Read MUKANDA WANZAMBI Deuteronoma 27 Bible Online

Deuteronoma 27 - MUKANDA WANZAMBI bible

Deuteronoma 27

¹AMosi nawawakulumpi awaIsarela ayilejeli antu, nawu, Kahembenu kuleja kwejima kunayileji lelu.

²Ifuku dimwakela munazambuki dehi Yodana, muneŋili dehi mwituŋa dikuyinka Yehova Nzambi yeyi, wakemiki malola amaneni, wakayisoti nasamendi.

³Neyi wunazambuki dehi wakasonekapahu mazu ejima anshimbiji; kulonda wakeŋa ili mwituŋa dikukwinkayi Yehova Nzambi yeyi, ituŋa datuloŋa twamayeli nawuchi, mwomwakaniniyi Yehova Nzambi yawankakulula jeyi.

⁴Himwakela munazambuki dehi Yodana, mwakemiki malolawa inukuyileja lelu hampidi yaEbali, wakayisoti nasamendi.

⁵Wakanamutuŋiluku Yehova Nzambi yeyi kameŋa, kameŋa kamalola; kutapaku chuma chachikuŋu chinjila.

⁶Kameŋa kaYehova Nzambi yeyi wakatuŋi kamalola amukuma; wakamulambwilu huYehova Nzambi yeyi nyilambu yakushita;

⁷wakaketwilaŋa kuyimuna yanyilambu yakuwunda, hiwakadiila kwenoku; hiwakazaŋalala kumesu aYehova Nzambi yeyi.

⁸Hamalolowu wakasonekuhu mazu ejima anshimbiji chalumbuluka nankashi.

⁹AMosi nawatupristu aLevi ahosheli nawaIsarela ejima, nawu, EyiIsarela, mwenakuzo, wutiyilili; lelu wunekali dehi muza waYehova Nzambi yeyi.

¹⁰Dichi dinu, kovwahili izu daYehova Nzambi yeyi, nimwanakulejiyinimuyidika yindi yinukukuleja lelu.

¹¹Mosi walejeli antu dena ifuku odu,

¹²nindi, Tiyenu, antu akemana hampidi yaGerizimi nakukisula antu, himwakela munazambuki dehi Yodana aSimeyona, naLevi, naYuda, naIsakari, naYosefu, naBenjamini.

¹³Akemanahampidi yaEbali nakushiŋana; aRubeni, naGadi, naAsheri, naZebuluni, naDani, naNafwatali.

¹⁴ALevi akahosha akayila amayala aIsarela ejima nezu dakaŋuka.

¹⁵Nawu, Muntu wukwila mukishi wakusoŋa hela wakusuŋununa, wamonayi Yehova nindi hikushimana, mudimu wakumakasa amukwawukalawenu, hakumwimika kwaswamana, amushiŋi. Antu ejima akaakulanawu, Mwomwenomu.

¹⁶Wukudiwula tata yindi namama yindi, amushiŋi. Antu ejima akelanawu, Mwomwenomu.

¹⁷Wukututulula chinjikijilu chakwiluka nachu muŋinza namukwawu, amushiŋi. Antu ejima akela nawu, Mwomwenomu.

¹⁸Wukupwapwisha mputamesu munjila amushiŋi. Antu ejima akelanawu, Mwomwenomu.

¹⁹Wukuheŋesha muloŋa wamwenyi, nanshona, nantuluwa, amushiŋi. Antu ejima akela nawu, Mwomwenomu.

²⁰Wukukama naŋodatata yindi, amushiŋi, muloŋa navúuli dehi tatayindi. Antu ejima akela nawu, Mwomwenomu.

²¹Wukukama nakanyama hikanyama, amushiŋi. Antu ejima akela nawu, Mwomwenomu.

²²Wukukama namuhelindi, hela himwana katata yindi, hela himwana kamama yindi, amushiŋi. Antu ejima akela nawu, Mwomwenomu.

²³Wukukama namawenu yindi amushiŋi. Antu ejima akela nawu, Mwomwenomu.

²⁴Wukweta mukwawu chakumubatamina, amushiŋi. Antu ejima akela nawu, Mwomwenomu.

²⁵Wukutambula wufwetu wakujaha muntu wakadi muloŋa, amushiŋi. Antu ejima akela nawu, Mwomwenomu.

²⁶Wukubula kukolesha mazu anshimbiji aleka kwilamu, amushiŋi. Antu ejima akela nawu, Mwomwenomu.