Read MUKANDA WANZAMBI Joani 13 Bible Online

Joani 13 - MUKANDA WANZAMBI bible

Joani 13

¹Henohu chawija chapaseka chichidi kanda, Yesu welukili nindi mpinji yami yakufuma mumpata yamunu mwishina niyi kudi Tata yinashi ki dehi. Chakeŋeliyi antu indi adiŋi mumpata yamunu mwishina, wayikeŋeli hachikupu ndo nikunsa.

²Hadiŋuwu nakudya, henohu diyabolu weŋa dehi mumuchima waYudasi Isakaroti, mwana ka Shimona, jakumufukeja,

³Yesu chanelukiyi nindi Tata nashi yuma yejima mumakasami, neluki nindi nafumini kudi Nzambi, hinukuya kudi Nzambi;

⁴hakunyamuka kukudya, hakutenteka mahinindi ahewulu kumbadi, hakunona ditwayi, hakudivwala.

⁵Hakuhuŋununa meji mumbashila, hakutachika kuwelesha nyendu yawatumbanji, nakuyikombola naditwayi danavwaliyi.

⁶Chanashikiyi kudi Shimona Petulu, yena hakumwila nindi, Mwanta, keŋa wuweleshi nyendu yamami?

⁷Yesu hakumwakula nindi, Ichi chinukwilami katataka hiwunachilukuku, ilaŋa chamba kakulumbulukila kunyaka yakenza.

⁸Petulu hakumwila nindi, Hiwamba kawelesha nyendu yamuku. Yesu hakumwakula nindi, Neyi nukubula kukuwelesha, hiwukutwesha kutiyaloŋana nanamuku.

⁹Shimona Petulu hakumwila nindi, Mwanta, bayi nyendu yami hohuku, ilaŋa nikumakasami nikunamutu.

¹⁰Yesu hakumwila nindi, Muntu naweli dehi kumujimba wejima hakukeŋa kuwela cheŋuku, chiŋa kunyendu hohu; natooki dehi mumujimba wejima. Enu munatooki dehi, ilaŋa himunatooki wejima wenuku.

¹¹Muloŋa welukili muntu wukukeŋa kumufukeja; dihu hafumini kwila nindi, Himunatooki wejima wenuku.

¹²Cheliliyi naweleshi dehi nyendu yawu, nanoni dehi yuma yindi yakuvwala, nashakami dehi cheŋi, hakuyila nindi, Ichi chinayili munachiluki, tahindi?

¹³Enu mwaŋilaŋa nenu, Eyi Nkuluŋaŋa; cheŋi nawa nenu, Eyi Mwanta. Mwelaŋa chachiwahi, muloŋa dichi chinidi.

¹⁴Ami niMwanta wenu niNkuluŋaŋa nawa, naweleshi nyendu yenu, dichi ninenu nawa mwadi kuweleshaŋana nyendu yenu.

¹⁵Muloŋa ami nayileji chuma chakwimbujola, kulonda ninenu nawa mwilaŋa neyi munayilenu.

¹⁶Chalala chalala, nukuyileja nami, nduŋu habadikaŋa nkaka yinduku; hela muntu atemeshawu habadikaŋa wamutemesheluku.

¹⁷Neyi muneluki yumiyi himukuyila, munakooleki.

¹⁸Hinayiteni wejima wenuku; awa inatondi nayiluki; ilaŋa nalondi mukanda wajila wulumbuluki welawu nawu, Muntu wadyaloŋa yakudya yami nannyamwini dehi katutu kindi.

¹⁹Kufumisha hanu nukuyilejaŋa yuma yichidi kanda yimwekani, kulonda neyi yinamwekani dehi mwakatweshi kwitiya nenu diyi ami.

²⁰Chalala chalala, nukuyileja nami, yowu wukutambula muntu nukutemesha, nantambulami; muntu wukuntambulami, natambuli yena wantemesheli.

²¹Yesu chanahoshiyi ochu, hakukaba muspiritu yindi, hakushimuna nindi, Chalala chalala, nukuyileja nami, hadi mwinenu wumu wukunfukeja.

²²Atumbanji hiyakutalaŋana wumu namukwawu nawu, Nateninyi?

²³Kumesa kwadiŋi kambanji kindi wumu akeŋeluwu kudi Yesu, hakukundamena hebwambu daYesu.

²⁴Dichi Shimona Petulu hakumukobola yena, hakumwila nindi, Tuleji muntu anateniyi.

²⁵Iku saŋa akundamenayi hebwambu daYesu, hakushetumuka, hakumwihula nindi, Mwanta, hinyi?

²⁶Yesu hakwakula nindi, Muntu nukutantila chibalu chadinkendi hinukumwinka, diyi. Chanatantiyi hakumwinka Yudasi mwana kaShimona Isakaroti.

²⁷Chanatambuliyi chibalu ochu Satana hakumwiŋila. Dichi Yesu hakumwila nindi, Ilaku swayi muwunakeŋi kwila.

²⁸Kumesa hikwadiŋi muntu welukili mwanatwaliyuku.

²⁹Amakwawu atoŋojokeli nawu kwiji Yesu namwili Yudasi nindi, Yaku wulandi yuma yachidika chachawija; indi kwiji avinki atuzweŋi yuma; muloŋa Yudasi diyi wasendelaŋa njeki yamali.

³⁰Dichi yena chanatambuliyi chibalu, edika nihanzi. Henohu kuneli dehi wufuku.

³¹Chanedikiyi hanzi, Yesu hakuhosha nindi, Ichi dinu Mwana kamuntu anamulemeshi dehi; niNzambi nawa anamulemeshi mudi yena.

³²Chanamulemeshuwu Nzambi mudi yena, niNzambi keŋa alemeshi Mwana kamuntu kachawichi.

³³Enu anyana anyanya, nidi nenu kapinji kanti hohu. Mwakankeŋakeŋa; munahosha nawaYudeya nami, Kunukuya himukutwesha kushika kwoku; dimu nukuhosha nawa nanenu.

³⁴Tiyenu, nukuyileja lushimbi lwalwiha nami, Mukeŋaŋani. Chinayikeŋami, ninenu nawa keŋaŋanenu.

³⁵Neyi mukukeŋaŋana, dihu hakayilukilawu antu ejima nawu mudi atumbanji twami.

³⁶Shimona Petulu hakumwihula nindi, Mwanta, wukuya kudihi? Yesu hakwakula nindi, Kunukuyami hiwukutwesha kunlondela katatakaku, ilaŋa wamba kanlondela.

³⁷Petulu hakumwila nindi, Mwanta nukukaŋenyadi kukulondela katataka? Hela kufwa hamujimba weyeyi nukufwa tuhu.

³⁸Yesu hakwakula nindi, Wukufwila hamujimba wamami, tahindi? Chalala chalala, nukukuleja nami, hakela ikombu kanda edikiluku, henohu eyi wadikala dehi mapampa kasatu neyi, Hinamwiluka Yesuku.