Read MUKANDA WANZAMBI Joani 18 Bible Online

Joani 18 - MUKANDA WANZAMBI bible

Joani 18

¹Chanahoshiyi mazu awa, Yesu hakwidika nawatumbanji twindi, hakuya kwishinadi dakaloŋa Kidironi kwadiŋi itempa, hakwijila mu yomweni nawatumbanji twindi.

²Ilaŋa iwu Yudasi wamufukejeli, welukiluku, muloŋa Yesu wayilaŋaku kakavulu nawatumbanji twindi.

³Yudasi chanatambuliyi chendu chamashidika niatulama kudi awakulumpi jawatupristu nikudi aFwarisi, hakuya kwenoku namanoŋu niyimunyi niyitwa.

⁴Dichi Yesu weluka dehi yuma yejima yikukeŋa kumushikena, hakuyikinkilila. Hakuyihula nindi, Mukukeŋanyi?

⁵Hiyakumwakula nawu, Yesu wakuNazareta. Yesu hakuyila nindi, Diyi ami. NiYudasi wamufukejeli, nemani chimu nawu.

⁶Ochu chayililiyi nindi, Diyi ami; hiyakufunta mankinkanyima, adimbuka niheseki.

⁷Hakuyihula cheŋi nindi, Mukukeŋanyi? Nawu, Yesu wakuNazareta.

⁸Yesu hakuyakula nindi, Nayileji dehi nami diyi ami; dichi neyi yami mudi nakukeŋa, yilekenu awa adiyili kwawu;

⁹kulonda izu dahoshayi dehi dilumbuluki, deliliyi nindi, Awa wanyinkeli hinajimbeshuhu hela wumuku.

¹⁰Dichi Shimona Petulu wadiŋi nampoku yakabali, hakuyihola hakutapa nduŋu yakapristu muneni, kutapa kwakumuketula itu dindi dachidiilu. Ijina danowu nduŋu Malikusa.

¹¹Dichi Yesu hakumwila Petulu nindi, Somekaku mpoku yeyi muchindalu chayu; lupasa lwananyinkiyi Tata nibuli kunwa?

¹²Ochu chendu, nimukulumpi wawatulama, niatulama twawaYudeya, hiyakumukwata Yesu, hiyakumukasa.

¹³Asambilili kumutwala kudi Anasi, muloŋa diyi mukwesanu waKayafwasi wadiŋi kapristu muneni hamwakowu.

¹⁴Yena Kayafwasi diyi walejeli aYudeya maana akwila nindi, Chinawahi muntu wumu afwili awa antu.

¹⁵Shimona Petulu hakumulonda Yesu, nikambanji mukwawu nawa. Owu kambanji mukwawu amwiluka dehi kudi kapristu muneni, hakwijila naYesu muchipaŋu chakapristu muneni.

¹⁶Ilaŋa Petulu hakwimana hanzi kuchisu. Owu kambanji mukwawu elukawu kudi kapristu muneni, hakwidika, hakuhosha namumbanda wahembelaŋa kuchisu, hakumwiŋija Petulu.

¹⁷Dichi chaŋadima chamumbanda wahembelaŋa kuchisu, hakumwihula Petulu nindi, Nineyi nawa wukambanji kaniwu muntu, tahindi? Yena hakwila nindi, Nehi, hiyamuku.

¹⁸Henohu anduŋu naawatulama adiŋi nakwimana kwenoku, abutula dehi kesi kamakala. Adiŋi nakwota kesi namashika adiŋuku, niPetulu nawa hakwimana nawu nakwota kesi.

¹⁹Dichi kapristu muneni hakumwihujola Yesu nsaŋu yawatumbanji twindi, nichalejelaŋayi antu.

²⁰Yesu hakumwakula nindi, Ami nahosheli hatooka kumesu awantu ejima. Nayilejelaŋa mafuku ejima mumashikola nimutembeli mwapompelaŋa aYudeya ejima. Hinahoshuhu dehi chuma hambaduku.

