Read MUKANDA WANZAMBI Deuteronoma 7 Bible Online

Deuteronoma 7 - MUKANDA WANZAMBI bible

Deuteronoma 7

¹Chakakwiŋijayi Yehova Nzambi yeyi mwituŋa diwakaya nakudiheta, chakatemunayi kuwakayeyi nyuza yayivulu, niaHiti, niaGirigashi, niaAmori, ni aKenani, ni aPerizi, niaHivi, niaYebusi, nyuza yitanu nayi yedi yakubadi keyi nikutoha niŋovu;

²chakayihanayi Yehova Nzambi yeyi kuwakayeyi, chiwakayitaŋa chiŋa wakayijilumuni chikupu, kutiyaŋana nawuchitiyaŋenu nehi, kuyimwekeshela luwi nehi.

³Kusumbwaŋana nawu nehi, mwaneyi wamumbanda kumwinkayi mwanindi weyala nehi, hela mwanindi wamumbanda kumusumbwilayi mwaneyi weyala nehi.

⁴Wakenda kakubalu mwina mwaneyi weyala hakaleka kunlondela, hakapesha akishi, hiyakayizuwila kudi Yehova, hakakujilumuna swayi swayi hohu.

⁵Tiyenu chimwakayikoŋa; tumeŋa twawu mwakatuhumoni, tuposhitwawu twakupeshela twemikawu mwakatufumpoli puchi puchi, ninyiyombuyawu mwakayitemi, niakishi awu akusoŋa mwakayochi mukesi.

⁶Muloŋenu muyantu ajila, mwamujilila Yehova Nzambi yenu; Yehova Nzambi yenu nayitondi dehi mwikali antu ambala ayena hohu, akwambula mudi antu ejima adi hewulu deseki.

⁷Yehova hashili muchima hadenu, hela kuyitonda, nindi mwabadika nyuza yacheŋi kuvulaku; muloŋa yenu mwabadikilikukeha hadi nyuza yejima;

⁸chayifumishiliyi Yehova nachikasa chaŋovu, hakuyikúula mwitala dawuduŋu kudi Fwaro mwanta wakuEjipitu, chafumini hakukeŋa kwayikeŋayi Yehova, nihakukakela kusanyika kwasanyikililiyi ankakulula jenu.

⁹Dichi dinu ilukaku neyi Yehova Nzambi yeyi diyi Nzambi; diyi Nzambi washinshika, wakakelaŋaa nimwatiyaŋeniyi, nimuluwi lwindi, nawantu amukeŋa ahembaŋa kuleja kwindi, kushikani kwikombakaji damakiŋu;

¹⁰amuhela wayifwetelaŋa kumesu awu, yowu kuyijilumuna; wamuhela hakahema ninduku, wakamufwetela kumesu indi.

¹¹Dichi dinu chiŋa wakahembaŋa nimukuleja, nimuyidika, nimuwuŋaŋamu nakuleji lelu, wilumu.

¹²Wakamona, chiwakatiyilila muwuŋaji iwu nakuhembamu nakwilamu, Yehova Nzambi yeyi wakakuhembela chitiyaŋenu naluwi lwasanyikililiyi ankakulula jeyi;

¹³wakakukeŋa, wakakukiswila nkisu, wakakuvulisha; wakakiswila nianyaneyi, nimbutu yaheseki deyi, yoyu tidiku yeyi, navinyuyeyi, namanji eyi, nianyana kaŋombi jeyi, nianyana kanyikoku yeyi, mwituŋa dasanyikililiyi ankakulula jeyi kukwinkadu.

¹⁴Wakabadika nyuza yejima kukooleka; hela kudenu, hela kuyimuna yenu, hela weyala, hela wamumbanda hikwakekala nshintaku.

¹⁵Yehova wakayifumishila kukata kwejima; nyisoŋu yatama yamuEjipitu yiweluka hakakwinkayuku, wakenka antu ejimaakuheleyi.

¹⁶Wakanoŋesha nyuza yejima yakakwinkayi Yehova Nzambi yeyi; disu deyi bayi dakayitala naluwuku, bayi wakapesha akishi awuku, chakenda kekala muhetu wakufweyi.

¹⁷Neyi wakela mumuchima weyi neyi, Nyuzoyu yambadikami kuvula nukuyimwaŋamu ŋahi?

¹⁸bayi wakayitiya womaku; wakaanukaŋa chachiwahi chayikoŋeluwu aFwaro nawaEjipitu ejima kudi Yehova Nzambi yeyi;

¹⁹kweseka kweneni kumwamweni namesu enu, niyinjikijilu, niyihayamisha, nichikasa chaŋovu, nichikasa chakwolola, chakufumishiliyi nachu Yehova Nzambi yeyi; dimu mwakayikoŋayi Yehova Nzambi yeyi nyuza yejima yiwunatiyi woma.

²⁰Yehova Nzambi yeyi wakatemesha mayanvu mukachikawu, nichakajilu mukawu anashali anabatami kumwakayenu.

²¹Bayi wakayizaala womaku; muloŋa Yehova Nzambi yeyi wekala mukachi keyi, hiNzambi muneni wakutiya woma nankashi.

²²Nyuzoyu Yehova Nzambi yeyi wakayitemuna kuwakayeyi anti anti, hiwakatwesha kuyinoŋesha iŋanda dimuku, kuchina anyama amumpata kukusemunwinamu.

²³Yehova Nzambi yeyi wakakwinkawu kuwakayeyi, wakayikumpaŋesha kukumpaŋeshakwakweni, ninichi chakajilumukawu to-o.

²⁴Akahana nianyanta jawu ankanu kudeyi, wakajiyisha nimajinawu mwishina dewulu; kwosi muntuniwumu wakadikaŋa naneyuku, ninichi chiwakayi jilumuna to-o.

²⁵Akishi awu akusoŋa kufwikŋa akishi awu, mwakayochi mukesi, bayi wakafwila helasiliva hela wuru wuduhuku, hela kuyinona tuhu nehi; mwakenza kafwamuneyi chakufwa mumuhetu; muloŋa hichuma chakushima kudi Yehova Nzambi yeyi.

²⁶Bayi wakeŋa a chuma chakushimana mwitala deyuku, wakenza kashiŋewa hamu nachu; chiŋa wuchitiyaŋa kutama nankashi, wuchitiyaŋa kumuchima bwi chikupu; muloŋa hichuma chashiŋewa.