Read MUKANDA WANZAMBI Joani 12 Bible Online

Joani 12 - MUKANDA WANZAMBI bible

Joani 12

¹Hasheli mafuku atanu nadimu naŋaseka, Yesu hakwinza kuBetani kwadiŋiyi Lazaru asaŋwiliyi Yesu mudi afu.

²Hiyakumutelekela yakudya kwenoku. Mata hakututaŋa kudya, ilaŋa Lazaru hakushakama nawakwawu adiŋi nakudya naYesu.

³Dichi Mariya hakunona literi yamalasha yimu asweja kulema wuseya, hakuwayisha nyendu yaYesu, hakukombola nyendu yindi nansuki jindi; itala dejima diipuka niivumba danowu malasha.

⁴Kambanji kindi wumu, Yudasi Isakaroti, wukukeŋa kumufukeja,

⁵hakwila nindi, Alekeladi kulandisha awa malasha mali makulakaji asatu, ayinka atuzweŋi?

⁶Chahosheliyi ichi halondeli kwakama atuzweŋuku, wahosheli nanochu chadiŋiyi ikombi, wadiŋi wahemba njeki, wanonenaŋamu mali ashilaŋawu munjeki.

⁷Dichi Yesu hakwila nindi, Muleki kwindi, wakeŋa a kunswekela ifuku dakanjiikawu.

⁸Atuzweŋi mwekala nawu mafuku ejima, hakwila ami hinukwikala nenu mafuku ejimaku.

⁹AYudeya amavulu nankashi chanatiyuwu nawu wudi kwenoku, hiyakuyaku. Hiyalondeli kwaYesu hohuku, alondeli nawu amoni niLazaru asaŋwiliyi mudi afu.

¹⁰Ilaŋa awakulumpi jawatupristu akwatili mpùŋa nawu tumujahi niLazaru nawa.

¹¹Muloŋa Yudeya amavulu ayili nakumwitiya Yesu hansaŋu yaLazaru.

¹²Chikunachi, izaza deneni dawantu ayili kuchawija, chanatiyuwu nawu Yesu wudi nakwinza kuYerusalema,

¹³liiyakunona nyitayi yanyikoma, hiyakuya nakumukinkilila. Hiyakubidika nawu, Hozana! Kisu kisu, iwu wukwinza mwijina daYehova, diyi Mwanta waIsarela!

¹⁴Yesu chanawaniyi mwana kachimbulu, hakukandamahu;

¹⁵neyi chanasonekuwu nawu, Eyi mwana kaZiyona wamumbanda, bayi wutiya womaku; tala, Mwanta weyi hakwinza kudeyi nakwendela hamwana kachimbulu.

¹⁶Hakusambila atumbanji twindi hiyelukili yumiyuku, ilaŋa chanamulemeshuwu dehi Yesu, hiyakwanuka chamusonekeluwu, nichamwililuwu yumiyi.

¹⁷Dichi izaza dawantu adiŋiyi nawu hatambikiliyi Lazaru afumi mwijamu hamusaŋwiliyi mudi afu, hiyakushimuna mwamwenuwu.

¹⁸Dihu hafumini kumukinkilila kudi izaza dawantu, muloŋa anatiyi dehi nawu nakoŋi dehi chinjikijilu ichi.

¹⁹Dichi aFwarisi hiyakuhosha wumu namukwawu nawu, Talenu chimukumukaŋanya; ituŋa dejima hidikumulondela.

²⁰Mukachi kanowu antu ayili nakudifukula kudi Nzambi kuchawija, mwadiŋi aHeleni amu.

²¹Wena hiyakuya kudi Fwilipu wakuBeteseda wamuŊaliliya, hiyakumulomba nawu, Eyi mwanta, tunakeŋi tumumoni Yesu.

²²Fwilipu hakuya nakuleja Anderi; Anderi nawa hakwinza naFwilipu, hiyakuleja Yesu.

²³Yesu hakuyakula nindi, Mpinji yakulemeshawu Mwana kamuntu yenza dehi.

²⁴Chalala chalala, nukuyileja nami, inawu datidiku chiŋa diholoka mumaseki difwa, mukunkulwayi dikushakamaŋa inka wadu; ilaŋa neyi dikufwa dikusoŋa mbutu yayivulu.

²⁵Muntu wukukeŋa wumi windi wakawujimbesha; muntu wukuhela wumi windi mumpata yamunu mwishina, wakawuhemba nikukuhanda kwahaya nyaka.

