Read MUKANDA WANZAMBI Deuteronoma 6 Bible Online

Deuteronoma 6 - MUKANDA WANZAMBI bible

Deuteronoma 6

¹Diku kuleja, niyidika, niwuŋaji, wanlejeliyi Yehova Nzambi yenu kuyileja, kulonda mwakelaŋmu omu mwituŋa dimwakaya nakuheta;

²kulonda wakamutiyaŋa Yehova Nzambi yeyi woma, wakahembi yidika yindi yejima nikuleja kwindi, kunukukuleja, nineyi, nimwaneyi, nimwizukuluweyi, mafuku ejima lwakahanda; kulonda mafuku eyi akavuli.

³Dichidinu, enu aIsarela, tiyenu, mwakashuku muchima wakwilamu; kulonda mwakashakami chachiwahi, mwakasemununi nankashi mwituŋa datuloŋa twamayeli nawuchi, mwakukaniniyi Yehova Nzambi yawankakulula jeyi.

⁴Tiyenu, enu aIsarela; Yehova Nzambi yetu hiYehova wumu hohu;

⁵wakakeŋi Yehova Nzambi yeyi namuchima weyi wejima, nawumi weyi wejima, naŋovu jeyi jejima.

⁶Nimazu awa nukukuleja lelu akekalaŋi mumuchima weyi;

⁷wakalejajimu anyaneyi chakashinshi, diyi mpanji yiwakahanjikaŋa chiwakashakamaŋa mwitala deyi, nichiwa kendaŋa munjila, nihakukama, nihakuhinduka.

⁸Wakayikasaŋa kuchikasa cheyi akekalaŋa chinjikijilu, wakayivwalaŋa haneli disu iku, disu iku.

⁹Wakayisoneki kuyi ŋamba yakwitala deyi, nikuyenzelu yakuyiŋaŋu yeyi.

¹⁰Chakakwiŋijayi Yehova Nzambi yeyi mwituŋa dasanyikililiyi ankakululajeyi Abarahama, naIsaka, naYakoba, nindi akwinkidu; chiwakatambula nyikala yamaneni yayiwahi yiwabulili kutuŋieyi,

¹¹nimatala enzala to-onayuma yayiwahi yejima yiwabulili kushamu eyi, nimashima akupunda dehi lwabulili kupundeyi, nimatempa anyivinyu nanyiolive iwabulili kudi meyi, hiwakadyaŋa hiwakekutaŋa;

¹²henohu wakababalaŋa kuchina kuvulamena Yehova wakufumishili mwituŋa daEjipitu mwitala dawudupu.

¹³Wakatiyaŋa Yehova Nzambi yeyi woma; diyi wakakalakelaŋa, wakasanyikaŋa ijina dindi.

¹⁴Bayi wakalondelela akishuku, akishi awantu akayinyeŋumuka;

¹⁵muloŋa Yehova Nzambi yeyi wekala mukachi keyi hiNzambi wukwetimukawu; Yehova Nzambi yeyi wakenza kakuzuwila, wakenza kakujilu munatuhu hewulu deseki.

¹⁶Bayi mwakamwesekaŋa Yehova Nzambi yenu neyi china chimwamwesekeli kuMasaku.

¹⁷Mwakahembaŋa chakashinshi mukuleja kwaYehova Nzambi yenu, nimuwunsahu windi, nimuyidika yindi, mwakulejeliyi.

¹⁸Wakelaŋa nichaloŋa nichachiwahi kumesu aYehova; kulonda wakashakami chachiwahi, wakamoni kwijila nakuheta ituŋodu dadiwahi dasanyikililiyi Yehova ankakulula jeyi,

¹⁹wakatemunumu ayilumbu jeyi ejima kuwakaya, mwomwanahoshiyi Yehova.

²⁰Chakakwihulayi mwaneyi kunyaka yamba kenza, nindi, Indi wunsahu, nanshimbi, nawuŋaji, wakulejeliyi Yehova Nzambi yetu, waya mudihi?

²¹henohu wakamwili mwaneyi neyi, Twadiŋi anduŋu jaFwaro muEjipitu; Yehova watufumishili muEjipitu nachikasa chaŋovu.

²²Yehova wayikoŋelini aEjipitu, niFwaro, niakwetala dindi ejima yinjikijilu nayihayamishaya maneni yakala, tuyimonaŋa namesu etu;

²³watufumishilumu, walondeliatwipŋi mwituŋa dasanyikililiyi ankakulula jetu, atwinkidu.

²⁴Yehova watulejeli kwila yidikiyi yejima, tumutiyaŋa Yehova Nzambi yetu woma, kulonda tumoni kuwaha mafuku ejima, kulonda atuhembi chachiwahi saŋi twahandila hohu, neyi ichi chitudi lelu ichi.

²⁵Chitwakashaku muchima wakwila mwaya kulejiku kwejima kumesu aYehova Nzambi yetu, mwomwanatulejiyi, chakekala kuloŋi kwetu.