Read MUKANDA WANZAMBI Luka 6 Bible Online

Luka 6 - MUKANDA WANZAMBI bible

Luka 6

¹Hasabata yimu wadiŋi nakuhita mumaha atidiku; atumbanji twindi hiyakukotola nyitu yatidiku, hiyakuchikita mumakasawu, hiyakudya.

²AFwarisi amakwawu hiyakwila nawu, Mudi nakwililadi chuma chajila kwila hasabata?

³Yesu hakuyakula nindi, Himunataŋi cheliliyi Davidi, hatiyiliyi nzala hamu nanowu adiŋiyi nawuku, tahindi?

⁴Hepililiyi mwitala daNzambi, hakutambula mankendi akutenteka kumesu aNzambi, hakudya, hakwinkaku ninawa adiŋiyi nawu, adiŋi ajila akudya, chiŋa atupristu hohu.

⁵Hakuyila nindi, Mwana kamuntu diyi Mwanta wasabata.

⁶Hasabata yacheŋi nawa, hakwuŋila mushikola nakuleja antu; mwadiŋi muntu wawulepa wachikasa chachidiilu.

⁷Ansoneki nawaFwarisi hiyakumutala, amoni neyi wukuuka hasabata, kulonda amoni hakumwinkela muloŋa.

⁸Yena welukili yitoŋojoka yawu; hakumwila owu muntu wachikasa chawulepa nindi, Nyamukaku, wimani mukachi. Yena hakunyamuka, hakwimana mukachi.

⁹Yesu hakuyila nindi, Nayihuli nami, hasabata chaloŋa kwila chachiwahi, tahindi kwila chatama? kuhandisha muntu, tahindi kumujaha?

¹⁰Hakuyitala wejima wawu kwi-ndo, hakumwila owu muntu nindi, Ololaku chikasa cheyi. Ela nikwila, chikasa chindi chikola nikukola.

¹¹Wena asweja nikuzaluka, hiyakutiyaloŋana muntu namukwawu mwakamukoŋawu Yesu.

¹²Wena mafuku owu hakuya hampidi nakulomba, hakuchiisha nakulomba kudi Nzambi wufuku wejima.

¹³Chikunachi hakutambika atumbanji twindi, hakutondahu ikumi nayedi, hakuyitumba nindi apostolu.

¹⁴Shimona hakunamutumba ijina di kwawu nindi Petulu, namana kwindi Anderi, Yakoba naYowanu, Fwilipu naBatolomewu,

¹⁵Matewu naTomasi, Yakoba mwana kaAlafwewu naShimona atenaŋawu nawu kaZeloti,

¹⁶niYuda waYakoba, niYudasi Isakaroti diyi wamufukejeli.

¹⁷Hakukunkumuka nawu, hakwimana hasalala nezaza dawatumbanji twindi dadeni; niantu amavulu nankashi afumafumini mwahita Yudeya yejima, nikuYerusalema, nikuchikumu chakaluŋalwiji chakuTira naZidoni, enjili nakumutiya kulonda akayuki ninyisoŋu yawu.

¹⁸Hakuuka akabishilaŋawu kudi ademoni azonda.

¹⁹Izaza dejima hidikukeŋaŋa yowu kumukunka hohu; muloŋa mudi yena mwedikilaŋa Ŋovu yakuuka wejima wawu.

²⁰Yena hakufumbula mesu indi hadi atumbanji twindi, hakuyila nindi. Enu atuzweŋi munako-oleki, muloŋa wanta waNzambi wunekali wenu.

²¹Enu mudi nakutiya nzala katataka munako-oleki, muloŋa mwakekuta. Enu mudi nakudila katataka munako-oleki, muloŋa mwakaseha.

²²Chakayihelawu kudi antu, nichakayikinjikawu, nichakayisawulawu, nichakayitenawu nawu mwatama kukoola Mwana kamuntu, munakooleki.

²³Kazaŋalalenu dena ifuku odu, nikukiloka chikupu. Tiyenu, amba kayinka wufwetu weneni mwiwulu, muloŋa dichi chayililuwu atuprofwetu kudi ankakulula.

²⁴Hakwila enu mwaheta, o yihuŋu yimwamba kamona! muloŋa anayikundeji dehi.

²⁵O nzala yimwamba katiya enu munekuti katataka! O vihuŋu yimwamba kamonenu mudi nakuseha katataka! mwamba kadila nikutumpa.

²⁶O yihuŋu yimwamba kamonenu adi nakuhamekawu kudi antu ejima! muloŋa dichi chahamekeluwu atuprofwetu akutwamba kudi ankakulula.

²⁷Ilaŋa enu mudi nakutiya, nukuyileja nami keŋenu ayilumbu jenu, koŋenu chachiwahi antu akuyihela.

