Read MUKANDA WANZAMBI Joani 16 Bible Online

Joani 16 - MUKANDA WANZAMBI bible

Joani 16

¹Chinayileji yumiyi nalondi akabuli kuyidimbwisha.

²Akayihaŋa mumashikola; eŋa, mpinji yakenza yakela muntu wakayijaha, wakatoŋojoka nindi wudi nakukalakela Nzambi mudimu.

³Akela yumiyi nanochu chabula kwilukawu Tata hela ami.

⁴Nayileji yumiyi kulonda neyi mpinji yawu yinenzi mwakaanukaŋa nenu nayilejelumu dehi. Hatachi hinayilejelaŋa yumiyuku, muloŋa nadiŋi nenu;

⁵katataka hinukuya kudi yena wantemesheli. Kwosi mwinenu wumu wukuŋihula nindi, Wukuya kudihuku?

⁶Chinayileji mazu awa, munyichima yenu mudi kwakuneŋa hohu.

⁷Hela chochu, nukuyileja mwalala nami, chinukufumahu chikuyiwahilenu; neyi nukubula kufumahu, Nkwashi hakwinza kudenuku; ilaŋa neyi nukuya, nakamutemesha enzi kudenu.

⁸Niyena chakenzayi, wakakonkolola antu ampata yamunu mwishina nansaŋu yanshidi, nansaŋu yakuloŋa, ninansaŋu yakusompesha.

⁹Wakayikonkolola hansaŋu yanshidi nanichi chabulaŋawu kuŋitiya;

¹⁰hansaŋu yakuloŋa nanichi chinukuya kudi Tata, himwakanmona cheŋuku;

¹¹hansaŋu yakusompesha nanichi chaneliyi mwanta wampata yamunu mwishina anamusompeshi dehi.

¹²Nichidi nayuma yayivulu yakuyileja, ilaŋa katataka himukuyitweshaku.

¹³Ilaŋa chakenzayi Spiritu wansaŋu yalala, wakayileja mwahita nsaŋu yalala yejima. Hakahoshaŋa yakumucnima windi yomwenuku, wakahoshaŋa mwatiyaloŋayi mwejima, wakashimunaŋahu dehi yuma yakenza.

¹⁴Yena wakanlemesha, wakatambula yuma yamami, wakayishimwinamu enu.

¹⁵Yuma yaTata yejima yamami; dichi chineli nami wakatambula yuma yamami, wakayishimwinamu enu.

¹⁶Mukuhita kapinji kanti himukunmonaku; mwakahita kapinji kakwawu kanti mwakanmona.

¹⁷Dichi atumbanji twindi amu hiyakudihula nawu, Chanatulejiyi nindi, Mukuhita kapinji kanti himukunmonaku, mwakahita kapinji kakwawu kanti mwakanmona; cheŋi nindi, muloŋa nukuya kudi Tata; chaya mudihi?

¹⁸Dichi hiyakudihula nawu, Chanatulejiyi nindi, Mukuhita kapinji kanti; chaya mudihi? Etu hituneluki mwanatulejiyuku.

¹⁹Yesu neluki dehi chakukeŋa kumwihulawu; hakuyila nindi, Mudi nakudihujola nsaŋu yamazu inahoshi nami mukuhita kapinji kanti himukunmonaku, mwakahita kapinji kakwawu kanti mwakanmona; tahindi?

²⁰Chalala chalala, nukuyileja nami, mukudila, mukululuta, hakwila antu ampata yamunu mwishina akuzaŋalala. Enu mukuneŋa, ilaŋa kuneŋa kwenu kwakabalumuka muzaŋalu.

²¹Mumbanda waneŋaŋa hafunyishaŋayi, muloŋa mpinji yindi yinamuwani dehi; hakwila neyi navwali dehi mwanindi, hakwanuka nawa cheŋi ihuŋuku, nakuzaŋalala namuntu navwaliki mumpata yamunu mwishina.

²²Dichi enu mudi nakuneŋa katataka, ilaŋa nakayimona cheŋi, mwakazaŋalala munyichima yenu, nimuzaŋalu wenu kwosi wakayitambulawuku.

²³Dena ifuku odu himwakaŋihula cheŋi chumaku. Chalala chalala, nukuyileja nami, neyi hadi chuma chimwakamulomba Tata, wakayinkachu mwijina dami.

²⁴Kanda mulombaŋahu dehi chuma mwijina damuku. Lombenu mutambuli, kulonda muzaŋalu wenu wuwanini.

²⁵Nahoshi nenu mwenimu nayishimu, ilaŋa mpinji yakenza hinakahosha nenu nayishimuku, nakayileja Tata chalumbuluka.

²⁶Dena ifuku odu mwakalomba mwijina dami; hinukuyila nami yami nakayilombela kudi Tataku,

²⁷muloŋa yomweni Tata wayikeŋa nanichi chimunankeŋami, nanichi chimunetiyi nenu ami nafumini kudi Tata.

²⁸Nafumini kudi Tata, nenzi mumpata yamunu mwishina; cheŋi nawa nukufuma mumpata yamunu mwishina, nukuya kudi Tata.

²⁹Atumbanji twindi hiyakwila nawu, Ichi dinu hiwukuhosha chalumbuluka, hiwudi nakuhosha nayishimuku.

³⁰Ichi dinu tuneluki dehi netu eyi weluka yuma yejima, hichikweti kukwihula chuma kudi muntuku. Dichi tunetiyi netu wafumini kudi Nzambi.

³¹Yesu hakuyakula nindi, Ichi dinu munetiyi, tahindi?

³²Talenu, mpinji yikwinza, eŋa yinenzi dehi, yakuyipalaŋeshawu wejima wenu, muntu nakwindi, muntu nakwindi, mukunshiya kanka wami; ilaŋa hinidi kanka wamuku, nidi naTata.

³³Chinahoshi nenu mwenimu, nalondi nami mumoni kuwunda mudami. Mukumona lukadi mumpata yamunu mwishina, ilaŋa tiyenu kuwaha, ami nemiki mpata yamunu mwishina mushindu.