Read MUKANDA WANZAMBI Luka 8 Bible Online

Luka 8 - MUKANDA WANZAMBI bible

Luka 8

¹Chihanalehi chanti, Yesu hakuya nakuhitahita nimunyikala yamaneni nimunyikala yanyanya, hakuyishimwina nikuyitwela nsaŋu yawanta waNzambi yayiwahi, hamu nekumi nayedi,

²niambanda amakwawu okayi dehi ademoni, niyikatu; Mariya atenaŋawu nawu Mandaleni, mwafumini ademoni atanu nayedi;

³niYowana iŋoda Chuza kalama kaHerodi, niSuzana, ni akwawu amavulu adiŋi nakumukalakela namahetawu.

⁴Chikunapompi izaza dadeni, niantu amunyikala yamaneni ejima chanahwiluwu kudi yena, hakuyitila chishimu,

⁵nindi, Mukwakukuwa wayili nakukuwa mbutu yindi. Chakuwiliyi, yi kwawu yaholokeleli kunsa yanjila, hiyakuyidata nanyendu, hiyakuyidya kudi atujila ahaluzwizu.

⁶Yi kwawu yaholokeleli helola, chiyinabaluki hohenohu yuma nikuuma, muloŋa yabulili meji.

⁷Yi kwawu yaholokeleli munyiŋa, nyiŋa hiyikukulila hamu nambutu, hiyikuyijika.

⁸Yi kwawu yaholokeleli hamaseki amawahi, hiyikukula hiyikusoŋa, yadiŋi ibaŋu dimu hiyikwikala nkulakaji. Chanahoshiyi yumiyi hakubidika nindi, Yowu wukweti matu akutiya atiyi.

⁹Atumbanji twindi hiyakumwihula mwaya chishimu ichi.

¹⁰Yena hakuyila nindi, Enu anayiteji kwiluka nsaŋu jawanta waNzambi jajindawu, hakwila acheŋi akujitiyilaŋa muyishimu hohu; kulonda hela akumona, abuli kumona jiika, kutiya, akutiya kushinshikamu nehi.

¹¹Dichi tiyenu mwaya chishimu ichi. Mbutu himaza aNzambi.

¹²Akunsa yanjila, wowu antu akwila chakuyitiyawu, diyabolu hakwinza nakuhukula mazu munyichima yawu, akenda kwitiya hiyakuhanda.

¹³Ahelola, wowu antu akwila chakuyitiyawu, hiyakutambula mazu namuzaŋalu; wena muji nehi, akwitiya kapinji kanti, chakamonawu yuma yakuyeseka, hiyakusenukamu.

¹⁴Yaholokeleli munyiŋa, wowu antu akwila chakutiyawu, hiyakudiyila kwawu; kwakama, nimaheta, nikutiya kuwaha nayuma yawumi wunu, hiyikuyijika, kusoŋa chalala nehi.

¹⁵Yahamaseki amawahi, wowu antu atiyaloŋa mazu namuchima wawu wawuwahi walumbuluka, hiyakuyikwata naŋovu, hiyakusoŋa nikutatakenamu chikupu.

¹⁶Muntu habutulaŋa inoŋu adisweka mwibaŋu hela muchaliluku, wadishaŋa hamesa kulonda antu akwijila mwitala akamoni to-o.

¹⁷Muloŋa hikwekala chuma chabutaŋawu chikubula kumwekana hatookaku; hela chuma chakujinda chikubula kutiyakanaku, chikwidika hatooka.

¹⁸Dichi babelenu chimukutiya; muloŋa muntu wukweti diyi akwinkawu; muntu wabula, akamutambula aka kanamoniyi nindi wudi naku.

¹⁹Kudi yena hikukwinza mama yindi nawana kwindi, hiyakukaŋanya kushika kudi yena naluntu iwadiŋuku.

²⁰Hiyakumuleja nawu, Mama yeyi nawana kweyi anemani hanzi, anakukeŋi.

²¹Hakuyakula nindi, Mama yami nawana kwami wowawa akutiya mazu aNzambi hiyakwilamu.

²²Wena mafuku owu, ifuku dimu hakwijila muwatu wumu, niyomweni niatumbanji twindi. Hakuyila nindi, Tuzambukenu kwishinadi dejiya; ashinjika niwatu.

²³Chadiŋi nakwendawu[1] yena aya ninamutulu; hejiya hihakukunka mpepela yasweja Ŋovu, watu hiwukuya nakwinzala meji, hivakukeŋa kufwa.

²⁴Hiyakwinza nakumuhindwisha nawu, Mwanta, Mwanta, tunafwi! Hakuhinduka, hakuhoshola mpepela nimeji adiŋi nakubwankaŋila, amwena nizo-o, kuwunda nibe-te-te.

²⁵Hakuyila nindi, Kukuhwelela kwenu kwokudihi? Atiya niwoma, hiyakudihayamina, hiyakudila wumu namukwawu nawu, Yeniwu akwovwahilawu kudi mpepela nimeji hinyi?

²⁶Ashika nikwituŋa dawaGeraseni, domba mesu kuŋahliya.

²⁷Chanafumiyi muwatu, nindi akanduki kwisaŋa, hikukumubulakana iyala wudi nakufuma mumukalowu, wazakuka dehi ademoni; halekeliyi kuvwala mahina hela kushakama mwitala halena dehi chacheni, chiŋa kushakama kumajamu hohu.

