Read MUKANDA WANZAMBI Deuteronoma 16 Bible Online

Deuteronoma 16 - MUKANDA WANZAMBI bible

Deuteronoma 16

¹Wakalemeshaŋa kakweji kaAbibi, wakamudiili Yehova Nzambi yeyi ŋaseka; muloŋa mukakweji kaAbibi dimu mwakufumishiliyi Yehova Nzambi yeyi muEjipitu nawufuku.

²Wakamuketwili Yehova Nzambi yeyi ŋaseka yamwiyinda deyi niyamwitaŋa deyi kuchipela chakatondayi Yehova kushakamishaku ijina dindi.

³Bayi wakayidyaŋa namankendi eluŋuku; wakayidyaŋa mafuku atanu nayedi namankendi akadi iluŋi, kafwampi himankendi ayihuŋu; muloŋa eyi wafumini mwituŋa daEjipitu chalufuchihohu; kulonda hamafuku ejima iwakahandaŋa wakaanukaŋa ifuku diwafumini mwituŋa daEjipitu.

⁴Mupinza jeyi jejima bayi akamona ŋamuiluŋi mwitala deyi mafuku atanu nayeduku; hela mbiji yiwakaketula hefukudakusambila hamelela, bayi yakashalahu wufuku wejima yishika nikubudiduku.

⁵Hiwakatwesha kuketwila ŋaseka hamuleala weyi wumu wakukwinkayi Yehova Nzambi yeyuku;

⁶chiŋa kuchipela chakatondayi Yehova Nzambi yeyi kushakamishahu ijina dindi, diku kuwakaketwila ŋasekahamelela, hakuholoka itaŋwa, hachila aka chiwafumini muEjipitu.

⁷Wakamwochi, hiwakamudiila kuchipela chakatondayi Yehova Nzambi yeyi; habudidi hiwakabalumuka cheŋi, hiwakaya kumatenti eyi.

⁸Wakadyaŋa mankendi akadi iluŋi mafuku atanu nadimu; hefuku damu chitanu nachiyedi hakekalaŋa kupompa kwakudihudika kwakumupompela Yehova Nzambi yeyi; kukoŋa nyidimu nehi.

⁹Kachindi nyilungu yeyi yitanu nayiyedi; hiwakatachikila kuchinda nyilungu yitanu nayiyedi hohiwakatwalaŋa chikwakwa kutidiku yemana.

¹⁰Wakamudiili Yehova Nzambi yeyi chawija chanyilungu nahimulambu wa kulambula chakumuchima weyeyi aweni, wakahani mwomwana kukoolekesheliyi Yehova Nzambi yeyi.

¹¹Wakazaŋalalaŋa kumesu aYehova Nzambi yeyi, nineyi, nimwaneyi weyala, nimwaneyi wamumbanda, niŋamba yeyi weyala, niŋamba yeyi wamumbanda, nikaLevi wekala hamukalaweyi, ni mwenyi, ninshona, nintuluwa, ekala mukachi kenu, kuchipela chakatondayi Yehova Nzambi yeyi kushakamishaku ijina dindi.

¹²Waka anukaŋa chiwadiŋi ndupu muEjipitu; wakashi muchima wakwila yidika diyi.

¹³Wakadyaŋa chawija chayisolu mafuku atanu nayedi, hiwakela wunakupuli dehi niyakuwuhulilu weyi niyakuwukamwinu weyi wavinyu;

¹⁴wakazaŋalalaŋa hachawija cheyi, nineyi, nimwaneyi weyala, nimwaneyi wamumbanda, niŋamba yeyi weyala, niŋamba yeyi wamumbanda, nikaLevi, ni mwenyi, ninshona, nintuluwa, ekala hamukala weyi.

¹⁵Wakamudiili Yehova Nzambi yeyi chawija mafuku atanu nayedi kuchipela chakatondayi Yehova; nanochu chanakukoolekeshiyi Yehova Nzambi yeyi muyuma yeyi yejima yanavulishiyi, nimunyidimu yejima yiwunakoŋi, hiwakazaŋilala chikupu.

¹⁶Amayala eyi ejima akamwekanaŋa maŋampa kasatu hamwaka mumesu aYehova Nzambi yeyi kuchipela chakatondayi; nihachawija chamankendi akadi iluŋi, nihachawija chanyilungu, nihachawija chayisolu; bayi akamwekanaŋa kumesu aYehova makasakasaku.

¹⁷Amayala ejima akahanaŋa mwashikila Ŋovu jawu, mwomwashikila kukooleka kwanakukoolekeshiyi Yehova Nzambi yeyi.

¹⁸Munyikala yeyi yejima yakukwinkayi Yehova Nzambi yeyi, mwahitanyichidi yeyi, wakashaŋamu ansompeshi natulala; akasompeshaŋa antu kusompa kwaloŋa.

¹⁹Bayi wakaheŋeshaŋa kusompaku; bayi wakaakamaŋa amuntuku, hela kutambula chamukunkulu; muloŋa chamukunkulu chaputishaŋa mesu amukwamaana, chaluwaŋeshaŋa mazu amukwakuloŋa.

²⁰Wakayaŋa mwaloŋa hohu, kulonda wakahandi, wakaswani ituŋa dakukwinkayi Yehova Nzambi yeyi.

²¹Bayi wakatumba muyombu wamutondu himutondu kwakwihi nakameŋa kaYehova Nzambi yeyi kiwakelaku.

²²Bayi wakemika hela kaposhika kupeshelaku; kokahelayi Yehova Nzambi yeyi.