukala ijina dawu Emawusi, wekala chintampu naYerusalema makilometa ikumi nayimu.

¹⁴Adiŋi nakuhanjika yuma yinamwekani yejima.

¹⁵Chadiŋi nakuhanjikawu nakudihujola, yomweni Yesu hakukundama kwakwihi, hakwenda nawu.

¹⁶Ilaŋa mesu awu akaŋenyi kumwiluka.

¹⁷Hakuyila nindi, Oyu nsaŋu yimudi nakuya nakuhosha, nsaŋwinyi? Wena hiyakwimana ku-ka nakudihomba.

¹⁸Wumu ijina dindi Kiŋa, hakumwakula nindi, Eyi yeyi mwenyi kanka weyi muYerusalema, wunabuli kwiluka yuma yinamwekanumu mafuku anu?

¹⁹Hakuyila nindi, Yumanyi? Wena hiyakumwakula nawu, YaYesu wakuNazareta, wadiŋi kaprofwetu wasweja nikunyidimu yindi nikumazu indi, kumesu aNzambi ni kumesu awantu;

²⁰ninichi chamuhanawu kudi awakulumpi jawatupristu hamu nawanyuli jetu, akamuhishi muloŋa wakumujaha, amupopela nikukulusu.

²¹Ilaŋa etu twadiŋi nakukuhwelela netu diyi wukukeŋa kukuula Isarela. Eŋaŋi, hayuma yejimiyi hanalundami nsaŋu yi kwawu; lelu ifuku damu chisatu kufumisha helawu yumiyi.

²²Akwetu ambanda amenekela kwijamu anatuhayamishi.

²³Chawanawu mujimba windi mwosi, hiyakwinza nakwila nawu amona chimwenu chawaŋelu ela nawu yena wamumi.

²⁴Akwetu amakwawu twadiŋi nawu aya kwijamu, amona mwomwashimunawu ambanda, ilaŋa yena kumumona nehi.

²⁵Yena hakuyila nindi, Mayalenu, o chimwasupa, o chimwalemendenda kwitiya yuma yejima yahosheli atuprofwetu!

²⁶Hichawahilili Kristu kukabakana yumiyi, akeŋili nimukulema kwinduku?

²⁷Hakuyilumbulwila munyikanda yajila, kutachika hadi Mosi niatuprofwetu ejima, yuma yatenenuwu yomweni.

²⁸Cheliluwu hiyakushika kwakwihi namukala kwadiŋi nakuyawu, yena hakwila nindi apandakani.

²⁹Ilaŋa wena hiyakumushinjila nawu, Kamaku hanu hetu, muloŋa kuneli dehi melela, itaŋwa dahita dehi. Yena hakwijila ashakami nawu.

³⁰Chanashakamiyi nawu nakudya, hakunona dinkendi, hakukisula nkisu, hakudihumuna, hakuyinka.

³¹Mesu awu atona nikutona, amwiluka nikumwiluka. Yena hakujimina kumesu awu.

³²Hiyakudileja wumu namukwawu nawu, Twatiyilahu munyichima yetu mumavumu busu, chadiŋi nakutulejayi munjila, chadiŋi nakutulumbulwilayi nyikanda yajila.

³³Hiyakunyamuka mpinji yoyenoyu, hiyakufunta kuYerusalema, kuwana ikumi nawumu anapompi dehi hamu, ninawa adiŋuwu nawu.

³⁴Wena nawu, Chalala Mwanta nasaŋuki mudi afu, wamwekana dehi nikudi Shimona.

³⁵Akwawu ayedi hiyakushimuna yuma yanamonuwu munjila, nichanamwilukuwu hakuhumuna dinkendi.

³⁶Hadiŋi nakuhoshawu yumiyi, kukasumuka yomweni Yesu nemani dehi mukachi kawu. Hakuyila nindi, Kuwunda kwikali nanenu.

³⁷Ilaŋa wena hiyakutiya woma, afwa nimutentu, hiyakutoŋojoka nawu tunamoni muŋamu.

³⁸Yena hakuyila nindi, Munaakaminidi? Mukudihujoleladi munyichima yenu?

³⁹Talenu makasami ninyendu yami, yami aweni hohu. Nkwatakwatenu muntiyi; muŋamu hakweti musunyi nimafwaha, neyi ichi chimunanmonamuku.

⁴⁰Chanahoshiyi ochu, hakuyileja makasindi ninyendu yindi.

⁴¹Iku achidi kanda etiyi namuzaŋalu wawu nikujinoka, yena hakuyila nindi, Kunu mukweti yakudya?

⁴²Hiyakumwinka chibalu chanshi chakuteleka dehi, ninamutu wawuchi.

⁴³Yena hakutambula, hakudya, iku adi nakumutala.

⁴⁴Hakuyila nindi, Diwu mazu nahosheli hinadiŋi nanenu, akwila nami, yuma yasonekeluwu munyikanda yajila yejima, yamunshimbi jaMosi, nimudi atuprofwetu, nimumasamu yantenenuwu, chiŋa yakalumbuluka hohu.

⁴⁵Hakujikula kashinshi kawu kulonda eluki mwalumbulukila nyikanda yajila.

⁴⁶Hakuyila nindi, Anasoneki nawu Kristu chiŋa akakaba, akasaŋuka mudi afu ifuku damu chisatu;

⁴⁷akashimwaŋena mwijina dindi nsaŋu yakubalumuka mumuchima, nikuyanakena nyiloŋa, mwahita nyuza yejima, kutachikila kuYerusalema.

⁴⁸Nindi, Enu yenu ayinsahu yayumiyi.

⁴⁹Tiyenu, nukutemesha hadenu kukana kwakaniniyi Tata yami; ilaŋa chiŋililenu muŋanda, kushika nihakayivwikawu Ŋovu yakufuma kwiwulu.

⁵⁰Hakuyilombola nichashikiluwu kwatalaŋana naBetani. Hakwolola makasindi kwiwulu, hakuyikiswila nkisu.

⁵¹Iku wudi nakuyikiswila nkisu hakwambuka nawu, amutwala nimwiwulu.

⁵²Wena hiyakudifukula munyichima yawu, hiyakufunta kuYerusalema namuzaŋalu waweni.

⁵³Hiyakwikalaŋa mutembeli hefuku hefuku nakumukiswila Nzambi nkisu.