Read MUKANDA WANZAMBI Luka 9 Bible Online

Luka 9 - MUKANDA WANZAMBI bible

Luka 9

¹Hakutambika ikumi nayedi hamu, hakuyinka Ŋovu niwanta wakufumisha ademoni ejima nikuuka nyisoŋu.

²Hakuyitemesha nakushimuna wanta waNzambi, nikuuka akata.

³Hakuyila nindi. Bayi musenda yuma yakuya nachu munjila yenuku; hela mbwechi, hela ipakumuna, hela yakudya, hela mali; hela kwikala nayikovwelu yiyedi.

⁴Itala dimwakeŋa ila mwakashakama mwomwenomu, diku nawa kumwakanyamukila.

⁵Antu akabula kuyitambula, chimwakanyamuka mumukalowu, mwakadikumuna lunkuŋu ludi kunyendu yenu, kulonda lwinzi lwakayikonkololi.

⁶Hiyakunyamuka, hiyakuya nakushimuna nsaŋu yayiwahi mwahita nyikala yejima, nikuuka hamu.

⁷Mwanta Herodi chanatiyiyi yuma yeliluwu yejima, hakusweja kujinoka; muloŋa amakwawu elili nawu Yowanu nasaŋuki mudi afu;

⁸amakwawu nawu Elija diyi namwekani dehi; acheŋi nawu kaprofwetu wakunyaka diyi nasaŋuki.

⁹Kuchinka Herodi nindi, Yowanu yowu naketwili dehi namutu, indi iwu nidi nakutiya nsaŋu ŋi hinyi? Hakukeŋa nindi amumoni.

¹⁰Apostolu chanafuntuwu, hiyakumuleja yuma yeliluwu. Hakuyitwala kumbadi kwisaŋa dakwakwihi namukala weneni wumu, ijina dawu Beteseda.

¹¹Mazaza awantu chanachimonuwu hiyakumulonda; hakuyishikŋi chachiwahi, hakuhosha nawu yawanta waNzambi, akeŋeli kuyuka hakuyuka.

¹²Chelili itaŋwa hidikuya nakuteŋuluka, ikumi nayedi hiyakwinza nakumwila nawu, Mwaraku izaza dawantu, ayi namutunyikala nimwisaŋa didi kwakwihi, akamuku, kulonda akadipawili yakudya yawu, muloŋa munu tudi mwisaŋa.

¹³Yena hakuyila nindi, Yinkenu yakudya enu aweni. Wena hiyakumwila nawu, Tudi namankendi atanu ninshi jiyedi hohu, kwiji tuyi nakulandila izaza dejima yakudya.

¹⁴Muloŋa amayala ejima adiŋi kafwampi neyi makombakaji atanu. Yena hakuyila atumbanji twindi nindi, Yilejenu ashakami aha makumi atanu, aha makumi atanu.

¹⁵Ela nimwenomu, ayishakamisha niwejima wawu.

¹⁶Hakutambula owu mankendi atanu, ninoju inshi jiyedi, hakutala mwiwulu, hakukiswilahu nkisu, hakuyihumuna; hakwinka atumbanji ayinki izaza dawantu.

¹⁷Adiili, ekutili wejima wawu. Yibalu yasheluku, hiyakuyinona mabaŋu ikumi nayedi.

¹⁸Chadiŋi nakulombayi kwakanka windi, atumbanji adiŋi chimu nayena; hakuyihula nindi, Mazaza elaŋa nawu yaminyi?

¹⁹Wena hiyakwakula nawu, Amakwawu elaŋa nawu yeyi Yowanu Mpapatishu; amakwawu nawu yeyi Elija; acheŋi nawu kaprofwetu wakunyaka wumu diyi nasaŋuki.

²⁰Yena hakuyila nindi, Indi enu aweni mwelaŋa nenu yaminyi? Petulu hakwakula nindi, Yeyi Kristu waNzambi.

²¹Yena hakuhosha nawu naŋovu, hakuyilekesha nindi, Bayi muleja muntuku;

²²muloŋa Mwana kamuntu chiŋa yokaba yuma yayivulu, chiŋa akamuleka kudi awakulumpi, nikudi awakulumpi jawatupristu, nikudi ansoneki, akamujaha, akamusaŋula hetaŋwa damu chisatu.

²³Hakuyila wejima wawu nindi, Muntu wukukeŋa kunlondami, adibondi yomweni, anyamunaŋa kulusu yindi hefuku hefuku, anlondaŋa.

²⁴Muloŋa muntu wukukeŋa kuhemba wumi windi, diyi wakawujimbesha; hakwila wukujimbeshela wumi windi hamujimba wamami, diyi wakawuhemba.

²⁵Muloŋa muntu, hela naheti matuŋa ejima adijimbesha yomweni, hela wukúumba wumi windi, wukudiilaku chumanyi?

²⁶muloŋa muntu wukutiya nsonyi jamami nŋamazu ami, ni mwana kamuntu wakamutiya nsonyi hakenzayi nalubanji lwakulema kwindi yomweni, nikwaTata yindi nikwawaŋelu ajila.

²⁷Tiyenu niyileji mwalala nami, awa amakwawu anemani kunu, hiyakusambilaŋahu dehi kumona kufwaku, chiŋa anamoni wanta waNzambi.

²⁸Chelili munahiti dehi mafuku atanu nasatu nanochu hahosheliyi yumiyi, hakutwala aPetulu naYowanu niYakoba, hakukanduka nawu hampidi kulonda alombi.

²⁹Hadiŋi nakulombayi, kumesu indi hikukubalumuka mwacheŋi hohu, mahinindi hiyakusweja kutooka, kutwesha kutalaku nehi.

