Read MUKANDA WANZAMBI Deuteronoma 31 Bible Online

Deuteronoma 31 - MUKANDA WANZAMBI bible

Deuteronoma 31

¹Mosi wayili wayishimwinini aIsarela ejima mazu awa.

²Wayililinindi, Ami lelu nashiki munyaka nkulakaji namakumi ayedi; hinatweshinawa cheŋi kwila niya ninzaku; Yehova naŋili dehi kwindi nindi, Eyikumuzambuka iwu Yodana nehi.

³Yehova Nzambi yeyi diyi wakatwaminakukuwukuyeyi; wakajilumuna nyuzoyu yidi kuwukuya wakayiheta, Yoshuwa diyi wakatwaminaŋaku kuwukuyeyi mwomwanahoshiyi dehi Yehova.

⁴Yehova wakayikoŋa neyi chakoŋeliyi aSihoni naOŋi anyanta awaAmori ankanu, niituŋa dawu, ajilumwiniyi.

⁵Yehova wakayinkawu kumukuyenu, mwakayikoŋa mwaya kuleja kwejima kunayilejeli.

⁶Kadikwatishaŋa, wakomikaŋa chacheni, bayi wakatiyaŋa womaku, bayi wakayakamaŋaku; muloŋa Yehova Nzambi yeyi diyi wukuya nindi; hakakaŋanyaku, hakakuumbaku.

⁷Mosi watambikili Yoshuwa, wamwilili kumesu awaIsarela ejima, nindi, Kadikwatishaŋa, wakomikaŋa chacheni; muloŋa yeyi wakaya nawantu awamwituŋa dasanyikililiyi Yehova ankakulula jawu kuyinka; yeyi wakayiswanishadu.

⁸Yehova diyi wukutwaminaŋaku kuwukuyeyi; diyi wakekalanindi hakakaŋanyaku, hakakuumbaku; bayi wutiyaŋa womaku, bayi wakamaŋaku.

⁹Mosi wasonekeli nshimbiji, wajinkeli atupristu anyana kaLevi atembekelaŋa chimbaŋu chachitiyaŋenu chaYehova, niakulumpi awaIsarela ejima.

¹⁰Mosi wayilejeli nindi, Hakujikishaŋa munyaka yitanu nayiyedi, yitanu nayiyedi, hamwaka wakuleka wayikanawu, hachawija chamuyisolu,

¹¹hakenzaŋawu aIsarela ejima nakumwekana kumesu aYehova Nzambi yeyi kuchipela chakatondayi, wakataŋaŋa nshimbiji kumesu awaIsarela ejima, achitiyaŋa.

¹²Wakapompeshaŋa antu ejima, ni amayala, niambanda, niatwansi, ni mwenyi weyi wekala hamukala weyi, kulonda akatiyi, akadizi, akatiyi Yehova Nzambi yenu woma, akashuku muchima wakwila mazu ejima anshimbiji;

¹³ni anyanawu abulili kwiluka akatiyi, akadizi kumutiya Yehova Nzambi yenu woma, nyaka yejima yimwakahandaŋa mwituŋa didi kumukuya nakuzambuka Yodana kulonda kudiheta.

¹⁴Yehova wamwilili Mosi, nindi, Mafuku eyi akufwa keŋa ashiki, tambikaku Yoshuwa, muyi nakwimana mwitenti dakubulakena, kulonda nimukani. NiMosi niYoshuwa ayili, emeni mwitenti dakubulakena.

¹⁵Yehova wamwekeni mwitenti muchishimi chevu; chishimi chevu chemeni kuchisuchetenti.

¹⁶Yehova wamwilili Mosi, nindi, Tala, wakakama kudi ankakulula jeyi; antu awa akanyamuka akela wuvumbi wakulondela akishi akwacheŋi amwituŋa dakuya nakushakamawu mukachi kawu, akanleka, akajaha chitiyaŋenu chami chinatiyaŋeni nawu.

¹⁷Denodu ifuku nakayizuwila, nakayileka, nakayijinda mesu ami, akadiika, akamona yuma yatama yayivulu niyihuŋuyayivulu; denodu ifuku akela nawu, Iyi yuma yatama yinatuwani hiyinatuwani nanichi chitunabuli Nzambi yetu mukachi ketuku, tahindi?

¹⁸Chalala nakajinda mesu ami denodu ifuku nayuma yatama yejima yakakoŋawu, chakabalumukawu nakulondeja akishi.

¹⁹Dichi dinu sonekenu kaminakenu aka, wuyilejuku anyana kaIsarela, wukenki namutunwa twawu, kulondakaminaka kakekali chinsahu chami chakuyitanyisha anyana kaIsarela.

²⁰Chinakela nayileti dehi mwituŋa dinasanyikilili ankakulula jawu datuloŋa twamayeli nawuchi; chakelawu anadyi dehi, anekuti dehi, anatohi dehi, hiyakabalumuka nakulonda akishi nakuyipesha, hiyakandiwula nakuja hachitiyaŋenu chami.

²¹Chiyakela anamoni dehi yuma yatama yayivulu, niyihuŋu yayivulu, kaminaka kakayishimwina wunsahu; muloŋa hiyakakavulamenaku, kakekala namutunwa twawanyanawu; muloŋa ami neluki yafuukulawu, yakukeŋa kwilawu, hela tuhu katataka hinichidi kanda niyishikiji mwituŋa dinayisanyikilili.

²²Dichi Mosi wasonekeli kaminaka dena ifuku odu, wakaleje anyana kaIsarela.

²³Wamushiikili mwana kaNuni Yoshuwa, nindi, Kadi kwatishaŋa, wakomikaŋa chacheni; muloŋa yeyi wakatwala anyana kaIsarela mwituŋa dinayisanyikilili; ami nakekala naneyi.

²⁴Cheliliyi Mosi namanishi dehi kusoneka mumukanda mazu anshimbiji, anamani dehi to-o,

²⁵Mosi hakuleja aLevi asendelaŋa chimbaŋu chachitiyaŋenu chaYehova,

²⁶nindi, Tambulenu mukandiwu wanshimbi, muwishikumbavu yachimbaŋu chachitiyaŋenu chaYehova Nzambi yenu, kulonda wakekalaŋa kwenoku wachinsahu chakukutanyishaŋa.

²⁷Muloŋa ami neluki kudikaŋa kweyi, nichiwachinchika; chikaŋa hinichidi wamumi lelu, hinichidi nenu, enu munaleti dehi kudikaŋi naYehova, winzi wakamoni neyi ami nafwa dehi?

²⁸Mpompeshelenu awakulumpi ejima anyichidi yenu, nitulala twenu, kulonda niyishimwini mazu awa kumatu awu, nitambikilwulu neseki ekali chakuyitanyisha.

²⁹Muloŋa ami neluki chinakela nafwi dehi mwakaditokesha bu-lu-lu chikupu, mwakafuma munjila yinayilejeli; yatama yakayiwana hamafuku akukuminina nanochu chimwakela chatama kumesu aYehova, mwakamuvuloka nanyidimu yamakasenu akazuwi.

³⁰Mosi wahosheli kumatu achipompelu chejima chawaIsarela mazu akaminaka, amana nito-o.