Read MUKANDA WANZAMBI Deuteronoma 10 Bible Online

Deuteronoma 10 - MUKANDA WANZAMBI bible

Deuteronoma 10

¹Henohu Yehova waŋilili nindi, Sesaku maloleyi awubasa ayedi adineyi ana akusambila, wukanduki kunu kumpidi kunidi, wutuŋichimbaŋu cheyi chamutondu.

²Hamalola awubasa nukusonekahu mazuadiŋi hamalola awubasa akusambila iwafumpili, wakayishi muchimbaŋu.

³Dichi natuŋili chimbapu chamapalanga anyishitimi, naseseli malola awubasa ayedi neyi ana ásambilili, nakandukili hampidi, malola awu basa ayedi adi muchikasa chami.

⁴Hamalola awubasa wasonekeluhu neyimwasonekeliyi hakusambila, joji nshimbi ikumi jahosheliyi Yehova nanenu hampidi, izu dindi difumaŋa mukesi ifuku dakupompa; Yehova wayinyinkeli.

⁵Ami nabalumukili, nakunkumukili mpidi, nashili malola awubasa muchimbaŋu chinatupili; mwomwaduwu nihanu, mwomwanlejeliyi Yehova.

⁶Anyana kaIsarela afumini kuBeyeroti Beneyayakani ayili kuMosera; kwokwafwilililiyi Aroni, kwokwamuŋikililuwu; mwanindi Eleyazari wahipilumu hakukoŋa mudimu wawupristu.

⁷Afumini kwenoku ayili kuGudigoda; afumini kuGudigoda ayili kuYotibata, ituŋa datutuloŋa twameji.

⁸Henahana dihu haambwililiyi Yehova muchidi waLevi kulonda asendaŋa chimbaŋu chachitiyaŋenu chaYehova, kulonda emanaŋa ni kumesu aYehova nakumukalakela, akiswilaŋa ninkisu mwijina dindi nikwitaŋwa dalelu.

⁹Dihu hafuma Levi kubula iseka hela wuswana wakubombela nawanakwindi; Yehova diwu wuswana windi, mwomwahosheliyi Yehova Nzambi yeyi nayena.

¹⁰Ami nashakamini hampidi, neyi hakusambila, mafuku makumi awananimwaana niwufuku, nihenohu nawa Yehova wantiyilili; Yehova walekeli kukujilumuna.

¹¹Yehova wapilili nindi, Nyamukaku wukwati njila yeyi yakuya kumbidi yawantu; niwena akeŋila nakuheta ituŋa dinasanyikilili ankakulula jawu kuyinkadu.

¹²Ichi dinu enu aIsarela Yehova Nzambi yenu nakeŋi chumanyi kudenu? Nakeŋi nindi chiŋa mumutiyaŋa Yehova Nzambi yenu woma, mwendimunjila jindi jejima, mumukeŋi, mumukalakeli Yehova Nzambi yenu nanyichima yenu yejima, nawumi wenu wejima,

¹³mwovwahili mwanayilejiyi Yehova, nimuyidika yindi, munukuyileja lelu kulonda mumonikuwaha.

¹⁴Talaku, niiwulu, niiwulu damawulu, niiseki, hamu nayumayejima yekalamu, yaYehova Nzambi yeyi.

¹⁵Diyi Yehova watiyili kuwahaankakulula jeyi hakuyikeŋa, hakutonda ni anyanawu alondelumu, kafwampiyenu, chakubadika nyuza yejima neyi chimukumona lelu.

¹⁶Dichi alamenu nyivumbu yakunyichima yenu, bayi muchinchika cheŋuku.

¹⁷Muloŋa Yehova Nzambi yenu hiNzambi yawa nzambi, hiMwanta wawanyanta, hiNzambi muneni diyi mukwaŋovu, wakutiya woma nankashi, hakomokaŋa muntuku, hiyamufwetaŋaku.

¹⁸Diyi wasompelaŋa ninshona, nintuluwa, diyi wakeŋa aŋa mwenyi, hakumwinka niyakudya niyakuvwala.

¹⁹Dichidinu mwakakeŋaŋa mwenyi, muloŋa ninenu mwadiŋi enyi mwituŋa daEjipitu.

²⁰Wakatiyaŋa Yehova Nzambi yeyi woma; diyi wakakalakelaŋa; diyi wakalamata mbe, diyi wakasanyikaŋa ijina dindi.

²¹Diyiwashimekapeyi, diyi Nzambi yeyi, wakukopeleli yumoyu yamaneni, yikweti niwoma nankashi, yiwamweni namesu eyi.

²²Ankakulula jeyi akunkumukili muEjipitu nawantu makumi atanu nayedi hohu; hakwinza katataka Yehova Nzambi yeyi nayivulishi dehi neyi chavula tutumbwa twamwiwulu.