²⁸Antu akuyishiŋa yikiswilenu nkisu; akuyikoŋa chatama yilombelenu.

²⁹Muntu wukukweta kwikidi dimu, mwinki nidikwawu nawa; muntu wukukutambula chi kovwelu cheyi, atambuli nikahuma keyi nawa.

³⁰Yinkenuŋa antu ejima akuyilomba; muntu wukutwala yuma yeyi, bayi wakamwihulayi nawa cheŋuku.

³¹Mwomukukeŋa antu kuyilenu ninenu nawa yililenu wena chochimu.

³²Neyi mukukeŋa ayikeŋenu hohu, akuyihamekela hadihi? Hela akwanshidi akeŋaŋa ayikeŋa nawa.

³³Neyi mukwilaŋa chachiwahi awa akuyilenu chachiwahi hohu, akuyihamekela hadihi? Dichi chelaŋawu niakwanshidi.

³⁴Neyi mukusondamishaŋa ntu mwakuchiŋeja nenu akayifuntishila cheŋi, akuyihamekela hadihi? Hela akwanshidi asondamishaŋa kwawu akwanshidi, atambuli cheŋi yahenenuwu.

³⁵Ilaŋa keŋenu ayilumbu jenu, ilenuŋa chachiwahi, sondamishenuna chakadi kwakama; wufwetu wenu wakatoha, mwakekala nianyana kaMukwakubadika; muloŋa yena watiyilaŋa luwi niantu abulaŋa kusakilila, niatama

³⁶Ikalenu akwaluwi neyi chekalayi Tata yenu mukwaluwi.

³⁷Bayi musompeshaŋa akwenuku, kulonda ninenu akabuli kuyisompesha. Bayi mutanyishaŋa kwenuku, kulonda ninenu nawa akabuli kuyitanyisha. Anakenenuŋa akwenu, kulonda akayanakeni ninenu nawa.

³⁸Hanenuŋa, kulonda ninenu nawa akayinki; chesekelu chakushikija, chakunyikumuna, chenda chisumpoka, akayinki muwutambwilu wenu. Muloŋa chesekelu chimukuyesekela akwenu, dichi chakayesekelawu ninenu nawa.

³⁹Hakuyitila nawa chishimu nindi, Mputamesu wukutwesha kulombola mukwawu mputamesu, tahindi? Mwayedi wawu hiyakukulukila mwibukuku?

⁴⁰Kambanji habadikaŋa nkuluŋaŋa yinduku; muntu himuntu neyi nadizi dehi, wukwesekana kwanankuluŋaŋa yindi hohu.

⁴¹Wukutaliladi kachuma kanalakumukili mudisu damana kweyi, hakwila chipamba chidi mudisu deyeyi aweni hiwunachimonuku?

⁴²Indi eyi wukutwesha kumwila mana kweyi ŋahi neyi, Eyi mana kwami, tali nikutumbuli kachuma kanalakumukili mudisu deyi; hakwila chipamba chidi mudisu deyeyi aweni hiwunachimonuku? Eyi nfwikŋi, sambilaku kufumisha chipamba chidi mudisu deyeyi aweni, mwaka winzi wumoni kutumbula chachiwahi kachuma kanalakumukili mudisu damana kweyi.

⁴³Hikwekala mutondu wawuwahi wasoŋaŋa nyikabu yatamaku; hela mutondu watama hiwasoŋaŋa nawa nyikabu yayiwahuku.

⁴⁴Muloŋa nyitondu yejima ayilukilaŋa kwokunyikabu yayu, iwu nanyikabu yawu, iwu nanyikabu yawu. Antu hiyakumunaŋa mawundu achikuyu kunyiŋaku; hiyakumunaŋa nyikabu yavinyu kuchikwataku.

⁴⁵Muntu wamuwahi wukwidisha nawa yuma yayiwahi yaswekayi mumuchima windi; muntu watama wukwidisha nawa yoyuma yatama, muloŋa kanwa kindi kahoshaŋa yoyuma yalumbama mumuchima.

⁴⁶Mwantenanaŋadi nenu, Mwanta, Mwanta; hakwila yuma yinahoshaŋa himwayilaŋaku?

⁴⁷Ejima akwinza nakutiya mazu inahoshaŋa, hiyakwilamu, tiyenu niyileji anafwanuwu.

⁴⁸Anafwani neyi muntu watuŋili itala, wapundili chakunama, hakusha chikuku helola. Chenjili dibaji, cheji hichikweta hetalodu, hichatwesheli kudinyinkeshaku, muloŋa aditupilili helola.

⁴⁹Hakwila watiyaloŋa chakadi kwilamu, nafwani neyi muntu watuŋili itala heseki damukunkulu. Cheji chichineti italodu, hohenohu dihumuka nikuhumuka buvu; kuhumuka kwetalodu kwaswejeli kutoha.