Read MUKANDA WANZAMBI Joani 11 Bible Online

Joani 11 - MUKANDA WANZAMBI bible

Joani 11

¹Kwadiŋi muntu wakata, Lazaru wakuBetani, wakumukala waMariya namana kwindi wamumbanda Mata.

²Diyi Mariya wawayishili Mwanta malasha, wakombweli nyendu yindi nansuki jindi, diyi wukweti mana kwindi Lazaru wakata.

³Dichi ahelindi hiyakumutemeshela mazu, nawu, Eyi Mwanta, tiya, mukwenu wakeŋa a wakata.

⁴Yesu chanachitiyiyi hakwila nindi, Kukatiku liikwakufwaku; kwakulemesha nachu Nzambi, kulonda akalemeshi nachu Mwana kaNzambi.

⁵Yesu wakeŋa eli Mata nimana kwindi wamumbanda niLazaru.

⁶Dichi chanatiyiyi nawu wakata, hakushakama kwenoku mafuku ayedi.

⁷Henohu hakuyila atumbanji twindi nindi, Tuyenu cheŋi muYudeya.

⁸Atumbanji hiyakumwila nawu, Eyi Rabi, aYudeya mafuku awa akeŋa kukwasa malola, wuyuku nawa cheŋi?

⁹Kuchinka Yesu nindi, Ifuku dimu hidekala naora ikumi najiyeduku, tahindi? Neyi muntu wukwenda namwa ana hakudituntulaku, nanochu chanamoniyi mwaana wamunu mwishina.

¹⁰Ilaŋa neyi muntu wukwenda nawufuku wukudituntola, muloŋa nabuli chejeji mudi yomweni.

¹¹Chanahoshiyi mazu awa, hakunupaku nindi, Ibwambu detu Lazaru nayi dehi namutulu; ami hinukuya nakamuhindwishi namutulu.

¹²Dichi atumbanji hiyakumwila nawu, Eyi Mwanta, neyi nayi namutulu wukuhanda.

¹³Komana Yesu nateni kufwa kwindi; hakwila wena adiŋi nakutoŋojoka nawu nateni kunooka namutulu.

¹⁴Dichi Yesu hakuyileja chalumbuluka chikupu nindi, Lazaru wafwa dehi.

¹⁵Chinabuli kwikala kwenoku natiyi kuwaha hansaŋu yenu, kulonda enu mwaketiyi. Hela chochu, tuyenu kudi yena.

¹⁶Dichi Tomasi, atenawu nawu Mpamba, hakuyila akwawu atumbanji nindi, Tuyenu ninetu nawa, twakafwili hamu nindi.

¹⁷Yesu chanashikiyi hakuwana wakama dehi mwijamu mafuku awana.

¹⁸KuBetani kwadiŋi kwakwihi naYerusalema, neyi kwiji kilometa jisatu.

¹⁹Henohu aYudeya amavulu enza dehi nakukundeja Mata naMariya nansaŋu yamana kwawu.

²⁰Dichi Mata chatiyiliyi nawu Yesu wudi nakwinza, hakuya nakumukinkilila, Ilaŋa Mariya hakushakama tuhu mwitala.

²¹Dichi Mata hakumwila Yesu nindi, Eyi Mwanta, neyi eyi wadiŋi kunu, mutenowu mana kwami hanafuku.

²²Hela katataka neluki nami Nzambi wukukwinka chejima chiwukulomba.

²³Yesu hakumwila nindi, Mana kweyi wukusaŋuka mukufwa.

²⁴Mata hakumwila nindi, Neluki nami wamba kasaŋuka, hamba kasapukawu afu hefuku dakukuminina.

²⁵Yesu hakumwila nindi, Yami kusaŋuka; Yami kuhanda. Muntu wankuhwelelami, hela wukufwa wakahanda.

²⁶Muntu wamumi nankuhwelelami hamba kafwaku. Eyi wunetiyi mwenimu?

²⁷Yena hakumwila nindi, Eŋa Mwanta, netiyi nami yeyi Kristu, Mwana kaNzambi, yowu elaŋawu nawu wakenza mumpata yamunu mwishina.

²⁸Chahosheliyi omu hakuya kwindi, hakutambika mana kwindi Mariya hambadi nindi, Nkuluŋaŋa wudi kunu, nakutambiki.

²⁹Niyena chanachitiyiyi, hakunyamuka swayi, hakuya kudi yena.

³⁰Henohu Yesu kanda ashiki kumukala, wuchidi kwamukinkilililiyi Mata.

³¹AYudeya adiŋiyi nawu mwitala adiŋi nakumukundeja, chamwenuwu Mariya hakunyamuka swayi hakwidika, hiyakumulondela, atoŋojokeli nawu kwiji wudi nakuya nakudilila kwijamu.

