Read MUKANDA WANZAMBI Joani 15 Bible Online

Joani 15 - MUKANDA WANZAMBI bible

Joani 15

¹Ami yami muvinyu walala, Tata yami diyi ndimi.

²Nyitayi yejima yamudami yabulaŋa kusoŋa nyikabu, wayikunkulaŋaku; niyejima yasoŋaŋa nyikabu wayitookeshaŋa, kulonda yisoŋi nyikabu yayivulu.

³Enu munatooki dehi namazu inahoshi nanenu.

⁴Shakamenu mudami, ninami nishakami mudenu. Chakaŋanyaŋa mutayi kusoŋa nyikabu inka wawu chiŋa wushakama mumuvinyu, chochimu ninenu nawa mukukaŋanya chiŋa mushakama mudami.

⁵Yami muvinyu, enu munyitayi; muntu washakamaŋa mudami ninami mudi yena, diyi wasoŋaŋa nyikabu yasweja kuvula; muloŋa chakadi ami himukutwesha kwila hela chuma chimuku.

⁶Neyi muntu nabuli kushakama mudami, akumunata neyi mutavi, wukuuma; akuyikuŋula nakuyinatila mukesi, yikusukuma.

⁷Neyi mukushakama mudami, nimazu ami ashakama mudenu, mukulomba chonsu chimukukeŋa, akuyililachu.

⁸Chuma chakumulemesha nachu Tata yami, chochakusoŋa nyikabu yayivulu; himukwikala atumbanji twami.

⁹Mwanankeŋuwu kudi Tata, dimu nawa munayikeŋenu; shakamenu mukukeŋa kwami.

¹⁰Neyi mukuhembaŋa munayilejaŋa mukusnakama mukukeŋa kwami; neyi chinahembaŋami mwanlejaŋawu kudi Tata yami, nashakamaŋa mukukeŋa kwindi.

¹¹Chinayileji yumiyi nalondi muzaŋalu wami wikali mudenu, nimuzaŋalu wenu wuwanini.

¹²Nayileji nami mukeŋaŋani, neyi chinayikeŋi dehi ami.

¹³Hikudi kukeŋa kwabadika kwenikuku, kwakutulayi muntu wumi windi hanyijimba yawamabwambu jindi.

¹⁴Neyi mukwila munukuyileja mukwi kala amabwambu jami.

¹⁵Hinukuyitena nawa cheŋi nami muyanduŋuku; muloŋa nduŋu helukaŋa mwelaŋayi nkaka yinduku. Ilaŋa nayiteni dehi nami mudi amabwambu, muloŋa nayileji dehi yuma yejima yinatiyili kudi Tata yami.

¹⁶Hiyenu mwantondeli amuku, ami yami natondelenu, nayikunjiki mudimu wakuya nakusoŋa nyikabu, ninyikabu yenu yakashakami yayiwenyi, kulonda ayinki chonsu chimukulomba Tata mwijina dami.

¹⁷Nukuyileja mwenimu kulonda mukeŋaŋani.

¹⁸Neyi akuyihela kudi antu ampata yamunu mwishina, muneluki nenu asambila dehi kunhelami, enu achidi kanda ayiheli.

¹⁹Neyi enu mwadiŋi ampata yamunu mwishina, akwampata yamunu mwishina adi kukeŋa antu awu. Enu himudi ampata yamunu mwishinaku, ilaŋa ami nayitondeli mukachi kawantu ampata yamunu mwishina; dihu hanafumi kuyihela kudi antu ampata yamunu mwishina.

²⁰Anukenu mazu inayileja nami, Nduŋu habadikaŋa nkaka yinduku. Chankabishiluwu ami, ninenu nawa akayikabisha. Neyi ahembeli mazu ami, akahemba mazu enu nawa.

²¹Ilaŋa yuma yejimiyi akayilila hansaŋu yejina dami, muloŋa anabuli kwiluka yena wantemesheli.

²²Neyi nabulili kwinza nakuhosha nawu, hiyadi kwikala nanshiduku. Hakwilichi hiyakweti mwakuleyela nanshidi yawuku.

²³Muntu wukuhelami, naheli niTata yami nawa.

²⁴Neyi nabulili kwila mukachi kawu nyidimu yabulili kukoŋahu dehi muntu wacheŋi, hiyadi kwikala nanshiduku. Hakwilichi anamoni nakuhela kumu ninami niTata yami.

²⁵Chumichi chinalondi kulumbulula mazu asonekeluwu munshimbi jawu eliluwu nawu, Ananheli chakadi muloŋa.

²⁶Ilaŋa chakenzayi Nkwashi nakayitemeshela wakudi Tata, yowu Spiritu wansaŋu yalala, wukufuma kudi Tata, diyi wakela chinsahu chami.

²⁷Ninenu nawa mwakela ayinsahu nanichi chimunekali nanami kufumisha kutachi.