Read MUKANDA WANZAMBI Luka 7 Bible Online

Luka 7 - MUKANDA WANZAMBI bible

Luka 7

¹Chelili nakumishi dehi kuhosha yihosha yindi yejima kumatu awantu, hakuya muKaperinawu.

²Senturinu wumu wadiŋi nanduŋu yindi aswejeliyi kukeŋayi nankashi, wakatili hakukeŋa kufwa.

³Chanatiyiyi mpuhu yaYesu, hakumutemeshela awakulumpi jawaYudeya, kulonda enzi nakumuhandisha nduŋu yindi.

⁴Wena chanashikuwu kudi Yesu, hiyakumulembelela nankashi nawu,

⁵Himuntu watela kumwilila chumichi kudeyi; muloŋa wakeŋa a muza wetu, diyi nawa watutuŋilili shikola yetu.

⁶Yesu hakuya nawu. Chanashikiyi kwakwihi netala, owu senturinu hakutemeshaku amabwambu jindi akamwili nawu, Eyi Mwanta, bayi wudikabakeshaku, muloŋa ami hinimuntu wakutela kwiŋileyi mwitala damuku.

⁷Dichi chinabuli kwinza ami aweni kudeyi, nadimoni nami ami hinimuntu wakutela kwinza kudeyuku; dichi ahoshi mwani kwezu hohu, mukwenzi wami wukukola.

⁸Muloŋa ninami nawa nimuntu ni kweti anyanta jami, hela ami aweni ni kweti mashidika aŋovwahilaŋa. Nelaŋa iwu nami, Yaŋa; hakuya. Mukwawu nami, Inzaŋa; hakwinza. Nduŋu yami nami, Ilaku chumichi; hakuchila.

⁹Yesu chanatiyiyi yumiyi hakumuhayama, hakushetumuka, hakwila izaza dadiŋi nakumulondela nindi, Nayileji nami, kanda nimonaŋahu dehi kukuhwelela kwasweja chi kuma hanichuku, hela muIsarela mwamweni.

¹⁰Owu atemesheluwu, chanafuntuwu kwitala, hiyakuwana owu nduŋu nakoli dehi.

¹¹Chihanalehi chanti, hakuya kumukala wumu ijina dawu Nena; wayili niatumbanji twindi, niizaza deneni.

¹²Chanashikiyi kwakwihi nachisu chamukala, kutala anatembeki mufu, himwana weyala wasemuka kanka windi, mama yindi wadiŋi nfwila nawa; hiyakumutwalaku kudi antu amavulu ahamukalowu.

¹³Mwanta chanamumoniyi, hakumutiyila wushona, hakumwila nindi, Bayi wudilaku.

¹⁴Hakuswila kwakwihi hakukunka kumutembu; atembekeli hiyakwimana ku-ka. Hakwila nindi, Eyi mukwenzi, nakwili nami hindukaku.

¹⁵Owu wafwili ashakama nikushakama, atachika nikuhosha; hakumwinkayi mama yindi.

¹⁶Woma wuyikwata niwejima wawu; hiyakumuhameka Nzambi nawu, Mukachi ketu munamwekani dehi kaprofwetu muneni. Cheŋi nawa nawu, Nzambi nenzi dehi nakutala antu indi.

¹⁷Mpuhu yindi yitiyakana nimwahita Yudeya yejima, nikumutamba wejimowu.

¹⁸Atumbanji twaYowanu hiyakumuleja Yowanu yuma yejimiyi.

¹⁹Yowanu hakutambika atumbanji twindi ayedi, hakuyitemesha kudi Mwanta amwihuli nawu, Eyi yeyi elaŋawu nawu wakenza, tahindi tutalili wacheŋi?

²⁰Wenowu amayala chanashikuwu kudi Yesu, hiyakumwila nawu, Yowanu Mpapatishu natutemeshi nakukwihuleyi nindi, Yeyi elaŋawu nawu wakenza, tahindi tutalili wacheŋi?

²¹Yena mpinji oyu hakukolesha niantu amavulu adiŋi nanyisoŋu, niadiŋi nayipupu, niadiŋi nawademoni, hakutonesha niamputamesu amavulu.

²²Yesu hakuyakula nindi, Yenu mwakamuleji Yowanu yuma yimunamoni niniyi yimunatiyi; amputamesu hiyakutona, akwakubalakata hiyakwenda chachiwahi, akwambumba hiyakutooka, ajika matu hiyakutiya, afu hiyakuyisaŋula, atuzweŋi hiyakuyishimwina nsaŋu yayiwahi.

²³Muntu nabuli kumona mudami nsaŋu yakudimbwisha nakooleki.

²⁴Chineli antemesha jaYowanu anayi dehi, hakutachika kuhosha namazaza awantu nsaŋu yaYowanu nindi, Mwayili nakutaladi mwisaŋa? Iteti datepokaŋa nampepela, tahindi?