²¹Wukupihujoleladi? Yihuli antu adiŋi nakuntiya chinahoshelaŋa. Wena eluka chinahosheli.

²²Chanahoshiyi mwenimu, kalama wemenuku hakumweta Yesu mbaŋala, nindi, Kapristu muneni wumwakuli chenochu?

²³Yesu hakumwakula nindi, Neyi nahoshi chatama, shimunaku chinatamishi, ilaŋa neyi chachiwahi wunaŋetelidi?

²⁴Anasi hakumutemesha kudi kapristu muneni Kayafwasi chochamukasawu.

²⁵Henohu Shimona Petulu saŋa emenayi nakwota kesi. Dichi hiyakumwihula nawu, Nineyi nawa wukambanji kindi? Yena hakudikala nindi, Nehi, hiyamuku.

²⁶Kuchinka kambanji wumu kakapristu muneni, ntaŋa yanowu muntu aketulawu itu kudi Petulu, nindi, Ami hinakumona chimu nindi mwitempaku?

²⁷Dichi Petulu hakudikala cheŋi; ikombu edikila nihohenohu.

²⁸Dichi hiyakumufumisha Yesu kudi Kayafwasi kwadiŋiyi, hiyakumwiŋija mwitala dakusompela. Henohu kunachi dehi. Ilaŋa wenawu kwijila mwitala dakusompela nehi, akenda kadiŋilola, kulonda atweshi kudya paseka.

²⁹Dichi Pilatu hakwidika hanzi hadi wena nindi, Iwu muntu munamuholokeli namuloŋanyi?

³⁰Hiyakumwakula nawu, Neyi yeniwu muntu hadiŋi mukwakutamishaku, twadikumuleta kudeyi?

³¹Pilatu hakuyila nindi, Mutambulenu mumusompeshi enu aweni mwaya nshimbi jenu. AYudeya hiyakumwila nawu, Etu kujaha muntu chinjila;

³²kulonda mazu ahosheliyi Yesu, ashimwiniyi mwakafwilayi alumbuluki.

³³Dichi Pilatu hakufunta cheŋi mwitala dakusompela, hakumutambi ka Yesu, hakumwila nindi, Eyi komana wuMwanta wawaYudeya?

³⁴Yesu hakwakula nindi, Wunahoshi mwenimu eyi aweni, tahindi anakulejumu kudi antu acheŋi?

³⁵Pilatu hakwakula nindi, Ami nikaYudeya, tahindi? Muza weyeyi aweni niakulumpi jawatupristu, diwu anakuleti kudami. Wunelidi?

³⁶Yesu hakwakula nindi, Wanta wami hiwampata yamunu mwishinaku; neyi wanta wami wadiŋi wampata yamunu mwishina, ambuŋami adi kulwa, kulonda abuli kunhana kudi aYudeya; wanta wami hiwamunuku.

³⁷Dichi Pilatu hakumwila nindi, Eyi komana wumwanta? Yesu hakumwakula nindi, Wunahoshi eyi aweni neyi nimwanta; dichi chinavwalikilili, dichi chinenjilili mumpata yamunu mwishina, kulonda nakeli chinsahu chansaŋu yalala. Akwansaŋu yalala ejima atiyaloŋa izu dami

³⁸Pilatu hakumwihula nindi, Nsaŋu yalala yika? Chanahoshiyi mwenimu hakwidika cheŋi hadi aYudeya, hakuyila nindi, Ami kwami hinamumoni nachitelaku.

³⁹Ilaŋa mukweti chaaku chakwila chiŋa niyumbiluku muntu wumu hapaseka. Dichi munakeŋi niyumbiluku Mwanta wawaYudeya, tahindi?

⁴⁰Dichi hiyakuvwakuka nakubidika cheŋi naŋovu nawu, Bayi yeniwuku, chiŋa Baraba. Yena Baraba wadiŋi kapondu.