Read MUKANDA WANZAMBI Luka 3 Bible Online

Luka 3 - MUKANDA WANZAMBI bible

Luka 3

¹Chanashakamiyi Kesari Tiberusi muwanta nyaka ikumi nayitanu, hadiŋiyi Pontusi Pilatu nguvulu yamuYudeya, hadiŋiyi Herodi mwanta wikuŋalihya, mana kwindi Fwilipu mwanta wakumpata yakuItureya naTarakonita, niLisaniyasi mwanta wakuAbileni;

²hadiŋuwu aAnasi naKayafwasi atupristu amaneni, izu daNzambi hidikwinza kudi mwana kaZakariya, Yowanu, hadiŋiyi mwisaŋa.

³Yena hakwinza mumatuŋa ejima adiŋi kwakwihi naYodana, nakushimuna kupapatisha kwakubalumuka mumuchima kulonda kwanakena antu nyiloŋa;

⁴neyi chanasonekuwu mumukanda wamazu akaprofwetu Isaya nawu, Mbila yamuntu wukubidika mwisaŋa nindi, Loŋeshenu mwakendelayi Yehova, ololenu njila jindi jatulolu.

⁵Akashikili yinekineki yejima, akashikumuni mapidi ejima ninyikandu yejima; akololi haheŋa, akalambishi njila jamankulokela.

⁶Antu ejima akamoni chakayamwinawu kudi Nzambi.

⁷Dichi yena hakuyila mazaza ayili kudi yena nakuyipapatisha nindi, Enu anyana katubandayula, mwayikonkomweneni kutemuka kuzuwa kwakenza hinyi?

⁸Ilenu yuma yatelela antu anabalumuki munyichima. Bayi mutachika kuhosha munyichima yenu nenu tukweti nkakulula yetu Abarahamaku. Tiyenu niyileji, nami Nzambi natweshi kutetula anyana kaAbarahama mumalolawa.

⁹Katataka anashi dehi chizembi kumuji wanyitondu; dichi nyitondu yejima yikubula kusoŋa nyikabu yayiwahi akayitemamu, akayinatila mukesi.

¹⁰Mazaza hiyakumwihula nawu, Indi dinu chiŋa twila ŋahi?

¹¹Hakuyakula nindi, Muntu wukweti yi kovwelu yiyedi amwinkuhu mukwawu nabuli, niwukweti yakudya eli mwomumu nawa.

¹²Ansonkeshi hiyakwinza kudi yena nawu ayipapatishi, hiyakumwila nawu, Eyi nkuluŋaŋa, etu tukwila ŋahi?

¹³Hakuyila nindi, Bayi mudyaloŋa yanyilami nakubadisha mwayilejawuku.

¹⁴Mashidika niwena nawa hiyakumwihula nawu, Etu nawa tukwila ŋahi? Hakuyila nindi, Bayi mukabisha muntuku, hela kutwambila muntu; kuminenu dakutiya kuwaha nawufwetu wenu.

¹⁵Chadiŋi nakujinokawu antu, antu ejima hiyakutoŋojoka munyichima yawu nawu kwiji diyi Kristu.

¹⁶Yowanu hakuyakula wejima wawu nindi, Chalala ami nayipapatishaŋa mumeji, ilaŋa kudi nakwinza wambadika Ŋovu, mwonji wankwabilu jindi ami kutela kuwusubula nehi; diyi wakayipapatisha mudi Spiritu Wajila nakesi.

¹⁷Muchikasa chindi mudi lwalu lwakutookesha nachu mwitala dindi dakuhulila; wakapompesheli tidiku munkalaŋa yindi, hakwila mafulu wakayocha mukesi kakajimaŋa.

¹⁸Dichi hakuyishimwina antu nsaŋu yayiwahi, nikuyilejaleja mazu amakwawu amavulu.

¹⁹Ilaŋa Mwanta Herodi, chanamukonkololuwu kudi Yowanu nansaŋu yaŋodamana kwindi Herodiya, niyuma yi kwawu yatama yelilaŋayi Herodi yejima,

²⁰hakulunjikaku nichuma chikwawu chakumusha Yowanu mukaleya.

²¹Chelili namanishi dehi kupapatisha antu ejima to-o, niYesu anamupapatishi dehi, yena Yesu hakulomba, iwulu hidikubaluka;

²²Spiritu Wajila hakuzelumukila hadi yena namujimba wudi neyi katela; mwiwulu himukufuma izu nawu, Yeyi Mwanami nakeŋa, natiyaloŋa kuwaha nankashi mudeyi.

²³Henohu Yesu nashiki dehi kafwampi munyaka makumi asatu, hiyakumutoŋojoka nawu mwana kaYosefu; ankakulula jindi adiŋi iwu Heli,

²⁴iwu Matata, iwu Levi, iwu Meliki, iwu Yanayi, iwu Yosefu,

²⁵iwu Matatiyasi, iwu Amosa, iwu Nahumi, iwu Eseli, iwu Naŋayi,

²⁶iwu Mayata, iwu Matatiyasi, iwu Semeni, iwu Yoseki, iwu Yoda,

²⁷iwu Yowanani, iwu Resa, iwu Zerubabeli, iwu Sheyaleteli, iwu Neri,

²⁸iwu Meliki, iwu Adi, iwu Kosama, iwu Elimadama, iwu Eri,

²⁹iwu Yesu, iwu Eliyezeri, iwu Yorimi, iwu Matata, iwu Levi,

³⁰iwu Simeyona, iwu Yudasi, iwu Yosefu, iwu Yonama, iwu Eliyakimi,

³¹iwu Meleya, iwu Mena, iwu Matata, iwu Natani, iwu Davidi,

³²iwu Jesi, iwu Obedi, iwu Bowazi, iwu Salemoni, iwu Nashoni,

³³iwu Aminadabi, iwu Arama, iwu Hezeroni, iwu Perezi, iwu Yuda,

³⁴iwu Yakoba, iwu Isaka, iwu Abarahama, iwu Tera, iwu Nahori,

³⁵iwu Seruŋa, iwu Rewu, iwu Peleka, iwu Eberi, iwu Shela,

³⁶iwu Kanani, iwu Arafwasadi, iwu Shemi, iwu Nowa, iwu Lameki,

³⁷iwu Metusela, iwu Enoki, iwu Yareda, iwu Mahaleli, iwu Kanani,

³⁸iwu Enosi, iwu Seti, iwu Adama, mwana ka Nzambi.