Read MUKANDA WANZAMBI Joani 10 Bible Online

Joani 10 - MUKANDA WANZAMBI bible

Joani 10

¹Chalala chalala, nukuyileja nami, muntu wukubula kwiŋilila mwiyinda dawanyikoku kuchisu, ilaŋa hakukandamina hacheŋi, diyi ikombi, diyi mukwakubuwa.

²Ilaŋa muntu wukwiŋilila kuchisu, diyi kabiŋa kawanyikoku.

³Mukwakuhemba chisu wukumwenzulwila; anyikoku atiyaloŋa izu dindi, niyena watambikaŋa anyikoku indi yomweni hejina hejina, hakuyilombolaŋa hanzi.

⁴Chakwidishayi anyikoku indi ejima, hakutwaminaku; anyikoku hiyakumulonda, muloŋa eluka izu dindi.

⁵Ilaŋa muntu wacheŋi hiyakumulondaku, akumutemuka; muloŋahiyeluka izu dawantu acheŋuku.

⁶Yesu hakuyileja chishimu ochu, ilaŋa wena kwiluka mwayilejeliyi nehi.

⁷Dichi Yesu hakuyila nindi, Chalala chalala, nukuyileja nami, yami chisu chawanyikoku.

⁸Antu ejima ansambilili hiyamakombi, hiyakwakubuwa; ilaŋa anyikoku hiyayitiyiluku.

⁹Yami chisu; neyi muntu wukwiŋilila mudami wukuhanda, wukwijila ŋa wukwidikaŋa, wukuwanaŋa kuwudiilu.

¹⁰Ikombi wenjilaŋa chiŋa yowu kwiya nakujaha nakukisaŋana. Ami nenjili kulonda akamoni wumi, akawumoni wakubadika kuvula.

¹¹Ami yami kabiŋa walala; kabiŋa walala wukutula wumi windi hadi anyikoku.

¹²Mukwakukoŋela wufwetu hohu hikabiŋa wukweti nyikoku yinduku; chakumonayi kaŋwidi hakwinza, hakushiya nyikoku, hakutemuka; kaŋwidi hakuyikwata nakuyipalaŋesha,

¹³muloŋa wakoŋelaŋa kwawufwetu hohu, haakamaŋa nyikokuku.

¹⁴Ami yami kabiŋa walala, neluka amami aweni, niwena aŋiluka.

¹⁵Chaŋilukayi Tata, ninami namwiluka Tata. Ami nukutula wumi wami hadi anyikoku.

¹⁶Ni kweti anyikoku acheŋi, hiyamwiyinda dinuku; chiŋa nakayileta niwena; wena akatiya izu dami; akekali mukanka wumu nikabiŋa wumu.

¹⁷Dichi chankeŋelayi Tata muloŋa nukutula wumi wami kulonda nakawutambuli cheŋi.

¹⁸Kwosi wawuntambulaŋaku, nawutulaŋa ami aweni. Ni kweti Ŋovu yakuwutula, ni kweti nawa Ŋovu yakuwutambula cheŋi. Dimu mwananlejuwu kudi Tata yami.

¹⁹Dichi aYudeya hiyakudambula cheŋi hamazu owu.

²⁰Amavulu nawu, Wudi nademoni, nikuzaluka wazaluka. Mukabaŋa tuhu nakumutiyilila?

²¹Amakwawu nawu, Wenawa himazu ahoshaŋa muntu wukweti demonuku. Demoni atweshi kutonesha mesu amputamesu?

²²Henohu kuYerusalema kwadiŋi chawija chakujilika, hachila aka chachishika.

²³Yesu wadiŋi nakwenda mutembeli mwikeki dakuchisu chaSolomoni.

²⁴Dichi aYudeya hiyakumupompela kwi-ndo, hiyakumwila nawu, Wukutushakamisha mafuku aŋahi nakululuta nakujinoka? Neyi yeyi Kristu, lumbululaku chikupu.

²⁵Yesu hakuyakula nindi, Nayilejeli, enu kwitiya nehi. Nyidimu yinelaŋa mwijina daTata yami, diyi yanshimunaŋa wunsahu.

²⁶Chimunabuli kwitiya chinafumi hákubula kwikala anyikoku ami.

²⁷Anyikoku ami atiyaloŋa izu dami, ami nayiluka, niwena anlondaŋa.

²⁸Hinukuyinka wumi wahaya nyaka, hiyamba kanoŋaku; kwosi wakayihukula muchikasa chamuku.

²⁹Tata yami wanyinkeluwu wabadika ejima; kwosi wukutwesha kuyihukula muchikasa chaTataku.

³⁰Ninami niTata twekala wumu.

³¹AYudeya hiyakunona cheŋi malola nawu amwasi.

³²Yesu hakuyakula nindi, Nayileja dehi nyidimu yayiwahi yayivulu yakudi Tata, mudimwinyi mukuŋasila malola?

³³AYudeya hiyakumwakula nawu, Hitukukwasila mudimu wawuwahuku, ilaŋa hakutuka Nzambi, muloŋa eyi wumuntu wunaditeni neyi, NiNzambi.

³⁴Yesu hakuyakula nindi, Anasoneki munshimbi jenu nawu, Ami nami enu mudi anzambi.

³⁵Indi neyi antu atiyili mazu aNzambi wayiteneni nindi enu mudi anzambi; ochu mukanda wajila hiyatweshaŋa kuwumotokaku;

³⁶mumwili yena ajilikawu dehi kudi Tata, atemeshayi mumpata yamunu mwishina, nenu, Wunatuki Nzambi; nanochu chineli nami, Ni mwana kaNzambi?

³⁷Neyi nabulaŋa kwila nyidimu yaTata yami bayi muŋitiyaku.

³⁸Ilaŋa neyi nayilaŋa, hela munabuli kuŋitiya ami aweni, itiyilenu kwanyidimu, kulonda mwakeluki mwakashinshiki nenu Tata wudi mudami, ninami nidi mudi Tata.

³⁹Hiyakweseka cheŋi kumukwata, hakuyiwomboloka.

⁴⁰Hakuya cheŋi kwishinadi daYodana, kwapapatishilaŋayi Yowanu hatachi, ashakama nikwenoku.

⁴¹Amavulu hiyakwinza kudi yena nawu, Yowanu hakoŋeli yinjikijiluku, ilaŋa mazu ejima amutenenuwu muntu iwu kudi Yowanu, komana alala.

⁴²Kwenoku antu amavulu hiyakumwitiya.