²⁵Mwayili nenu mwakamonidi? Muntu navwali mahina amawahi, tahindi? Avwalaŋa yawanta, aleŋana, wowu ekalaŋa muyipaŋu yawanyanta ankanu.

²⁶Mwayili nenu mwakamonidi? Kaprofwetu, tahindi? Eŋa, nayileji nami hikaprofwetu wabadika nankashi atuprofwetu ejima.

²⁷Diyi yeniwu asonekeluwu nawu, Tiya, nukutemesha ntemesha yami kuwukuya, akaloŋeshaŋahu dehi njila yeyi kumbidi kuwakaya.

²⁸Tiyenu niyileji, anavwaliki kudi ambanda, hosi niwumu wamubadika Yowanuku; ilaŋa muntu nakehi muwanta waNzambi namubadiki yena.

²⁹Chanachitiyuwu, antu ejima niansonkeshi apapatishawu dehi nachipapatishu chaYowanu, hiyakumwiteja Nzambi nawu waloŋa.

³⁰Hakwila aFwarisi nawakwanshimbi, chalekeluwu kuyipapatisha kudi Yowanu, alekeli mpùŋa yayifuukwililuwu kudi Nzambi.

³¹Yena nindi, Awa antu achisakichi nukuyifwikija neyi anyi? Anafwani neyi anyi?

³²Anafwani neyi atwansi ashakama kuwulandilu akuditambeka nawu, Tunayimbili mahululu, enu kuhaŋana nehi; tunatumpi, enu kudila nehi.

³³Muloŋa Yowanu Mpapatishu nenzi chakadi kudya mankendi, hela kunwa vinyu, enu nenu wukweti demoni.

³⁴Mwana kamuntu nenzi nakudya nakunwa, enu nenu. Talenu, muntu wafwa hakudya, wanwaŋa vinyu, ibwambu dawansonkeshi nawakwanshidi.

³⁵Dichi maana ayiyiŋishaŋa kudi anyanawu ejima.

³⁶KaFwarisi wumu wakeŋa eli Yesu adiyi nindi. Yesu hakwijila mwitala danowu kaFwarisi, hakushakama nakudya.

³⁷Kumukalowu kwadiŋi mumbanda mukwanshidi, chelukiliyi nindi Yesu nashakami nakudya mwitala dakaFwarisi, hakuleta malasha amuchipunda chelola dalubanji.

³⁸Hakwimana nakudila kunyendu yaYesu kunyima, hakutachika kuzowesha kunyendu yaYesu namadilu indi, hakuyikombola nansuki jakunamutu windi, hakupwepujola kunyendu yindi, hakuyiwayisha wenowu malasha.

³⁹Chanachimoniyi owu kaFwarisi wamutambi kili, hakuhosha mumuchima windi nindi, Iwu neyi hikaprofwetu, mutenowu neluki chadiyi iwu mumbanda mukwanshidi namukunki.

⁴⁰Yesu hakumwakula nindi, Eyi Shimona, nidi nakadizu kakuhosha neyi. Yena nindi, Hoshaŋa Nkulupaŋa.

⁴¹Nindi, Kwadiŋi akwanyikudi ayedi adiili yambala yamukwakusondamisha wumu; iwu wadiili mukudi wamakulakaji amali atanu, mukwawu wamakumi atanu.

⁴²Mwayedi wawu chanakaŋanyuwu jakufuta, hakuyanakena tuhu kwindi. Wukubadika kumukeŋa nankashi wumwodihi?

⁴³Shimona hakumwakula nindi Natoŋojoki nami owu aanakeneniyi yayivulu. Yesu hakumwila nindi, Wunahoshi mwalala.

⁴⁴Hakushetumukila kwadiŋi owu mumbanda, hakumwila Shimona nindi, Wunamoni iwu mumbanda? Ami nepili mwitala deyi, eyi kunyinka meji akunwelesha kunyendu yami nehi, hakwila iwu mumbanda nazoweshi kunyendu yami namadilu indi, nayikomboli nansuki jindi.

⁴⁵Eyi kumpwepula nehi, hakwila iwu mumbanda, kufumisha hineŋila hanaleki kupwepujola kunyendu yamuku.

⁴⁶Eyi kunwayisha manji kunamutu wami nehi, hakwila iwu mumbanda nawayishi nyendu yami malasha.

⁴⁷Dichi nukukuleja nami nyiloŋa yindi yayivulu anamwanakeniyi; dihu hanafumi kunkeŋa nankashi. Hakwila muntu aanakenuwu nyiloŋa yantesha, wukunkeŋa nawa chantesha.

⁴⁸Hakumwila owu mumbanda nindi, Nyiloŋa yeyi anakwanakeniyi.

⁴⁹Antu ashakamini nakudya, hiyakutachika kuhosha munyichima yawu nawu, Iwu muntu wukwanakena antu nyiloŋa, diyinyi?

⁵⁰Yena hakumwila owu mumbanda nindi, Kukuhwelela kweyi kunakuhandishi dehi; yaloŋa nakuwunda.