³²Dichi Mariya chashikiliyi kwadiŋiyi Yesu, chamumweniyi hakudumbila kunyendu yindi, hakumwila nindi, Mwanta, neyi eyi wadiŋi kunu, mutenowu mana kwami hanafuku.

³³Dichi Yesu chamumweniyi wudi nakudila, niaYudeya enjiliyi nawu adi nakudila, hakudishishimuna muspiritu, atiya nikukala.

³⁴Nindi, Munamukamiki kudihi? Hiyakumwila nawu, Mwanta, inzaŋa wutali.

³⁵Yesu hakudila.

³⁶Dichi aYudeya hiyakwila nawu, Talenu chamukeŋayi!

³⁷Ilaŋa hadiŋi amakwawu nawu, Yeniwu watonesheli mesu anowu wadiŋi mputamesu, akaŋanyi kulekesha iwu iyala kufwa, tahindi?

³⁸Dichi Yesu, iku wudi nakudishishimuna, hakwinza kwijamu. Komana hiiyeŋu, akunjikaku niilola.

³⁹Yesu hakuyila nindi, Fumishenuku ilola. Mata, muhelanowu wafwa, hakumwila nindi, Mwanta, hanu hakununka, muloŋa munahiti dehi mafuku awana.

⁴⁰Yesu hakumwila nindi, Hinakuleji nami, neyi wukukuhwelela wukumona kulema kwaNzambuku, tahindi?

⁴¹Afumishaku niilola. Yesu hakufumbula mesu kwiwulu, hakwila nindi, Tata nakusakilili chiwunantiyi.

⁴²Ninami neluka nami eyi wantiyaloŋa mafuku ejima, ilaŋa natoŋojoki awa antu amavulu anemani kunu, dichi chinahoshi; kulonda wena etiyi nawu yeyi wantemesheli.

⁴³Chanahoshiyi mwenomu, hakubidika nezu daŊovu nindi, Eyi Lazaru, idikakumu!

⁴⁴Muntu wadiŋi wafwa hakwidikamu, chochamujiŋajiŋawu kumakasa nikunyendu namahina akujiika nachu, kumesu ajiŋiluku ihina. Yesu hakuyila nindi, Musubulenu ayi.

⁴⁵Dichi amavulu ahadi aYudeya enjili kudi Mariya, amweni ochu cheliliyi Yesu, hiyakumwitiya.

⁴⁶Ilaŋa makwawu hiyakuya kwawu kudi aFwarisi, hiyakuyileja mwaneliyi Yesu.

⁴⁷Dichi awakulumpi jawatupristu niaFwarisi hiyakupompesha chota nawu, Tukwila ŋahi? muloŋa iwu muntu hakukoŋa yinjikijilu yayivulu.

⁴⁸Neyi tukumuleka tuhu chochichi, antu ejima akumwitiya, niaRoma akenza nakututambula mpata yetu nimuza wetu.

⁴⁹Ilaŋa mwinawu wumu ijina dindi Kayafwasi, wadiŋi kapristu muneni hamwakowu, hakuyila nindi, Himweluka chuma nichimuku.

⁵⁰Munabuli kushinshika chakwila nenu chinawahi muntu wumu kufwila awa antu, kulonda muza wejima wubuli kunoŋa.

⁵¹Chahosheliyi ochu, hahosheli chakumuchima winduku; wahosheli nanochu chadiŋiyi kapristu muneni hawena mwakowu, hakuprofweta nindi, Yesu akafwili owu muza.

⁵²Hakafwila kwamuzowu hohuku; chiŋa akapompesheli hamu anyana kaNzambi anaŋalaŋani.

⁵³Kufumisha kwifuku odu hiyakutiyaloŋana nawu tumujahi.

⁵⁴Dichi Yesu hendeli nawa cheŋi hatooka mukachi kawaYudeyaku, wafuminuku, hakuya mwisaŋa didi kwahwihi nekuna, hakwijila mumukala wumu ijina dawu Efweremi, hakulabilaku hamu nawatumbanji twindi.

⁵⁵Chawija chawaYudeya chapaseka chinashiki dehi kwakwihi, antu amavulu hiyakufumafuma munyikala, hiyakukanduka kuYerusalema, hachidi paseka kanda, kulonda kudijilika.

⁵⁶Hivakukeŋakeŋa Yesu. Hiyakudihujola hadiŋi nakwimajalawu mutembeli, nawu, Munatoŋojoki nenwidi? Nenu hakwinza kuchawija ku, tahindi?

⁵⁷Akulumpi jawatupristu niaFwarisi aleja dehi antu nawu, neyi muntu neluki kwadiyi amushimuni kulonda amukwati.