²⁶Muntu wukunkalakela, anlondeli; kunakekalami diku kwakekala niŋamba yami; muntu wukunkalakela, akamuhameka kudi Tata.

²⁷Ichi dinu muchima wami hiwukukaba. Nukuhosha namidi? Nili nami, Eyi Tata, mpulwishi kumpinji iyi, tahindi? Dichi nenjilili, nalondeli mpinji yoyeniyi.

²⁸Tata, alemeshi ijina deyi. Hikukwinza izu dakufuma mwiwulu nindi, Nadilemeshi dehi, nakadilemesha nawa cheŋi.

²⁹Dichi izaza dawantu emenuku chanaditiyuwu, hiyakwila nawu kunadidimi. Amakwawu nawu, Kaŋelu nahoshi nayena.

³⁰Yesu hakwakula nindi, Izu idi dinenzi hansaŋu yenu, bayi hansaŋu yamuku.

³¹Ichi dinu kusompesha mpata yamunu mwishina kunashiki dehi. Ichi dinu mwanta wayulaŋa mpata yamunu mwishina hakwikala chimwaŋaji.

³²Neyi akunfumisha heseki annyamuna kwiwulu, nakakokela antu ejima kudami aweni.

³³Chahosheliyi mwenimu, washimwini kufwa kwakukeŋa kufwayi.

³⁴Izaza dawantu hiyakumwakula nawu, Etu twatiyaloŋa kunshimbi nawu, Kristu washakamaŋa haya nyaka; indi eyi wukwila ŋahi neyi Mwana kamuntu chiŋa akamunyamuna kwiwulu? Indi yeniwu Mwana kamuntu hinyi?

³⁵Dichi Yesu hakuyila nindi, Muchidi nachejeji mafuku antesha. Endenuŋa himuchidi nachejeji, mwidima keŋa wuyikulukili. Muntu wukwenda namwidima hakwiluka kwakuyayuku.

³⁶Himuchidi nachejeji kuhwelelenu chejeji, mwikali akwachejeji. Yesu chanahoshiyi mazu awa hakufumaku, hakuya nakubatama.

³⁷Hela amumweni nakukoŋa yinjikijilu yayivulu, alekeli kwawu kumwitiya;

³⁸kulonda izu dakaprofwetu Isaya dakalumbuluki deliliyi nindi, Eyi Yehova, netiyi namutunashimuni hinyi? Chikasa chaYehova anachimwekeshi kudinyi?

³⁹Dihu hafumini kukaŋanyawu kwitiya; neyi cheliliyi cheŋi Isaya,

⁴⁰nindi, Yŋimi mesu awu, yichinchikishi nyichima yawu, abuli kumona namesu awu, abuli kushinshika munyichima yawu, kuchina kubalumuka munyichima yawu kulonda niyuki.

⁴¹Isaya wahosheli mazu awa nanochu chamweniyi lubanji lwakulema kwindi, hakumutena niyena.

⁴²Hela chochu, anyuli amavulu amwitiyili; ilaŋa abulili kumwiteja nawoma wawaFwarisi, akenda kayihaŋa mushikola yawu.

⁴³Akeŋeli kuyilemesha kudi antu; kuyilemesha kudi Nzambi hiyachikeŋeli chalalaku.

⁴⁴Yesu hakubidika nindi, Muntu waŋitiyaloŋami, hetiyaloŋa ami hohuku, wetiyaloŋa yena wantemesheli.

⁴⁵Muntu wanmonaŋami, wamonaŋa yena wantemesheli.

⁴⁶Ami nenzi niikali chejeji champata yamunu mwishina, kulonda muntu wukunkuhwelela abuli kushakama mumwidima.

⁴⁷Muntu wukutiya mazu nahoshaŋami, abula kuhembamu, ami hinakamusompeshaku; muloŋa hinenjili nakusompesha antu ampata yamunu mwishinaku, nalondeli kuhandisha antu ampata yamunu mwishina.

⁴⁸Muntu wukunleka, wukubula kwiteja munahoshaŋa, wukweti nsompeshi yindi; mazu inahoshi wowu amba kamusompesha hefuku dakukuminina.

⁴⁹Muloŋa hinahoshi chakumuchima wamami awenuku; Tata wantemesheli diyi nanleji munukuleja antu, nimunukuhosha.

⁵⁰Neluki chachiwahi nami, mwananlejiyi hiwumi wahaya nyaka. Mwejima munahoshaŋa, nahoshaŋa mwakunleja kudi Tata.