²⁸Chanamumoniyi Yesu, hakukaluka, hakudinata kumesu indi, hakubidika naŋovu, nindi, Ni kweti nsaŋwinyi naneyi Yesu Mwana kaNzambi Mukwakubadika? Nalembi, bayi wunkabishaku.

²⁹Muloŋa henohu wamwila dehi yenowu demoni wazonda nindi fumaku mudi muntu. Muloŋa wamukwatilaŋa kakavulu; wadiŋi muntu wakuhemba kudi akwawu hohu, wakukasa namaleŋi nituyanda twayikuŋu; chakukotolayi yena yumoyu, hiyakumupwapwila mumasaŋa kudi demoni.

³⁰Yesu hakumwihula nindi, ijina deyi yeyinyi? Nindi, Yami Lejiyoni; muloŋa mudi yena mweŋila ademoni amavulu.

³¹Hiyakumulembelela nawu, Bayi wutuhaŋila mwikelaku.

³²Kwenoku kwadiŋi izanvu dawaŋulu adiŋi nakudiila hampidi, hiyakumulembelela nawu ayiteji kwijila mudi aŋulu. Hakuyiteja.

³³Ademoni afuma nimudi muntu, eŋila nimudi aŋulu; izanvu dawaŋulu danduka nikwanduka, hidikuya mwakunkumuka nankashi, nimwijiya chu-u, afwa nimumeji.

³⁴Ayidiishilaŋa chanachimonuwu, hiyakutemuka, hiyakuya nakuleja antu adiŋi mumukala nimwituŋaodu.

³⁵Hiyakuya nawu atali chuma chinamwekani; chanenzuwu kudi Yesu, hiyakuwana owu muntu munafumi ademoni, nashakami dehi kunyendu yaYesu, navwali chachiwahi, maanindi anamufuntili dehi; atiya niwoma.

³⁶Antu achimweni hiyakuleja akwawu chanamukoleshuwu owu wazakukilaŋa ademoni.

³⁷Antu adiŋi kumutamba wetuŋa dawaGeraseni ejima hiyakumwila nawu afumuku; muloŋa woma wunasweji dehi kuyikwata; yena hakwijila muwatu hakufunta cheŋi.

³⁸Owu iyala munafumi ademoni, hakumulembelela nindi niyaloŋa neyi; ilaŋa yena hakumufuntisha,

³⁹nindi, Funtaku kwitala deyi wuleji akwenu yuma yanakwililiyi Nzambi kutoha. Hakuya nakutiyakesha mumukala wejima yuma yamwilililiyi Yesu kutoha.

⁴⁰Chafuntiliyi Yesu, izaza hidikumushikŋa chachiwahi, muloŋa wejima wawu adiŋi nakumutalila.

⁴¹Kutala hikukwinza iyala ijina dindi Jayirusa, nyuli yashikola, hakudinatila kunyendu yaYesu, hakumulembelela nindi ayi kwitala dindi;

⁴²muloŋa wadiŋi namwanindi wamumbanda wumu hohu, wanyaka kafwampi ikumi nayiyedi, hakukeŋa kufwa. Hadiŋi nakuyayi, mazaza awantu hiyakujika kudi yena mbe.

⁴³Mumbanda wumu wapwekelaŋa mashi nyaka ikumi nayiyedi, wamanisha dehi yuma yindi yejima kudi ayimbuki, kutwesha kumúuka nehi,

⁴⁴hakwinza kunyima yaYesu, hakukunka kumukundulu wehina dindi; hohenohu mashi indi apwekelaŋa oma nichau.

⁴⁵Yesu hakwihula nindi, Anankunki kudinyi? Chadikaliluwu antu ejima, Petulu nawakwawu adiŋuwu nawu hiyakwiia nawu, Mwanta, mazaza enda akushinjeka nikukuhumahuma.

⁴⁶Yesu hakwila nindi, Hadi muntu nankunki; muloŋa neluka mudami munafumi Ŋovu.

⁴⁷Owu mumbanda, chanamoniyi nakaŋanyi dehi kuswamana, hakwinza nakuzaala, hakudinata hamaseki kumesu indi, hakushimuna hatooka kumesu awantu ejima nsaŋu yamukunkililiyi, ninichi chanakoliyi dehi hohenohu.

⁴⁸Yesu hakumwila nindi, Mwanami, kukuhwelela kweyi kunakukoleshi dehi; yaloŋa nakuwunda.

⁴⁹Iku wuchidi kuhosha, kwitala danyuli hikukufuma muntu hakumuleja nindi, Mwaneyi nafwi dehi; bayi wumukabisha Nkuluŋaŋaku.

⁵⁰Yesu chanachitiyiyi, hakumwakula nindi, Bayi wutiya womaku; kuminaku dakukuhwelela hohu, wukukola kwindi.

⁵¹Chanashikiyi kwitala, hetejeli kwipilamu namuntu wacheŋuku, chiŋa aPetulu naYowanu naYakoba, nitata yamwana namama yindi.

⁵²Adiŋi nakumudila nikutumpa kudi antu ejima; yena hakuyila nindi, Bayi mudilaku; hanafuku, wudi namutulu.

⁵³Hiyakumuseha chakumudiwula, muloŋa amumweni nafwi chikupu.

⁵⁴Yena hakumukwata kuchikasa, hakumutambi ka nindi, Eyi mwana, nyamukaku.

⁵⁵Spiritu yindi yifunta nicheŋi, yohinduka nihohenohu; hakuyila nindi, Mwinkenu yakudya.

⁵⁶Anvwali jindi hiyakuhayama nankashi; hakuyileja naŋovu nindi, Bayi muleja muntu chumichuku.