Read MUKANDA WANZAMBI Deuteronoma 18 Bible Online

Deuteronoma 18 - MUKANDA WANZAMBI bible

Deuteronoma 18

¹Atupristu aLevi, kafwampi wowu muchidi wawaLevi wejima, bayi akaheta hela iseka hela wuswana wakubomba nawaIsarelaku; akadyaŋa kwawu nyilambu yaYehova yakwila nakesi, niwuswana windi.

²Bayi akekala nawuswana mudi ana kwawuku; Yehova diyi wuswana wawu mwomwanahoshiyi nawu.

³Tiya muwudiilu wawatupristu wakadyaŋawu kudi antu, kudi akulambula chimuna, hela hiŋombi hela himukoku, akamwinkaŋa kapristu chikasa, niyibaŋa yiyedi, nimulaka.

⁴Wakamwinkaŋa mbutu jakahila ngtidiku yeyi, ngvinyu yeyi, ngmanji eyi, nimavuji anyikoku yeyi yiwukusambilaŋa kutewula.

⁵Muloŋa Yehova Nzambi yeyi namutondi dehi mukachi kanyichidi yeyi yejima, kulonda akemanaŋa nakukalakala mwijina daYehova, niyena ni anyanindi amayala haya nyaka.

⁶Neyi kaLevi wumu wakafuma hamukala wamuIsarela washakamayiwumu, kwonsu kwanafumiyi kwoku, hakenza kuchipela chanatondiyi Yehova chakukeŋamu namuchima windi wejima,

⁷henohu akakalakali mwijina daYehova Nzambi yindi, chochelaŋa ana kwindi aLevi ejima emanaŋa kwenoku kumesu aYehova.

⁸Akadyaŋa mwomumu, maseka esekana, akalunjikuku niyashiyayi tata yindi yakalandishayi.

⁹Chiwakashika mwituŋa dakukwinkayi Yehova Nzambi yeyi, bayi wakadizi kukoŋa mwashimanaŋa nyuzoyuku.

¹⁰Kudeyi bayi kwakamwekana muntu wakahitisha mwanindi weyala hela mwanindi wamumbanda mukesuku, hela mukwakuhoŋa, hela mukwakuhoŋa natutumbwa, helawasansa nyiseŋu, hela mukwakupanda,

¹¹hela mukwakukaya, hela mukwakupesha, hela kateŋa, hela kadaŋuku.

¹²Muloŋa antu ejima elaŋa yumiyi Yehova wayimona nindi hiyakwakushimana; muloŋa kwena kushimanikudiku kwakuyitemwinayi Yehova Nzambi yeyi kuwukuyeyi.

¹³Wakekalaŋa walala naYehova Nzambi yeyi.

¹⁴Muloŋa nyuzoyu yiwakaheta atiyililaŋa akwakuhoŋa natutumbwa, nawakwakuhoŋa tuhu; hakwila eyi, Yehova Nzambi yeyi hanakwitŋi kwila mwenomuku.

¹⁵Yehova Nzambi yeyi wakakumwekeshela mukachi keyi mudi ana kweyikaprofwetu wudi neyi ami; diyi mwakatiyilila;

¹⁶mwonsu muwamulombeli Yehova Nzambi yeyi kuHorebi ifuku dimwapompeli, hiwelili neyi, Bayi nitiya cheŋi izu daYehova Nzambi yamuku, bayi nimona cheŋi kesiaka kenenuku, nakenza kafwa.

¹⁷NiYehova hakuŋila nindi, Chanahoshuwu anahoshi chachiwahi.

¹⁸Nakayimwekeshela kaprofwetu wamudiana kwawu wudi neyi eyi; nakasha mazu ami mukanwa kindi, wakahoshanawu munakamuleja mwejima.

¹⁹Mwakamona yowu muntu wakabulakutiyilila mazu ami akahoshayi mwijina dami, nakamwihulawu.

²⁰Hakwila kaprofwetu wakahosha mwijina dami naŋovu jindi hohu, munabulilikumuleja kuhosha, hela wakahosha mumajina awakishi, yenowu kaprofwetu wakafwa.

²¹Neyi wakahosha mumuchima weyi neyi, Indi izu dakabulakuhoshayi Yehova twakadiluka ŋahi?

²²Chakahoshayi kaprofwetu mwijina daYehova, neyi chuma kulondelamu nehi, hela kumwekana nehi, dichichuma chinabuli kuhoshayi Yehova; owu kaprofwetu nachihoshi naŋovujindi hohu, bayi wakamutiya womaku.