³⁰Kutala hakuhanjika nawamayala ayedi, diwu aMosi naElija;

³¹hiyakumwekana nalubanji lwakulema, hiyakutena kufwa kwindi kwakuYerusalema kwakukeŋa kufumayi nachu.

³²Petulu nawakwawu adiŋiyi nawu kwakunoŋoka tulu hohu. Chanatonuwu chikupu, hiyakumona lubanji lwakulema kwindi, niwenowu amayala ayedi emeniyi nawu.

³³Cheliluwu hiyakwambuka nindi, Petulu hakumwila Yesu nindi, Mwanta chachiwahi chitudi kunu; tutuŋi yisolu yisatu; chimu cheyeyi, chimu chaMosi, chikwawu chaElija; helukili ninimu mwahoshelaŋayuku.

³⁴Iku wuchidi kuhosha mazu awa, ivu hidikwinza nakuyizeŋamina, atiya niwoma ochu chaneŋiluwu mwivu.

³⁵Mwivu himukufuma izu nawu, Diyi Mwanami nakeŋa, mutiyililenu yena.

³⁶Izu chidinamweni, hiyakumona kwaYesu hohu kanka windi. Amwena nizo; wena mafuku owu hiyalejeli muntu yuma yamwenuwuku.

³⁷Chikunachi chaneluwu anakunkumuki dehi mwishina dampidi, izaza deneni hidikwinza nakumukinkilila.

³⁸Mwizaza himukubidika muntu wumu nindi, Eyi Nkuluŋaŋa, nalembi mwani wutali mwanami, muloŋa himwanami wumu hohu;

³⁹amukwataŋa kudi demoni, kukasumuka hakukaloka; hakumukonyesha, hakwidisha nimafulolu kukanwa, hakumuchika nankashi, kumufuma swayi nehi.

⁴⁰Nayilembelela atumbanji tweyi nami amufumishi; akaŋanya.

⁴¹Yesu hakwakula nindi, Enu antu akuchisakichi, mwabula kukuhwelela, mwaheŋa, nyaka yinukwikala nanenu nakukabakana nanenu yiŋahi? Muleti mwaneyi kunu.

⁴²Iku wuchidi kwinza, demoni amunata nihamaseki, hakumukonyesha nankashi. Yesu hakuhoshola demoni wazonda, yomúuka ninowu mwana, amufuntisha nikudi tata yindi.

⁴³Antu ejima hiyakuhayama Ŋovu yawanta waNzambi yinamwekani. Iku achidi kuhayama yuma yeliliyi yejima, hakuyila atumbanji twindi,

⁴⁴nindi, Toŋojokenu chachiwahi mazu inukukeŋa kuyileja, nami, Mwana kamuntu akamuhana kumakasa awantu.

⁴⁵Wena kwiluka izu odu nehi, ayijindilidu kulonda abuli kushinshika mudaya; hiyakutiya woma wakumwihuladu.

⁴⁶Mukachi kawu himukuvulumuka ntadi yakwila nawu nabadiki akwawu hinyi?

⁴⁷Yesu chanamoniyi mudi nakutoŋojokawu munyichima yawu, hakunona mwana wanyanya, hakumwimika kwakwihi nachikasa chindi;

⁴⁸hakuyila nindi, Muntu wukutambula mwana wanyanyiwu mwijina dami nantambulami; wukuntambulami natambuli niyena wantemesheli; muntu nakehi mukachi kenwenu ejima, diyi muneni.

⁴⁹Yowanu hakwakula nindi, Mwanta, twamona muntu wudi nakufumisha ademoni mwijina deyi; twamulekesha muloŋa hitwalondelaŋa chimuninduku.

⁵⁰Yesu hakumwila nindi, Bayi mumulekeshaku; muloŋa wabula kuyihela diyi mwinenu.

⁵¹Chelili mafuku akumutambula mwiwulu hiyakukeŋa kushika, asha nimesu indi naŋovu munjila yakuya kuYerusalema.

⁵²Hakutemesha ŋahu dehi atuŋanda kwakuyayi; hiyakuya, eŋila nimumukala wawaSamariya wumu, nawu amuloŋesheli.

⁵³Wena kumutambula nehi, nanochu chamwenuwu mesu indi anatali kuYerusalema.

⁵⁴Chanachimonuwu, atumbanji twindi aYakoba naYowanu hiyakumwila Mwanta nawu, Wunakeŋi tutambiki kesi kaholoki mwiwulu kayijilishi neyi cheliliyi Elija, tahindi?

⁵⁵Yena hakushetumuka, hakuyihoshola nindi, Himweluka chekala spiritu yenuku.

⁵⁶Mwana kamuntu henjili nakujilisha antuku, wenjili nakuyihandisha. Hiyakuya kumukala wukwawu.

⁵⁷Hayilaŋawu munjila, muntu wumu hakumwila nindi, Nukukulondaŋa kwejima kuwukuya.

⁵⁸Yesu hakumwila nindi, Anyumbu akweti menawu, niatujila ahaluzwizu akweti yisakala yawu; hakwila Mwana kamuntu hakweti hakusachila namutu winduku.

⁵⁹Hakumwila muntu mukwawu nindi, Nlondaŋa; ilaŋa yena nindi, Mwanta, nleki nisambili kuya nakajiiki tata yami.

⁶⁰Yesu hakumwila nindi, Yileki afu ajiiki afu jawu awenawu; eyi yaloŋa nakushimojola wanta waNzambi.

⁶¹Mukwawu niyena nawa hakumwila nindi, Mwanta, nukukulonda; nleki niyi nakashaliki akwetala dami.

⁶²Yesu hakumwila nindi, Muntu wukwila nakwati dehi kwitemwa hakutala munyima, hanateli wanta waNzambi uku.