Read MUKANDA WANZAMBI Deuteronoma 5 Bible Online

Deuteronoma 5 - MUKANDA WANZAMBI bible

Deuteronoma 5

¹Mosi watambikili aIsarela ejima, wayilili nindi, Enu aIsarela tiyenuyidika, nawuŋaji, wunukuhosha lelu kumatu enu kulonda mudizumu, mushuku muchima wakwilamu.

²Yehova Nzambi yetu watiyaŋeni chitiyaŋenu nanetu kuHorebi.

³Chenichi chitiyaŋenu Yehova hachitiyaŋenina wankakulula jetuku, chiŋa nanetu hohu, yetu aweni, yetu amomi ejima tudi kunu lelu.

⁴Yehova wahosheli nenu mesu namesu hampidi mukachikakesi.

⁵Henahana ami nemeni, Yehova iku, enu iku, ami mukachi, kulonda kuyileja mazu aYehova, muloŋa enu mwatiyili woma wakesi kadiŋuku, himwakandamini hampiduku.

⁶Welili nindi, Yami Yehova Nzambi yeyi nakufumishili mwituŋa daEjipitu mwitala dawuduŋu.

⁷Kwikala nawakishi akulunjika kudami, chinjila.

⁸Kudilila mukishi wakusoŋa wakufwikŋa hela chuma chamwiwulu mumawulu, hela chahamaseki munu mwishina, hela chamumeji mwishina damaseki, chinjila;

⁹kudifukula kudi wena hela kuyipesha, chinjila; muloŋa ami Yehova Nzambi yeyi niNzambi wamukawu; kuluwa kwawatata jawantu akakukoola kudi anyanawu, niezukulu awu, nianyana kawezukulu anhelaŋa, dichi chinelaŋa ami Nzambi;

¹⁰hakwinza makombakaji awantu ankeŋa ahembaŋa kuleja kwami, nayitiyilaŋa luwi.

¹¹Kutena ijina daYehova Nzambi yeyi namaswimbu, chinjila; Yehova hakayiŋisha watenaŋa ijina dindi namaswimbuku.

¹²Shaku muchima kwifuku dasabata, wudijiliki, mwakulejeliyi Yehova Nzambi yeyi.

¹³Mafuku atanu nadimu wakakalakali, wakakoŋi nyidi muyeyi yejima;

¹⁴ilaŋa ifuku damu chitanu nachiyedi hisabata yambala yaYehova Nzambi yeyi; ifuku denodu bayi wakakoŋelamu mudimuku, hela eyi, hela mwaneyi weyala, hela mwaneyi wamumbanda, hela ŋamba yeyi weyala, hela ŋamba yeyi wamumbanda, hela ŋombi yeyi, hela chimbulu cheyi, hela chimuna hichimuna cheyi, hela mwenyi weyi wudi hamukalaweyi; kulonda niŋamba yeyi weyala niŋamba yeyi wamumbanda akanookineyi chiwakanookeyi.

¹⁵Wakaanukaŋa chiwadiŋi ŋamba mwituŋa daEjiispitu, mwakufumishiliyi Yehova Nzambi yeyi nachikasa chaŋovu, nachikasa chakwolola; dichi chakulejeleliyi Yehova Nzambi yeyi kuhemba ifuku dasabata.

¹⁶Lemeshaku tata yeyi namama yeyi, mwomwakulejeliyi Yehova Nzambi yeyi; kulonda mafuku eyi akavuli, wakashakami chachiwahi mwituŋa dakukwinkayi Yehova Nzambi yeyi.

¹⁷Kujaha muntu, chinjila.

¹⁸Kwila wuvumbi, chinjila.

¹⁹Kwiya, chinjila.

²⁰Kushimuna wunsahu wakutwambila mukwenu, chinjila.

²¹Kwikala naiwisu lwaŋodamukwenu, chinjila; kwikala nalwisu lwetaladamukwenu, hela lweha dindi, hela lwaŋamba yindi weyala, hela lwaŋmbayindi wamumbanda, hela lwaŋombi yindi, hela lwachimbulu chindi, helalwachuma hichuma chambala chamukwenu, chinjila.

²²Mazu awa Yehova wayiliosheli nachipompelu chenu chejima hampidi, afumini mukesi nimwivu, nimumwidima wakushishita, nezu deneni; halunjikili kwokuku. Wayisonekeli hamalola awubasa ayedi, wayinyinkelami.

²³Chelili chimunatiyi izu hidikufuma mukachi kamwidima, ikumpidi yidi nakubidima kesi, enu himukuswila kwakwihi nanami, wowuanyanta ejima anyichidi yenu, niakulumpi jenu;

²⁴himukwila nenu, Talenu, Yehova Nzambi yetu natumwekesheli dehi ni kulema kwindi nichatohayi, tunatiyi izu dindi hidikufuma mukesi; lelu tunamoni Nzambi hakuhoshana muntu, muntu saŋi ahandilayi.

²⁵Dichi dinu tukufwiladi? Kesi aka keneni kakutunoŋesha. Neyi tukutiyaŋ tuhu izu daYehova Nzambi yetu tukufwa hohu.

²⁶Ochu hadi antu ejima hadi watiyahu dehi izu daNzambi wamumi hidikuhosha difuma mukachi kakesi, neyi chitunatiyetu, ahanda?

²⁷Yaku kwakwihi eyi, wakatiyi mwakuhoshayi Yehova Nzambi yetu mwejima; yejima yakahoshayi Yehova Nzambi yetu naneyi eyi wakahoshinanetu; twakachitiya, twakelamu.

²⁸Yehova watiyili mazu enu mwahosheli, chimwahosheli nanami; Yehova waŋilili, nindi, Natiyi dehi mazu anawa antu anahoshuwu naneyi; mwejima mwanahoshuwu anahoshi chachiwahi.

²⁹Yowu-u! Neyi mudi wena mwadiŋi muchima wakuntiya woma, wakwilaŋa mwejima munukuyileja mafuku ejima, mutenowu adi kushakama chachiwahi, niwena nianyanawu chahaya nyaka!

³⁰Yaku wuyili neyi, Funtenu kumatenti enu.

³¹Hakwila eyi wukwimana kunu kudami, ami nukuhosha naneyi mwejima nimukuleja, nimuyidika, nimuwuŋaji, muwakayileja wena kulonda akelaŋamu mwituŋa dinakayinka akadiheti.

³²Mwakasha ŋaku muchima wakwila mwakuyilejayi Yehova Nzambi yenu; bayi mwakasenukamu muya hela kuchikasa chachidiilu hela kuchimunswaku.

³³Kayenuŋa munjila yakuyilejayi Yehova Nzambi yenu ho-o, kulonda mwakahandi, mwakashakami chachiwahi, mwakavulishi mafuku enu mwituŋa dimwakaheta.