Read MUKANDA WANZAMBI Luka 4 Bible Online

Luka 4 - MUKANDA WANZAMBI bible

Luka 4

¹Yesu hakufuma kuYodana kwayiliyi, wenzala Spiritu Wajila, hiyakumutwalaŋa kudi Spiritu mwisaŋa, mwahita mafuku makumi awana, iku adi nakumweseka kudi diyabolu.

²Wena mafuku owu hadiili chumaku; chamanini mafuku owu hakutiya nzala.

³Diyabolu hakumwila nindi, Neyi wuMwana kaNzambi, hoshaku ilolidi dibalumuki dinkendi.

⁴Yesu hakumwakula nindi, Anasoneki nawu, Muntu hahandaŋa namankendi hohuku.

⁵Hakumutwala hewulu, hakumuleja mawanta amunu mwishina ejima yena mpinji oyu.

⁶Diyabolu hakumwila nindi, Nukukwinka mawantawa ejima ni kulema kwawu, muloŋa ananyinkuwu ami; yonsu muntu inakeŋi kwinka nukumwinkawu.

⁷Dichi neyi eyi wukudifukula kudami, wejima wukwi kala weyi.

⁸Yesu hakumwakula nindi, Anasoneki nawu, Kadifukulaŋa kudi Yehova Nzambi yeyi, diyi wakakalakelaŋa kanka windi hohu.

⁹Hakumutwala kuYerusalema, hakumusha hewulu datembeli, hakumwila nindi, Neyi wuMwana kaNzambi, dinati mwishina;

¹⁰muloŋa anasoneki nawu, Wakakulejela aŋelu jindi akakuhembaŋa;

¹¹akakwaka namakasawu wakenza kahuma mwendu weyi kwilola.

¹²Yesu hakumwakula nindi, Aneli nawu, Bayi wakamweseka Yehova Nzambi yeyuku.

¹³Diyabolu chanamanishiyi kweseka kwejima, hakufuma kudi yena, nindi amoni hekwawu hakamwesekelayi.

¹⁴Yesu hakufunta kuŊaliliya naŋovu yaSpiritu; mpuhu yindi hiyikutiyakana mwahita mbadi yejimoyu.

¹⁵Hakuleja antu mumashikolawu, hiyakumuhamekaŋa kudi antu ejima.

¹⁶Hakwinza kuNazareta kwamuleleleluwu; hakwijila mushikola hefuku dasabata neyi chelilaŋayi dikalu, hakwimana nakutaŋa.

¹⁷Hiyakumwinka mukanda wakaprofwetu Isaya. Hakubakula mukanda,

¹⁸hakuwana hanasonekuwu nawu, Spiritu yaYehova wudi hadami, muloŋa wanwayisha dehi manji nishimwini atuzweŋi nsaŋu yayiwahi; nantemeshi kulonda nibidiki ankoli nsaŋu yakuyisubula, niamputamesu atoni; kulonda kuyumbaku antu anachikuwu,

¹⁹nishimuni mwaka waYehova wunawahi dehi.

²⁰Hakujika mukanda, hakumwinkawu cheŋi mukwakuwimena, hakushakama; antu ejima adiŋi mushikola hiyakumuhuŋunwina mesu, hiyakumushinshika swi-i.

²¹Hakutachika kuyila nindi, Nsaŋu iyi yasonekeluwu yinalumbuluki kumatu enu lelu.

²²Antu ejima hiyakumwiteja, hiyakuhayama mazu amawahi afumini kukanwa kindi; hiyakwila nawu, Hidiyi mwana kaYosefuku?

²³Hakuyila nindi, Keŋa muntili chishimu chakwila nenu, Eyi chimbuki, duki eyi aweni. Yejima yitunatiyi yiwuneli kuKaperinawu, yili nikunu kwituŋa deyeyi aweni nawa.

²⁴Hakuyila nindi, Nukuyileja chalala nami, kwosi kaprofwetu etejaŋawu mwituŋa dindi yomwenuku.

²⁵Mwalala nukuyileja nami hanyaka yadiŋiyi Elija, hakwatiluwu nvula nyaka yisatu natukweji tutanu nakamu, haholokeli nzala yeneni mwituŋa dejima muIsarela, mwadiŋi ambanda anfwila amavulu.

²⁶Hiyatemesheli Elija kudi wenaku, chiŋa kuZarefwati hohu, mwituŋa daZidoni, kudi mumbanda wanfwila.

²⁷Nihadiŋi kaprofwetu Elisha, muIsarela mwadiŋi akwambumba amavulu; hosi atookesheluwuku chiŋa kaSiriya Nayamani hohu.

²⁸Ejima adiŋi mushikola chanatiyuwu ochu, nyichima yawu yisweja nindombu;

²⁹avwavumoka nikuvwavumoka, hiyakumushinjeka nawu afumi mumukala; hiyakumutwala kumukumu wampidi yatuŋiluwu mukala wawu, kulonda amukunwinuku.

³⁰Yena hakuhanuka mukachi kawu, hakudiyila kwindi.

³¹Hakukunkumuka kuKaperinawu, mukala wakuŊaliliya. Hakuleja antu hasabata.

³²Hiyakuhayama kuleja kwindi, muloŋa mazu indi adiŋi nawanta.

³³Mushikola mwadini muntu wazakukaŋa demoni wazonda, hakubilela nezu daŊovu,

³⁴nindi, Aka! EyiYesuwa kuNazareta, tudineyi nansaŋu? Wunenzi dehi nakutukisaŋana, tahindi? Nakwiluki yeyi Mukwakujila wambala waNzambi.

³⁵Yesu hakumuhoshola nindi, Mwenaku, fumaku mudi muntu. Demoni amunata ninowu muntu mukachi kawu, afuma nimudi yena, nikumukatisha nehi.

³⁶Antu ejima hiyakuhayama, hiyakuhosha muntu namukwawu nawu, Awa mazu anka? Hakuleja ademoni azonda nawanta niŋovu, hiyakufuma mudi antu.

³⁷Mpuhu yindi yitiyakana nikwejima ndo.

³⁸Hakunyamuka, hakufuma mushikola, hakwijila mwitala daShimona. Mawenu yaShimona wadiŋi wakata mashika aweni, hiyakumulembelelayi.

³⁹Hakwimana kwadiŋiyi yena, hakuhoshola mashika, amufuma nikumufuma; hohenohu yohinduka nikuhinduka, hakuyikalakela.

⁴⁰Chelili itaŋwa hidikuya nakuhuma, ejima adiŋi nawakwawu akata nyisoŋu yeŋi nayeŋi, hiyakumuletelawu; hakuyinaŋika makasindi wejima wawu, hakuyuka.

⁴¹Ademoni niwena hiyakufuma mudi antu amavulu nakukaloka nawu, Yeyi Mwana kaNzambi. Hakuyihoshola, hayiteja kuhoshaku, muloŋa amwilukili nawu diyi Kristu.

⁴²Chikunachi, hakwidika hakuya mwisaŋa, mazaza awantu hiyakumukeŋakeŋa. Chanamuwanuwu, hiyakukeŋa nawu amwimiki abuli kufuma.

⁴³Yena hakuyila nindi, chiŋa nishimwina nsaŋu yawanta waNzambi yayiwahi nikunyikala yi kwawu yinashali nawa; muloŋa dichi chantemesheleluwu.

⁴⁴Hakushimunaŋa mumashikola amuŊaliliya.